Adjeu Sint-Nicolas

Èn årtike di Wikisource.
Ciste ouve ci egzistêye eto divins ds ôtès ortografeyes : Ortografeye do scrijheuRifondou walon.
Adjeu Sint-Nicolas
rortografiaedje da Lucien Mahin, e Feller
Adjeu Sint-Nicolas

Lès djeus, lès tch’fôs, lès tchéns, lès fisiks èt lès gruwes
Lès bablutes, lès tch’mins d’ fiér, lès bublots, lès batias,
N’ sont pus qu’in sondje pour vous. Vous avèz pièrdu d’ vuwe
Èl grand sint Nicolas èt tous sès clicotias.

O candje su wére di tans. Insi, l’anéye passéye
Vos m’tîz co vo platène rimplîye di gros toutchas
Délé èl tchèminéye. Toute èl nût, vos pinséyes,
Vos priyères ’stin.n’ pour li : pou l’ bon sint Nicolas.

Atôlè à vos d’vwèrs, c’ ’t-à pène s’on vwèt vo tièsse
Padrî lès tas d’ cayès, lîves èt tout l’ sint-frusquin ;
On n’ pout nén vos pârlér. Pour vous, asteûre, c’èst fièsse
Quand vos pouvèz r’nachî dins tous lès p’tits bouquins.

C’èst qu’ vos avèz grandi ! Adjeu tous les djuglâdjes,
Lès condjîs pou dès réns ; fôra d’mèrér ô sto.
Èl momint ’st-arivé di vos ârmér d’ courâdje
I fôra piyochî, trimér, buchî d’asto.

Tout âdje a sès pléjis. Èl vîye è-st-insi fète :
Èfant, o djouwe voltî ; pus târd c’èst lès tracas.
Pus vî, c’èst co ôte tchoûse… èt bén souvint o r’grète
Èl tans qu’o m’tout s’ chabot, l’ vèye dè Sint-Nicolas !