1. Vraiy' dë vraiy', djë vos l' dës: lë cë quë n'intëre ni pa l' ëche dins l' pré dès bèrbës,
2. mins qui ascauche lë clotëre pa out' pau, cët-là èst'on voleûr èt on brëgand;
3. mins l' cë qu'intêre pa l'ëche, c'èst l' bèrdjî dès bèrbës. C'èst' à cët-là qu'on drove l'ëche, èt lès bèrbës intindnèt s' vwè, èt i loume sès bèrbës pa leû nom èt i lès boure fou d' lë stau.
4. Quand i lès a fé v'në tortotes, i rote dëvant zèles èt lès bèrbës l' paçqu'èlès conëchnèt së vwë.
5. Eles në sûront ni on' ètrangér', mins èles bëzront lon èri d' lë, paçqu'èles në conèchnèt ni l' vwè dès ètrangér'."
6. Jésus l'zis raconta ç' fauve-là, mins zèls n'ont ni comprins dë d'qwè qu'i l'zis causeûve.
7. Adon Jésus a r'prins: " Vraiy' dë vraiy', djë vos l' dës: Djë sos l'ëche dès bèrbès.
8. Tos lès cës quë sont v'nës d'vant më, c'èst dès voleûrs èt dès brëgands; mins lès bèrbës n' lès ont ni chouté.
9. Djë sos l'ëche. Së one saquë intêre par më, i sèrè êti èt chapé; il intërrè èt i vèrè fou èt i trovrè dès pachës.
10. Lë voleûr' në vént qu' po apér, côpér l' gazi èt dëstrûre. Më, djë sos v'në po qu'on z-ôye lë vîye èt one vîye d'abondance."
11. Djë sos l' bon bèrdjî. Lë bon bèrdjî done së vîye po lès bèrbës.
12. Lë pwartchî, i n'èst ni bèrdjî èt lès bèrbës n' sont ni d'à lë; s'ë veût l' leûp arëvér, il abandone lë tropia èt i pète èvôye; èt l' leûp prind dès bèrbës èt il ésbare lès autes;
13. c'èst paçqu'il èst pwartchî èt qu'i n'a këre dès bèrbës.
14. Djë sos l' bon bèrdjî èt djë conè mès bèrbës èt mès bèrbës më conëchnèt,
15. come më Pére më conèt èt djë conès m' Pére. Et djë done më vîye po mès bèrbës.
16. Et dj'a dès autès bèrbës qui n' sont ni dè troupia; cès-t-làl ossë, i faut quë dj' lès amëne èt èles intindront m' vwè èt i n'arè pës qu'on seûl troupia èt qu'on seûl bèrdjî.
17. C'èst po ça quë m' Pére m'in.me, paçquë dj' done mi vîye po l' rëprinde.
18. Pèrsôn.ne në m' l'a pris mins djè l' done dë më-min.me. Dj'a l' pouvwèr de l' donér_èt dj'a l' pouvwèr de l' rëprinde: volà insë l' comandmant qu' dj'a r'çû dë m' Pére".
19. Cor' on côp, lès Jwifs n'ont ni sti d'acôrd à cause dë cès paroles-là.
20. Branmint dë d'zèls dëjîne: "On démon èst maîsse dë d'lë èt i cause au d'fou èt au-d'dins, poqwè l' choutéz?"
21. Dès autres dëjîne: "Cès paroles-là n' sont ni d'onk quë l' démon èst s' maisse; èst-ce qu'on démon pout drovë lès ouy' dès aveûles?"
22. Adon arëva l' dëcauce à Jérusalèm: c'èsteût l'ëvièr
23. èt Jésus aleûve èt v'neûve dins l' Temple padzos l' portique da Salomon.
24. Lès Jwifs l'ètourîne èt li d'jîne: "Jësqu'à quand têrès' nost-âme sospindouwe ? Së t'ès l' Christ, dës nos l' bén clérëmint."
25. Jésus l'zis rèsponda:" Djë vos l'a dët èt vos n' më crwèyoz nî: lès ovradjes quë dj' fais po l' nom dë m' Pére, c'èst zèls qui tèmwègnèt por më:
26. mins vos n' crwèyoz ni, paçquë vos n'èstoz ni dès bèrbës d'à më.
27. Mès bèrbës intind'nèt m'vwè èt djë lès conès èt èles më sûvnèt
28. èt djë l'zis done one vîye ètèrnèle èt èlès në pèrëchront jamais, èt pèrsôn.ne në lès sètchrè fou dë m'mwin.
29. Më Pére, cë qu'i m'a d'né vaut d'pës qu' tot, èt pèrsôn.ne nè l' pout r'sètchî dèl mwin dë m' Pére.
30. Më èt m' Pére, nos n'èstons qu'onk'."
31. Lès Jwifs ont cor' on côp apwarté dès pires po lès li later.
32. Jésus l'zis rèsponda: " Djë vos a mostré branmint dès bons ovradjes qui m' vënîne dë m' Pére. Po l'quénque dë cès ovradjes-là më latéz dès pîres?"
33. Lès Jwifs li rèspondîre: "C' n'èst ni por on bon ovradje quë nos t' latons dès pîres, mins c'èst por' on blasfème, èt paçquë, èstant on ome, të t' fais l' Bon Dië."
34. Jésus l'zis rèsponda: "N'èst-ce-t'ë ni scrit dins lë lwè: Dj 'a dët: Vos èstoz dès diës?
35. Së èle a d'né lë nom dë diës à lès cës aus quénques lë parole dè Bon Dië a sti adrèssîye èt së lë Scrijadje në pout èsse bôré
36. à l' cë quë l' Pére a consacré èt avôyi dins l' monde, vos djoz: Të jëre on blasfème paçque dj'a dët: djë sos Fë dè Bon Dië?
37. Së djë n' fais ni lès ovradjes dë m' Pére, në m' crwèyoz ni;
38. mins së dj' lès fais, min.me së vos n' më crwèryiz ni, crwèyoz à mès ovradjes po qu' vos soyoche èt qu' vos conëchoche quë m' Pére èst' au d'dins d' më èt quë dj' sos au d'dins dë m' Pére."
39. Is ont cor on côp sayi d' l'atrapér, mins i bëza fou d' leûs mwins.
40. Et il èn' ala cor on côp d' l'aute costé dè Jourdain, à l' place oùçquë Djan aveût c'mincî à batëjî, èt i d'mèreûve là.
41. Branmint ont v'në 'dé lë èt is d'jîne: "Djan n'a fait në mërauke, mins tot ç' qu'il aveût dët d' cët' cë, c'èsteût l' vraiy'."
42. Et là, branmint ont crwèyë dins lë.