I m’ chène què dj’intind dès pas d’ssus l′ pavè.
Piane-piane, piane-piane… Ça soune dins 1′ djèléye !
On intind dès pas djumi d’ssus l′ pavè.
Piane-piane, piane-piane… Què l’vîye est fayéye !
C’èst potète lès pas d’ène poûve vièye grand-mé.
Piane-piane, piane-piane…
Come is sont rèyus’ !
D-alez l’assister ? — Mès sét-on jamés
(piane-piane, piane-piane)
d’ssus qué tch’min au djusse?
I gn-a tant d’ pavès
qui vièn’t-èt qui vont,
qui tindetèt leûs mangns
à tous lès vilâdjes.
Quand vos-ariverèz,
ça s’ra co si long
qu’ vos-arèz, d’ m’in.mangne,
rade pièrdu corâdje.
I m’ chène què dj’intind dès pas d’ssus l’pavè.
Piane-piane, piane-piane…
Ça soune dins l’ djèléye !
On intind dès pas djumi d’ssus 1′ pavè.
Piane-piane, piane-piane…
Què l’vîye est fayéye !
I gn-a pourtant nîn tant dès pavès qu’ ça ?
Piane-piane, piane-piane…
I gn-a què l’dwate route !
Vos n’ vos pièrdrèz nîn ! Vos r’trouverèz lès pas !
Piane-piane, piane-piane !
Vo consyince ascoute.
Mès dèspéchèz-vous !
C’èst potète trop târd!
Coupèz pa l’piè-sinte
pou rascourci l’voye.
Mès dèspéchèz-vous !
C’èst potète trop târd !
On mwêrt sins qu’on l’sinte :
èl vîye èst rade voye.
Au d’bout du pavè, l’cloke soune à trépas.
Piane-piane, piane-piane
pa t’t-avau l’djèléye !
D’au d’bout du pavè, r’toûrnèz d’ssus vos pas…
Piane-piane, piane-piane…
Què l’vîye èst fayéye !
Èl consyince (antolodjeye Piron)
El consyince
rortografiaedje da Maurice Piron
Antolodjeye Piron,
El consyince
Note Wikisourd