I gn avot st on kon…
Dj'asto avu mi camaråde Khadija dins leu maujon. Et pu, moman a vnu m' kèri.
Li londmwin, on a stî — mi, moman, et Khadija — po visiter ene veye. Zês, il ont stî atchter des mousmints tins k' mi, dj'a volu prinde yauk a magnî.
En ruvnant, moman m'a dit di nnaler, mi et Khadija, å trin po l' rascontrer dins ene ôte veye. Quand on a arivé, on kèrot après moman, et a l' fin, on l'a trovu. Ele nos a dit k'ele alot nnaler kéke pårt, et après, on n' l' a pus måy rascontré.
Après, dj'a veyu mes camarades du m' classe. Tins ki dj' cåso avu zês, dj'a veyu ki les djin s' batint après l'amindjî. On vlot schaper, mins dji m'a sovnu ki dj'avo atchté di l'amagnî, et ki dji l'avo rovié dins l' trin.
Adon dj'a dit aus camarådes di m' ratinde li tins ki dj' vache kèri di l'amagnî. Cwand dj'a ruvnu, dj'a oyu ki tot l'amindjî avot disparu d'in plin côp et k' les djins divnint fôs après. Adon, on a decidé di reche du ç' veye ci. Paski, si on n' rechot nin pol moumint, li minêye alot s'alaurdji et on n' rechreut måy.
Ça fwêt ki : nos avans cmincé a roter et a roter tote ene djournêye. Mins au pus lon k'on nnalot, ç'astot fin parey: pont d'amagnî a trover.
Li timps passot et il a cmincé a fére nute. Et nozôtes k'astint todi pus hodés.
Dj'alins dwarmu mins i falot ki deus d' nozôtes fijinche li gârde timps k' les ôtes dwarmint.
Cwand on s'a dispierté, i gn aveut ene oto avu treus djins: li pere a vnu m' causer et dire k'il astint pierdus. Mins mi, dji savo k'i volot djusse apicer l'amagnî k' dj'avo. Adon, dj'a fwêt in signe a mes camarådes di nnaler et mi dner mi satch å dos. Et pu, on a skifté evoye en courant.
A in moumint dné, dj' a veyu ene tazouta et dj'a dit a mes soçons di mousser d'dins.
Cwand on î a moussé, on a magnî ene miete mins i gn avot pont d' êwe. Adon, i falot si rispoiser ene miete po nnaler kèri après d' l'êwe. En rèchant dul tazouta, dj'a veyu èn ome ki vnot dé nozôtes. I nos a apicé et i nos a dit : « vos v' rapler do fim k'a passé å cinema li mierkidi ? Dji va vos touwer dul minme manire. »
A ç' moumint la, tortos ont skifté evoye. Tchèkin alot di s' costé tot seu et parey por mi. Mins ci ome la a decidé du m' chûre et laicher les ôte. On a coru et coru djuska tant k'on a arivé dins des tributs ki magnént les djins.
Cwand dji m'a rtourné, dj'a veyu ki l'ome ki m' chûvot, il avot stî pris pa ene famile por zês l' magnî.
Dj'asto hodêye et dji volo m' ruspoiser. Adon, i falot kèri après ene maujon k'on n' plot mau. Dj'a trouvu ene famile avu ene feye, si fré et si mame. Dji lzî a dit : « eski dji pôro bin nmeurer avu vozôtes ? » Ele m'a dit k'ây. Mins il ont divni foirt biesses et cmincer a dire leu-z idêye tot hôt. Insi, ele dijot dins ses idêyes : « bin dimeurez don ! vos alez esse nosse marinde enute. »
Après ça, dj'a seu ki dji n' pôro nin dmeurer la et dj'a dit ki dj'alo ruvni après ene eure. Et pu, dj'a cmincé a coru mins dji wèyo ki dji rvino al minme place minme si dji couro.
En courant insi, les magneus d' djin, i m'ont apicé, et m'ont tapé a costé di l'ome ki corot après mi. I m'ont tapé, mi et li, al tere a costé d'ene aiwe a setch. Adon dj'a schapé en duchindant dins ci êwe la, et dj'a pris in baston d' fier ki dj'a veyu la, po m' disfinde.
En nnalant, dj'a veyu deus blancs, frere et seur. Dji lzî a dit: « eski vos magnez les djins ? » I m'ont dit k'ây. Dj'a respondu: « i n' faurot nin les magnî, sinon vos srez magnîs vozôtes ossi. »
Et on a sayî di s' schaper di ç' veye la.
Mins l' tchôcmwâr astot foû, ca dji m'a dispierté a ç' moumint la.