1. Dëvant l' fièsse dë Pauque, Jésus saveût bén qu'il èsteût l'eûre qui d'veûve passer dë ç' monde-cë à s' Pére, èt lë, qu' aveût in.mé lès sénques qu'èstîne dins l' monde avou lë, i lès in.ma jësqu'à l' fén.
2. Dè timps qu'is sopîne (èt l' diâle aveût d'jà mètë dins l' keûr' d'à Judas l'Iscariote, fë d'à Sëmon, lë projèt dè l' livrér),
3. i saveût bén quë s' Pére li aveût tot r'mètë dins sès mwins èt qu'il èsteût v'në dè Bon Dië èt qu'il èraleûve addé l' Bon Dië.
4. Jésus së r'lèva dèl' tauve èt s' mèta è përète. I përda on linçou èt l'aloya autou d' sès rins.
5. Adon i vûda d' l'êwe dins one bassëne èt i s' mèta à r'lavér lès pîds d' sès scolis èt à lès r'souwer avou l' linçou qu'il aveût aloyi come one céntëre autou d' lë.
6. Il arëva 'dé Sëmon-Piére. Cët-cë li dët: "Sègneûr', twè, të m' vout lavér lès pîds?"
7. Jésus li rèsponda: "Cë quë dj' fais, të nè l' comprins ni asteûre, mins tè l' compëdrè pës taurd."
8. Piére li dët: "Non, jamais të n' më lavrè lès pîds." Jésus li rèsponda: "Së djë n' të lave ni, të n'arè pont d' paurt avou më."
9. Sëmon- Piére li dët: "Sègneûr', lave më ni seûlmint lès pîds, mins lès mwins èt l' tèsse."
10. Jésus li dët: "Lë cë qui vént dë s' bagni n'a ni dandji de s' fé lavér pësqu'il èst tot à fait prôpe. Vos-autes ossë vos èstoz dès r'nètîs, mins ni tortos."
11. I saveût d'èfèt, lë cë qui l'aleûve dènoncî. C'èst po ça qu'i dët: "Vos n'èstoz ni tortos bén r'nètîs."
12. Adon insë quand il a st-oyë lavé lès pîds, il a r'mètë s' frac', i s' rachid àl' tauve èt il zis dët: "Compêrdoz ç' quë djë v's a fait?
13. Vos m' louméz Maisse èt Sègneûr' èt vos avoz raison paçquë djë l'sos.
14. Së më, lë Sègneür' èt l' Maisse, djë v's a lavé lès pîds, vos-autes ossë vos d'voz v' lavér lès pîds lès onk' aus autes.
15. Paçquë c'èst on' ègzimpe quë djë v's a doné po qu' vos fiyoche come djë v's a fait.
16. Vraiy' dë vraiy', djë vos l' dis, i n'a pont d'èsclave pës grand quë s' maisse nè d' mèssadji pës grand quë l' cë qui l'avôye.
17. Conëchant tot ça, vos sèroz bén eûreûs së vos l' fëjos dins l' pratëque.
18. Cë n'èst ni d' tortos quë dj' dës ça; djë conès lès cës qu' dj'a tchwèsë; mins c' èst po qu' lë Scrijadje seûy' rèspèctë: lë cë qui mougne më pwin a r'lèvé s' talon conte më.
19. Dèdjà asteûre djë vos l' dës avant qu' ça n'arëve, po quë, quand ça serè arëvé, vos crwèyoche qui quë dj' sos.
20. Vraiy' dë vraiy', djë vos l' dës: n'émpôrte qui qui r'çût l' cë qu' dj'arè st-avôyi, i m'rëçût et n'émpôrte qui qui m' rëçût, i r'çût l' cë qui m'a st-avôyi."
21. Après oyë causé insë, Jésus a sti mouwé dins s't-èsprët èt i fëja ç' dèclarâcion-cë: "Vraiy' dë vraiy', djë vos l' dës: onk' dë vos-autes më va r'vinde."
22. Lès scolis s' rawaitîne l'onk' l'aute, is n' savîne ni d' qui qu'i causeûve.
23. On scoli, l' cë qu' Jésus vèyeûve volti, èsteût atauvlé à stoc' dë Jésus
24. èt Sëmon-Piére li fait on sëgne èt li dët: "D'mande li po l' quénque est-ce qu'i cause?
25. Lë cë d'abôrd qu'èsteût al' tauve addé lë, li d'manda: "Sègneûr', qui èst-ce?"
26. Jésus rèsponda: "C'èst l' cë po qui quë dj' va trimpér on bokèt d' pwin èt à qui qu' djè l' dôrè." I përda on bokèt d' pwin, il trimpa èt l 'dona à Judas, lë fë d'à Sëmon d 'mon l'Escariote.
27. Et après l' bokèt, c'èst' à ç' momint-là qu' Satan intra dins lë. Jésus li dët don: "Cë qu' t'as'-t-à fé, fais l' abiye."
28. Mins nëk' dès invëtés n'a comprins à quén propôs qu' il aveût dët çà.
29. Come Judas tëneûve lë bousse, saqwant pinsîne quë Jésus li djeûve: "Achtèye cë qu' nos avons dandjî pol l' fièsse ou d' donér one saqwè po lès pauves."
30. Ossë rade qu'il a st-oyë prins l' bokèt, Judas a sôrtë. Lë nêt èsteût touméye.
31. Quand Judas a sti èvôye, Jésus dët: "Asteüre lë Fë d' l'ome a sti glorifiyî, èt l' Bon Dië a sti glorifiyî dins lë.
32. Së l’ Bon Dië a stî vanté insë, l’ Bon Dië l’ vanterè èto lë minme èt l’ fé bén rade.
33. Mès p’tëts-èfant, djë n’a pës waire de timps à passer avou vos-ôtes. Vos cacheroz à m’ rëveûy, come djë l’a prétchî aus Jwifs : « Vos n’ p’loz ni v’nu èwou quë dj’ va, djë vos l’ rèpète asteûre. »
34. Volà on novia comand'mint: quë vos v's in.moche lès onk' lès autes.
35. C'èst' insë qu' tortos saront quë vos èstoz mès scolis, së vos avoz d' l'amour' lès onk' po lès autes."
36. Sëmon-Piére li dët: "Sègneû', où 'n' è vas'?" Jésus rèsponda: "Où ç' quë dj'va, të n' më pous sûre asteûre, mins të m' sûrès pës taurd."
37. Piére li dët: "Sègneûr, poqwè n' pous-dj ni t' sûre asteûre? Djë dôrè m' viye por twè."
38. Jésus rèsponda: "Të dôrès t' vîye por më? Vraiy' dë vraiy', dj'ë tè l' dës, lë coq' n'arè ni co tchanté quë t' m'arès d'jà r'nôyi trwès côps."