In sumeçon d' fûr
Qui fwait[1] ène amantchûre
Dins vôs bèles croles;
Ratèdèz qu' dju l' duscole !
Ène roudje capiche
Qu'astot d'zous, qui ramiche
Dins vôs nwâres trèsses;
Ratèdèz qu' dju la k'tchèsse !
Fèle come ène flèche,
D'in côp v'-la-la zouplêye
Dins vosse gavêye;
Ratèdèz qu' dju l'î r'pèche !
Èle m'è chipé
Fû des mwins, s'è stiké
Dins vosse longûye mantche;[2]
Ratèdèz, dj' la dusmantche !
V'-la-là qui mousse
D'zous vosse combinaîson
Dins vosse djèron;
Ratèdèz qu' dju v' dusmousse !
Pus qu' vôs sokètes
Pou lî fére ène catchète;
Peûr qu' èle nu s'î r'tire
Ratèdèz qu' dju v' lès tire !
Gn-è ène bèle fleûr
Au mitan du ç' qu' i d'meûre;
Peûr qu' èle nu s'î rmète,
Ratèdèz qu' dju v' la cwède !
Pitite capiche
Qui grèvisse èt ramiche,
Vins co t'î tchonker !
C'èst twè qui fwait l' pèché.
Modêye aprestêye po ene ramexhnêye di tecses « Lu cé qui n'è qu'in toûr nu vike qu'in djoûr » djamåy eplaideye.