— Tu t’ souvins co bin comint ç’ quu la môye du faude èst montêye, hê, Firmin ?
— Tais’ qu’ây, don ! Èlle èst come rafachêye avu dul fine tère, dès fouyes, dès mousserês èt dès wazons; i gn-è d’meûre jusse lu trô du l' tchuminêye ou d'zeûs, èt lès drovoûs s' lu d’zous.
— Jusse, Augusse ! Tu saurès qu’on f’jot souvint deûs rîlêyes du drovoûs, yène ou rès’ du tère, èt yène à cinquante, swassante çantimètes du hôt. Duvant d’ mète la faude a feû, i gn-avot dandjî d’ la garanti du t’tautoû avu quèques hâyons fwaîts avu du strin èt dès coches; ç'astot pou l’ tiradje n’ nin z-èsse cabroûyé ca bin qu'il aurot fwaît dul grande aîr. Adon, la hôte faude astot fine prète; i gn-avot pus qu’à z-alumer lu r’naud. Lu r’naud, ç’astot dès p’tites chinètes rucèpêyes a bwès du stûve, qu’on f’jot in p’tit feû avu su l' costé. Quand ça braj’not, on purnot ène choûplêye du flamerons, on montot avu d’ssu la chaule qu’astot astotchêye suconte du l’ môye èt on voûdot lès brèjes ou fond du l’ tchuminêye. Ça f'jot ène volêye du spitrons. Pîs après, on rac’mèçot: ène choûplêye du bréjes, pîs ène brèssêye du p’tits sètch bwès du stûfe. Pîs tu ravos dès bréjes, jusqu’à tant qu’ la tch’minêye sôye bonrêye a houpe. On lèyot prinde lu feû, qui d’vot gangner tout bê doûcemint lès fagots, pîs lès bwès; à ç’ moumint-la i gn-avot co du tiradje. Timps du l’ prèmire djoûrnêye, il astot d’ quèstion d’ wèter à s’n-ovradje à deûs côps. Si la faude fumot blanc, ç’astot l’ bon; maîs quand la fumîre qui rèchot fû dès drovoûs duv’not bleûe, c’èst quu l’ feû alot trop rèd. Min.me quu pa dès côps, la faude trawot, èt l' feû passot oûte du r’catchadje. Dj’auros volu qu’ t’auros veû adon nôs faudeûs dârer abiye abiye pou r’sutoper l’ trô èt r’clôre lès drovoûs. « Vivemint la fin du l' vèsprêye, pinsint-is dandjereûs, quu dj’ rastrindinche lu tiradje a r’bouchant la tch’minêye ». Pou ca, i falot dul fine tère passêye à l’ passète. Lu cé qui montot s’ la môye avot toudi dès sabots d’ bwès à sès pids. I staurot la fine tère su la gueûye du l’ tchuminêye, èt il è rustramot ène coûtche pattavau. Ç’astot ça qu’on loumot l’ fâ.in. Avu la môye ravôtchêye inlà, is p’lint toudi ‘nn’ aler coûtcher tranquile. La cûtêye astot bin vôye.
— Èt quant’ djoûs qu’is la lèyint brûler, insi ?
— D’jans: cinq chîs djoûs pou lès p’tites môyes du 25 cwâdes, jusqu’à quinze djoûs pou lès grosses du 75 cwâdes. À fwait quu l’ cûjadje avançot, la môye rap’titichot èt s’ su ratasselot ; ça duv’not ène basse faude, nin pus hôte quu in mète cinquante, deûs mètes. C’èst toudi lès lits du d’zeûs qui toûrnèt lès prèmîs a tchèrbon. Lu faudeûs l’ sintot a stikant dins la môye ène pique du fièr qui s’amantchot après l’ mantche du l' choûpe, èt qu’on loumot l’ fichot.
Adon, i purdot in gros pachon d’ piêtche, lu fourgon. I fourguinot dins la môye pou r’fer dès trôs du d'zeûs ou d’zous, pou fer ravaler l’ feû jusqu’ou prèmi lit. C’èst pou ça qu’ cès trôs-là, on lès loumot lès-avaloûs.
- Comint ç’ qu’is dustindint la faude ?
- Quand ç’astot s' la fin du cûjadje, on rustopot tous lès trôs, drovoûs èt avaloûs tout parèy, èt on ratèdot co 24 eûres pou la cûtêye polu rafrèdi, Adon, s’i n’ pluvot nin, on p’lot duscatcher. On ratchot l’ fâ.in djus du l’ môye pîs on r’lîjot lès bokèts d’ tchèrbon avu l' havèt. T’avos lès bês bokèts, lès pièrdons, qui n’avint quausu nin sté adusés pou feû; tu ravos lès èrsins, ç’astot du tchèrbon mau fini; èt, a l' fin, t’avos lès bréjètes, dès p’tits bokèts qui s’avint dusmantché, û qui prov’nint dès cochètes èt dès p’tits bwès… Pou vèy si t’ cûjadje avot bin rèyussi, tu purnos in bokèt d’ bê tchèrbon èt tu l' câssos a deûs. S’i sclatichot bin frantchemint a f’jant in bê-z-èt clér brut, ç’astot signe quu ç’astot du bon. Çu côp-là, s’i s’ supiyot a mile bokèts, c’èst qu’ çu ‘nn’ astot rin.
- A vost’ idêye, qu’èst-ç’ qu’ène môye rindot come tchèrbon d’ bwès ?
- T’avos du côp mile à quinze çant kilos pou ène môye du cinquante cwâdes, là. Si t’ comptes pa l' grocheûr, t’avos deûs bèrwètêyes du tchèrbon pou trwâs bèrwètêyes du bwès. Ca n’ rindot nin co si mau qu’ ça, don.
- Èt qu’èst-ç’ qu’on z-è f'jot, in côp qu’il avot sté r’lî ?
- Â! Dins l’ timps, quand ç’astot pou mon.ner aus fwâdjes èt aus fornês, on l' tchèriot vôye a fwaît dins lès bènes quu dju t’ dijos èrsè. Tu sé bin qu’on l’ mon.not pa dès côps bin lon. Lès Gaumais lu v’nint quê pou leûs fwâdjerîes jusqu’à oûte du Sint Yubèrt, dins lès Frèyîrs. Pîs après, quand lès fwâdjes n’unn’ ont pus yu dandjî, on l’assatchelot èt on l’alot vinde a l’ vile à cinq francs du kilo - dju t’ cause du-d-vè 48, 49. In moumint d’né, ç’astot r’quèru come dul manôye du pâpe. C’èst paç’ quu ça brûlot sins pont fer d’ odeur ni d’ fumîre…
Quand on z-avot tiré lès bês bokèts, on r'poûjot dins lès brèjètes avu la fon.ne à douze dints. On lès ramèchenot sôye-t-i dins dès satch à paurt, sôye-t-i dins ène hutche qu’astot adjokêye su in bèrgat. Çu hutche-là, ç’astot come ène grande cârêye banse avu ène coviète, fwaîte avu d' l’ôzîre trèss’lêye. Ele tunot su lès rizèles du bèrgat. On choûplot lu p’tit tchèrbon d’dins, pou ramon.ner a l' maujon pou z-atununu l’ feû a l’ chîje, û pou mète dins lès fiêrs à rustinde, û dins dès vîes lantchênes. Maugrè tout, i d’mèrot toudi dul cène su lès—aires du faude. Pen l' faudeûs, ç’astot dul piête; c'èst pou ca qu’i falot wêter du n’nin mète dès trop p’tites brantches à l’ cûtêye. C’èst ç’ chouve-là qu’ è duv’nu la nwâre tère qu’on va co bin quê dins lès bwès pou mète dins lès pots d’ fleûrs. Lès places qu'on la troûve, c’èst co souvint dès-anciènes-aîres du faude.
— On n’ è fwaît puche asteûre, du tchèrbon d' bwès? Dju m’ dumande toudi bin pouqwè ç’ quu ç’t-industrîe-là è toûrné à rin ?
— On n’è nin arèté d'in plin côp. On ‘nn’ è r'fwaît timps du l' guêre, maîs ç’ côp-là, ç’astot dèdjà avu in for avu ène coviète du tole. Quand i fumot bleû. on l’ p'lot r'tchèrdjer. Adon, i gn-avot yink avu dès sabots d’ bwès qui montot d’ssu la môye pou bouter la calote du tole fû. Les cés qu’ aturpurnint ç’t—ovradje—là, il astint d’djà mî montés, il avint d’djà tout-èn-atiray. Is purnint dès djins du viadje pou travayer du tayeûs, du r'findeûs û du bèrwèteûs. Is l’zî d’nint 150 francs du l' djoûrnêye — dju t’ cause du jusse après la guère, quand l’ pwin coustot à pô près dîje francs du kilo. D’jans qu’ deûs bons-ovrîs p’lint monter yinkû qu’ c’èst deûs fors su in djoû. Lu gangnadje astot toudi mèyeûr qu’ après l' ôte guêre. A ç' moumint-là, is touchint tout bonemint 40, 50 sous du l’ djoûrnêye.
— Et asteûre, on n'è pus dandî d’ tchèrbon d’ bwès ?
— Probâbe quu siè ! Rin d'djà qu’ pou lès grèyêyes quu dju t’ dijos èrsè; èt ossi come mèdicamint pou la chite, ca l' tchèrbon, ça rassère. Maîs dandjereûs qu'ènut′, on l'apwète du l’ètranjér’, ca i gn-è pus nolu qui vêrot passer s' timps à ça avaurci. Lès timps ont bin tchandjé, va. On n’ saurot toudi pus viker la vicaîrrîye du—d-dins l' timps. Nous-ôtes tout parèy, sès’… Pourtant, i gn-è co brâmint dès payis û ç’ quu lès p’tites djins sont mou binaujes du fer d’ l'ovradje du morê pou polu gangner quate sous…
— Et qu’èst-ç’ qu’ is f'jint co d'ôte pou yauk dins lès bwès du-d-dins l' timps ?
— I gn-è pont d’ fin d’ t’awèr ou lit, ènut′ don, twè! Alêz là, rumoûwe-t’! Il èst timps d'aler fer chlop, di-st-i l' Lîdjeûs.