Wikisourd:Depot/Lucyin/Li niyèye

Racsegnes sol tecse metou dvins l’ depot

Tite	Li niyèye
Oteur	o.n.c.
Date do scrijhaedje (do ratournaedje, do rortografiaedje, evnd.)	?
Date d’ eplaidaedje (so Wikisourd)	5 d’ avri 2021
Depôzitaire	Lucyin
Info	rortografiaedje da Joseph Docquier, e Feller ; l’ oridjinå n’ est nén cnoxhou

Li niyèye

I.

On djoûr, li p’tit Djan-Pière
Trova-st-on nid d’ oûhê,
Trova-st-on nid d’ oûhê catchî dins lès lières…
I fout tot djoyeû di vèy ki gn’ avût
Kwate djônes dès pus vîgreûs  !

II.

Po rinde si djôye ètîre
Li gamin purda l’ nid,
Li gamin purda l’ nid po l’ mète è s’ volîre.
Ḉoula fé, li capon pinda s’ prîhon
Adrî l’ oûche di s’ pignon.

III.

On vèya eune drole d’ afère  !
Père èt mère dès mioches,
Père èt mère dès mioches ni târdint sûr wère
D’ apwèrtî li bètchèye âs p’tits
Ki fourint tot rapâchtis  !

IV.

Çoula dura eune hapîye,
Si bin k’ lès djônes volît,
Si bin k’ lès djônes volît kwand k’ eune matinèye,
Li gamin hapa, d’ on seûl côp d’ hèrna,
Leû mame èt leû papa.

V.

I lî vin-st-a l’ idèye
Di lachî tos lès p’tits,
Di lachî tos lès p’tits po vèy s-is frint parèy,
Parèy ki lès vîs k’ is-lz-ont nouris
Sins mâye elzè roûvyî  !

VI.

Et lès djônes dèl niyèye
Co jamê ni sont riv’nis,
Co jamê ni sont riv’nis fé eune pitite toûrnîye
Po vèy leûs parints k’ ârint mori d’ fin,
Sins li scoûrs do gamin.

VII.

Amon lès djins, c’ èst l’ mîn.me :
On s’ sacrifîye voltî,
On s’ sacrifîye voltî po lès èfants k’ on z-ême :
Et portant, i gn’a cobin dès cès
Ki ravizèt lès p’tits oûhès  !

Tecse e walon nén siné, rimetou pa Louis Marquet a s’ neveu, l’ abé Georges Léonard.