Cwand nos èstins djône ome, mi camarâde Noré èt mi, nos brak’nint co voltî, come ça, di tins-in-tins, po tirér on live, ine robète ou on fêzan, onk ou deûs, nin d’pu, djusse po fé ine boune eûrèye.
Ci djoû-la, à l’ toumèye del nut′, c’èstû on bê clér di lune.
I nos prinda l’ zine d’alér fé on toûr, Noré avou si nouf-milimète a plombs, mi, li bac-a-loumîre a clitchète, (sov’ni dès amérikins).
Nos n’ n’alint bin pahûlmint, conte vint, sins brus, les-ouy bin a lâdje. Nos k’nohint bin l’ plèce wice qui l’ djibî si rassonléve.
Arivés a ine cinkantinne di mètes di l’ forîre d’on p’tit bwè, nos toumint a d’gnos podrî on bouhisse : divant nos-ouy : on tav’lê di tote bêté : ine trope di tchivrous : i n’n’avû bin ine dozinne, dès ci qui brozdint dès djônes-àbes, dès-ôtes, hanète sitindôwe, drèssis so lès pates di drî, groumlint lès fouyes qu’estint co a leû pwertèye, deûs-ôtes : tièsse conte tièsse po mostrér leû fwèce, dès-ôtes djouglint, potchtint, fizint dès coupèrous, pé qui dès-acrobates di cirque.
Di chaque costé di l’ forîre, deûs-ôtes, bin dreûs, lès-orèyes às-aguèts, come deûs sintinèles, prèt-a anoncî l’ dandjî.
Dès lâmes corint so nos massales, mouwês, sofla côpé, nos n’àrint nin polou dire ine parole. On tav’lê : dji n’ fi dit qu’çoula !!!
Nos cwitint tot douc’mint so l’ bètchète des pis.
Nos n’ djàzint nin êt nos-avons rintré.
Noré qu’avû pincê è l’ouy, ponda l’imâdje so ine grande teûle di lin po n’ rin roûvî di çou qui nos avût tant fé mouwér.
Kibin d’côps n’avondje-dju nin conté, raconté, rinov’lé nosse st’ istwère et todi avou l’ minme mouwèdje è l’ vwès.
Li màleûr a volou qui, Noré, to bagant, a pièrdou l’ teûle di nos sov’nances, sa-t-èle èvolé ? Nos l’ avons jamây ritrové.
Dj’arèstèye pasqui dji mouwe co to l’ racontant : nosse vûzion !!!