A mitan dès-annêyes cinqwante, li campagne Condrûze ni sonléve wêre aveûr candjî å long dès siékes. Èle dimoréve discôpèye a dôminnes èritîrs dè l’ colônizåcion rominne. Lès tchèstês avît djusse pris l’ plèce dès vilas èt lès Monsieurs l’ cisse dès r’djètons dès vîs sôdårs d’ a Cézar. Li tchèsse èsteût co todi l’ privilédje dès ritches èt l’ ratintot èsteût l’ neûre bièsse dès grands propriètères. Portant, dè djibî, ènn’ aveût a trûlêyes. Dès lîves, dès piètris, dès fèzants èt dès lapèns. Dès lapèns (li grîze pèsse po lès cinsîs), ènnè féve plin lès bwès èt lès tchamps. C’ èst qui lès trakteûrs èt lès pwèsons chimikes n’ avît nin co ataké a distrûre li vèye savadje… A l’ fin dès batowes, i gn-aveût dès cintinnes di pèces å tåvlè. Mins rin a veûy avou lès cisses d’ asteûre, wice qui lès grossès forteunes ègadjèt dès gårs inglès po fé s’ ènûler d’vant lès tèreûs dès mèyes di fèzants èt d’ canårds aklèvés d’vins dès trèyes. C’ èst qu’ on n’ veût må pus l’ neûre bètchète di l’ orèye d’ on lîve ou l’ pitite blanke cawe d’ on lapèn. Èt ça fêt ine bèle tchoke qui l’ piètri a disparètou, minme so lès tåves dès rèstorants.
Po l’ tchêsturlin, s’ batowe, c’ èsteût l’ grand djoû dè l’ såhon. Li djoû d’ l’ awous’ po s’ djibî. Awous’ qu’ i monne avou sès-amis èt wvèzins. Èt come po l’ frumint d’ sès frudjantès tères, li timps djovéve si rôle. Mins, qu’ i ploûse ou qu’ i lûse lès qwate solos, lès cis qu’ on n’ s’ ènnè poléve passer, c’ èsteût cès-omes, mandayes ou halcotîs, qui rotît tot dè long dè djoû å d’ triviès dès ronhis’, dès broûlîs èt lès basses tot fant dès brrrr, brrrrrr èt tokant lès bôrs avou leûs bastons po ‘nnè traker foû ploumes èt poyèdjes. Dès p’titès djins qui come leûs tåyes l’ avît fêt divant zèls, si crèvintît å chèrvice dès mêsses. Mins ça n’ èspètchîve nin d’ èsse dès-arèdjîs trakeûs qui n’ årît nin volou måker l’ batowe. A rèsse, li går èl sèpéve bin èt dismètant qu’ on chèrvéve li bourgogne a l’ tåve å tchêstê, li botèye di pèkèt passéve di boke a boke adlé lès trakeûs. L’ après nonne quéques-onks halcotît ‘ne miyète so leûs djambes èt, dè costé dès tèreûs, on flitchîve bråmint. Ci djoû-la, après lès treûs côps, come lès tchèsseûs, l’ fizik å lådje èt distchèrdi, s’ rassonlît, ine sakî vint l’zî dîre qu’ on trakeû aveût stou touwé. Tot l’ monde dimora ståmus’.
Pwis onk di zèls dimanda: « L’ a-t-on bin fêt pihî ?»[1]