Pîron
Bone nut', Marôye! bone nut', mi fèye !
Qwand dji t' riveû, li coûr mi rèy !
Kimint t' pwètes-tu? ès-s' todi bin ?
Por mi, grâce à Diè, dj'a l' vinte plin
Marôye ou Crantche-è-cwèr
Qui li grand diâle ti rompe li cô !
Ni r'vêrès-s' mây si ti n'ès sô ?
Don.né rin-n'-vât ! bougrèsse gobèye !
Mâssî pourcê! mâssî cûrèye !
Pîron
Ou! qui t' fât-i? qu'ès-s' èwarêye !
N'as-s' djamây pus vèyou 'ne sôlêye ?
Marôye
I n' fât nin qu' dj'è vasse qwèri foû !
Dj'ènn'a el mohon tos lès djoûs,
Ine djint qui n' fîrt nè côp nè make,
Qui n' fait qu' beûre èt prinde dèl toûbac' !
Pîron
Ni t' tairès-s' nin, di, dobe ribâde ?
Dè mons, lê-m' là qwand dj' so malâde !
As-s' li diâle vèyou â criyer ?
Ratind po l' mons qu' dj'âye rinârdé !
Ba ba ba ba baw…
Ba ba ba ba baw…
Aye ! bon gros Diè ! qui dj'a mâ m' cour.
Rade dè vinaigue ! vola qui dj' moûr !
Coûr rade, Marôye ! coûr vite, bâcèle !
Va-s' mi qwîr di l'êwe di canèle !
Marôye
Qui n' rinâdes-tu tos tès boyês,
Poûmons, golète èt tot-a-fait !
Ca ossi vrêye qu'on m' lome Marôye
Si dji n' djètéve dès lâmes di djôye !
Pîron
0 ! dobe pitain ! mins qui dj' seûye mwèrt,
Pa lès bènots ! s' dji n' vin foû d' tère
Po t' hèrer dès pogn è grognon
Portant qu' t'ès câse dèl mwèrt Piron !
Ou s' dji forfai don 'ne dimêye eûre
Dji t' f'rè li cwèr tot pièr tot neûr,
Si t' kibouyerè-dj' tourtote di côps,
Tant qu' dji t'ènn' âye diné tot m' sô !
Marôye
Mot si ti vous, c'èst mi tot d'onk !
Dji n'îreû nin ine pihèye lon !
Lès-èfants
Binamé pére, 'nez-m' à magnin !
Dj' n'a nin sopé! dji moûr di faim !
Èt s' n'avans-gn' nin fait à qwatre eûres
Atot m' grond fré volà, qui pleûre !
Pîron
Qu'av' li diâle vèyou tos-à-fait ?
0 ! qu'a-dj' in-ârmâ è m' sètchê ?
Qui n' so-dj' don.né tourtot fin neûr
Si vos n' mèl pârez tot-asteûre !
flitch-flatch ! so tos-a-fait…
pif-pouf ! so tos-à-fait…
Marôye èt sès èfants brèyèt
 moudreû! â moudreû! qui t'a-t-on fait?
Lès-èfants
Binamé pére! binamêye mére !
Binamé pére ! binamêye mére !
Aye ! aye ! aye! aye!
Dji n'a rin fait !
Èt l' pére fait todi flitch-flatch
Sacwants tites estént e francès dins l' live Haust, come « Marôye et ses enfants crient ».
« don.né » est on prononçaedje /õ/ do betchfessî å di « dåner » (come do cotoû d' Vizé, ey e l' Hesbaye).