I m’ chène què dj'intind dès pas d'su l' pavè.
Pian', pian', pian' pian' !
Ça soune dins l’ djèléye !
On intind dès pas djumi d'su l'pavè.
Pian', pian', pian' pian' !
Què l’ vîye èst fayéye !
C’èst potète lès pas d'ène poûve vièye grand-mé !
Pian', pian', pian' pian' !
Come is sont rèyus' !
Dalér l’s-assistér ? - Mès, sét-on jamés…
Pian', pian', pian' pian' !
D’su qué tch'min ô djusse ?
I gn-a tant d' pavès
qui vièn't-èt qui vont !
Qui tind'tè leûs mangn'
a tous lès vilâdjes !
Quand vos-ariv'rèz,
ça s’ra co si lon
qu’ vos-ârèz dins m' mangn'
râde pièrdu corâdje !
I m’ chène què dj'intind dès pas d'su l' pavè.
Pian', pian', pian' pian' !
Ça soune dins l’ djèléye !
On intind dès pas djumi d'su l'pavè.
Pian', pian', pian' pian' !
Què l’ vîye èst fayéye !
I gn-a pourtant nîⁿ tant dès pavès qu' ça !
Pian', pian', pian' pian' !
I gn-a k’ dèl dwate route.
Vos n’ vos pièrdrèz nîⁿ, vos r'trouvérèz lès pas.
Vosse consyince ascoute,
mès dèspéchèz vous,
c’èst potète trop târd !
Courez pa l' pièssinte
Pou rascourci l' voye !
Mès dèspéchèz vous,
c’èst potète trop târd !
On mwért sans qu'on l' sinte,
èl vîye èst râde voye.
Ô d'bout du pavé, l’ cloke soune a trépas.
Pian', pian', pian', pian' !
pa t’t-avô l’ djèléye.
D'ô d'bout du pavè, r'tournèz d'su vos pas !
Pian', pian', pian', pian' !
Què l' vîye èst fayéye !
Ortografeye di l' antolodjeye « Vint-cénk escrijheus e walon ås deus Inne » (2018). Boket rprins do « Moxhon d' Ônea » do moes d' måss 1932.
« d'su » a stî erîlé insi (sovint scrît a deus mots « d'‿su » dins l' eplaidaedje 2018.