Ås troes vîs omes, camaeråde Rawoul

Èn årtike di Wikisource.
Ciste ouve ci egzistêye eto divins ds ôtès ortografeyes : Mwaisse sicrijhaedje.
Ås troes vîs omes, camaeråde Rawoul
Li Rantoele,  97,

Tos les Bedjes el kinoxhnut, nosse Rawoul. Cist ome la, il est l’ poite-messaedje do PBB (Pårti do Boutaedje Bedje) (ci n’ est nén l’ prezidint do pårti, on posse tinou pa Peter Mertens).

Ås troes vîs omes, camaeråde Rawoul

Ci pårti la, dinltins, c’ esteut des marcsisses. Mins, avou l’ tins, il ont divnou seulmint des sopoirteus d’ ene democraceye comunisse.

Noveas politikîs

Houte di çoula, nos PBB-isses disfindnut deus ôtès idêyes : (1) l’ ecolodjeye politike eyet (2) ene Beldjike bedje, dj’ ô bén sins trepådje etur les Brusselwès, les Flaminds, les Tîxhons-cåzants eyet les Walons.

Nosse Rawoul, c’ est ene djin foirt enondiveuse come des ôtes noveas politikîs come Georges-Louis Bouchez ubén Tom Van Grieken.

Leus idêyes del Beldjike

Mins i m’ shonne ki l’ camaeråde Rawoul ‒ tot volant dmani amiståve avou lu ‒ ni comprind nén l’ Beldjike.

Po cmincî, el Beldjike, c’ est on payis, mins ci n’ est nén ene nåcion.

Come d’ efet, nosse payis est pårti a troes : li Flande, li Walonreye eyet l’ Coron-Estat d’ Brussele.

Vos n’ avoz k’ a rwaitî les vôtaedjes di 2019. 40 åcint di nos vijhéns d’ Bijhe avént vôté po des pårtis wårdiveus (conservatisses) eyet flamingants. Årvierdimint, e l’ Walonreye, les djins ont vôté po des pårtis todi pus gåtchisses eyet ecolodjisses. Minme si l’ « pévédéya » ‒ el no do PBB e neyerlandès ‒ a ramassé kékes vwès e l’ Flande, ci n’ est nén a rmete azès cenes k’ el PBB a ragregnî e l’ Walonreye.

Houte di çoula, ci pårti la n’ est nén prezint a Neyåw et tchik et tchak.

Adon-pwis, li PBB est mierseu dins s’ cogne.

Eviè Nonne, li PS ey Ecolo avént yeu meyeu do fé on govienmint avou les liberås (MR). Portant, Raoul Hedebouw ni s’ aveut djamåy håyné di caegn eviè les socialisses, ni pår eviè les ecolodjisses. Do costé do « Noer Liyon » (e l’ Flande), el pårti del foite gåtche est ossu ptit k’ Hestape. Ça fwait : i n’ a pont d’ tchance di trover èn aloyî.

Cwand on rlouke å livea federå, les socialisses eyet les ecolodjisses des deus costés n’ ont nén cachî après des camaerådes. I fåt dire k’ c’ esteut pus målåjhey po-z awè septante-shijh plaeces so les cint-céncwante disponibes. Il åreut falou aveur l’ aidance des catolikes flaminds et walons (k’ on lome asteure « umanisses »). Mins, c’ est ki : les deus pårtis orandjes sont cwand minme foirt lon di l’ ideyolodjeye disfindowe på nosse camaeråde Raoul Hedebouw ey ès binde.

Motoit bén ki dji m’ va repeter, mins l’ abayeye (ipoteze) d’ on stocaesse avni po nosse pôve Beldjike mi shonne mo flåwe. Nén seulmint å livea del nåcion, des vôtaedjes eyet des aloyances politikes, mins eto å livea del tcherpinte då pårti comunisse. Dins l’ S.D.N.2 d’ èç pårti la ‒ dji vs cåze do ci do Rawoul ‒, li Beldjike est foirt enancrêye. On rtrove ci clintcha la (1) avou les Liberås Democrates (LD) ancyinnmint « Lisse Destexhe », ki vout yesse li N-VA francès-cåzant yet beldjamiståve ; (2) avou li Pårti do Peupe ‒ k’ aveut stî askepyî på Mischael Modrikamen e 2009 ki l’ a dismantchî, dijh ans pus tård, cwand il a yeu fwait berwete.

Li Pårti do Peupe, c’ est del minme caire ki les Liberås Democrates (djuse ki, tenawete, ci-ci est moens populisse).

Nosse Mischael Modrikamen voleut, sapinse a lu, candjî l’ Beldjike, mins foiravant li Walonreye yet Brussele.

Cist ome la a-st ene avuzion ene miete beldjikinne, cabén ki s’ pårti ‒ tins k’ il esteut co vicant ‒ n’ a måy sitou prezint e l’ Flande.

Cisse flotche la da Modrikamen (croere a l’ unité del Beldjike sins aveur di respondant e l’ Flande), dji pinse ki Raoul Hedebouw è fwait l’ minme. Douvént ? Kécfeye paski c’ est on Lidjwès avou on stok di famile flamind. Sifwaitmint, n a mwints ôtes mimbes do PBB ki c’ est des Flaminds ki boutnut e Walonreye et tchik et tchak. Paregzimpe, Sofie Merckx, ene doctoresse d’ Anverse k’ overe e Tchålerwè u co Germain Mugemangango, on Brusler ki vike dins l’ 6000.

Note Wikisourd

eplaidî aprume sol waibe Beletristica li 11 di nôvimbe 2020