Li dj’vå a sprognî hinant è l’ êr dès spiteûres di blanke same. Pwis, come on tchin tot frèch’, i s’ a k’hoyou si fwèrt qu’ l’ atèlèye ènn’ a tronlé dès wêtroûles disqu’ a l’ cawîre.
Mi, dj’ èl riwête, aspoyî so l’ assis dè l’ finièsse, è l’ grande couhène d’ a m’ matante. Èlle a mètou d’vant mi eune assiète di souk’ avou ‘ne oranje qu’ èlle a bodji l’ pèlote èt côpé a bokèts, come èle fêt tos lès matins qwand dji louke, è l’ coûr, lès cinsîs qu’ aminèt leûs grins a moûre. Dji fé tofèr parèy: d’ on côp d’ dint, dji råye li tièsse a on bokèt d’ frut, pwis dj’ èl hère é souk’ qui s’ vint plaki so l’ hiråde èt dj’ èl tchoûke è m’ boke. Bin rade, mès deûts sont tot glumiants; dj’ èlzès ralètche, ou bin dj’ èlzès r’sowe so l’ divant d’ mi p’tit vantrin a blanks èt bleûs cwårès, qu’ on-z-a atèlé a m’ hanète avou deûs cawètes.
Dj’ a cink ans èt dji r’wête li dj’vå. Nièrveûs qu’ il èst ci-la ! Sins-ahote, i grète avou s’ poyou pîd l’ pavèye, råyant a d’mèy lès målès-yèbes qui crèhèt inte lès rondès tièsses dès pavés. Dj’ ènnè so-st-èsblawté, ca, d’ å pus lon qu’ dji m’ sovinse, dj’ a todi stou bleû sot dès dj’vås. Pus-assètchi qu’ eune wèrmaye après l’ loumîre ou qu’ on galant après s’ crapôde ! Dj’ ènnè so come mårké å rodje fièr, r’djèton d’ eune race acoplèye a sès bayes dispôye dès mèyes d’ ånnèyes !
Podrî mi, ine cwiz’nîre blinquèye a fwèce d’ èsse rihurèye. Èle rimplace li vîye plate bûse èt ravize on meube a ridans avou totes sès lodjètes qu’ on-z-î a bon, a l’ sîze î rèshandi sès pîds. Kibin d’ côps l’ osté, n’ ont-èles nin ahouté dès djonnes mohons toumés a l’ valèye dès nids qu’ lès crèveûres dè pègnon ènnè sont plinnes ! Dj’ èlzès t’néve bin å tchôd d’vins dès låsses a solés gårnèyes di wate po sayî d’ lès wårder è vike. Dji veû co m’ matante solèver l’ take avou on fin havèt èt fè rèsprinde li feu. Eune cafougnèye gazète, qwate cayèts bin sètchs èt hay èvôye, li blame ronfléve è fôrnê !
Li dj’vå, c’ èst-st-eune grîze cavale qui v’ louke todi è cwèsse èt sonle prète a v’ djower ‘ne calinrèye. Èle fêt eun’ ascohèye, pwis eun’ ôte, èt co eun’ ôte... Va-t-èle pèter èvôye come dj’ èl vôreû bin veûy fé, mågré l’ lamia qui lî clape cåzî d’vins lès pîds ?
So l’ dreût costé dè l’ cwiz’nîre, i gn-a ‘ne sipèsse ouh’ di fièr: èle droûve so l’ molin. Foû d’ la, vint on disdut d’ tos lès diâles, come si on adjèant molin å cafè toûn’reût sins r’la. Mins la, on n’ mi lêt nin aler ! Cès grossès rowes qui s’ agripèt l’ eune l’ ôte, mi f’sèt sogne èt il î fêt plin d’ corôyes di cûr prètes a haper on p’tit valèt trop curieûs. Dîh côps so l’ djoû, l’ oûh’ si droûve èt m’ mononke Bèbèrt mousse è l’ couhène. C’ èst-st-on grand stindou, on dispindeû d’ gayole, mègue come on tchin d’ corote èt blankî a l’ farène disqu’ å fî fond d’ sès sourcis èt dès longous poyèdjes qui lî stitchèt foû di s’ narène. Albèrt Grosjan qu’ on l’ loume ! Minme qu’ on-z-a bin ri avou ça !
L’ ôte djoû, a l’ nute, qu’ on-z-aveût pris l’ convwès èt qu’ on riv’néve a pîd pa l’ trantchèye, nos-avans crwèzé ‘ne sôlèye qui lî d’manda dè feu. Kimint l’ loume-t-on co ci-la, aveût-i dit. Petitjean ? Grandjean ? Todi nin Grosjean, pace qu’ i n’ a nole panse !
Mi mononke purdéve on bol so l’ djivå, todi l’ minme, èt s’ vûdéve eune jate di neûr cafè a l’ cècorèye, tinou å tchôd d’vins ‘ne vète caf’tière d’ émay. I l’ låméve a p’tits goûrdjons come on vré caf’teû qu’ il èsteût, r’noufléve on côp, pwis, sins moti, r’toûrnéve a l’ ovrèdje. A hintche dè m’ finièsse, c’ èsteût l’ molin. Cwand c’ èst qu’ on cinsî apwèrtéve sès grins a moûre, on tapéve li pwète grande å lådje èt on rèscouléve li bègnon a stok’ d’ eune sôre di pèron, cåzî a ôteûr po distchèrdjî lès sètchs. Èt po-z-èsse trankiye, on discrohîve li lamia èt on lèyîve li dj’vå sins l’ loyî èt l’ pus sovint, i s’ èssok’téve påhûl’mint.
Oûy, ça n’ ala nin insi. Pidjote a midjote, mète après mète, sins fé l’ gugusse, nosse babaye s’ aveût aprépi dè l’ vôye èt, tot d’ on côp... Hay èvôye ! Il a bizé po ‘nnè raler a s’ cinse ! Fèrnand, li groumèt, a corou malåde po rapici l’ cavale èt qwand il a riv’nou tot l’ tinant pa s’ lôye-cô, il èsteût tot rodje, foû d‘ alène èt souwéve sonk’ èt êwe. I fourit oblidji d’ s’ assir dîh munutes so ‘ne tchèsse-rowe po s’ lèyî ravou. Mi, dji rèyéve plin m’ bodène… Qui dji m’ plê bin ‘mon m’ matante a r’wêtî lès dj’vås !