Èco ’ne fèye po n’ nin l’ roûvi !!!
Ine bone annêye, totes sôrs di boneûrs. Et ’ne bone santé al copète dè martchî, èdon !
Awè, pace qui, si vos n’avez nin pôr li santé, kimint volez-v’ avou l’ rèsse ? I n’a nin trinte-sîh manîres dè sohêtî, l’ novèle annêye. Nin dandjî dè fé dès grands råtchås èt dès rontès bokes èt dès bèlès manîres ! Çou qui compte, c’èst d’ lèyî aspiter lès tcholeûrs di s’ coûr. Dès côps qu’i-n-a qui, sins moti, on s’ comprind. On franc louka, ine bone pougnêye di min, djåzèt télefèye pus’ qu’ine riguilite di bès mots !
Qwè qu’on ’nnè dèye, lès vîs parints, lès parins èt lès mårènes, lès mon-n-onkes èt lès matantes, totes lès cisses èt tos lès cis qu’on n’ veût qu’ine fèye l’annêye, ni s’ lèyèt nin broûler l’oûy. I fèt lès cwanses, come di djusse !
I savèt bin qu’ lès-èfants ni v’nèt qui po leûs strèmes èt po lès galèts !
I savèt bin qui l’ bê-fi fêt « s’tour » po n’ nin co ’ne fèye mète ine mohe è l’ôrlodje dè manèdje !
I savèt bin qui l’ nèveûse n’èst la qui po r’mète lès catches è fôr avou s’ consiyince !
I savèt bin qui, nin pus tård qui d’min, I r’toûn’ront è l’ourbîre di leû disseûlance !
Dåmadje !
Adon-pwis, rapôrt a çou qu’on lome « ine bone annêye », n’a bin nou må qu’on v’s-èl sohête « bone », nonna ! Maqu’reût pôr pus qu’ çoula qu’on v’s-èl sohêt’reût « måle » ! Mins, å moumint qu’on lêt hiper ci p’tit sohêt la foû di s’boke, i n’a todi nouk a dîre çou qu’èle sèrè, l’annêye a v’ni. Fåt lèyî fé l’ dèstinêye, dihéve-t-èle ine vîle vwèzène. Al wåde di Diu !
Mi, dji v’s-èl di : « l’annêye qui vint, èle sèrè tot l’ minme on pô çou qu’on ’nnè f’rè !
On n’a nin tofér dandjî di mète sès ponnes ås pîds dè bon Diu. On deût télefèye diner on p’tit côp d’min al dèstinêye. On p’tit côp d’min ou bin, s’on l’ pout, on grand côp d’ pîd è cou, mutwèt !
Li dèstinêye, i fåt qwèri a s’ènnè fé camaråde, pus vite qui dèl loukî po s’ mêsse !
Li ci qu’ fêt çou qu’i pout, fêt çou qu’i deût, di-st-i li spot…
Dji v’ sohête adon dè fé çou qu’vos polez, chaque avou s’ dèstinêye, èt çoula, in-an én-è-rote.
Tecse riçû pa Lucien Mahin, so èn emile da Jacques Pleinevaux, mins ki l’ a rçu lu-minme d’ on camaeråde :
D’ji deu v’dire qui ça vént d’ èn ôte sicrijheu, di’m costé nén cnohou. D’ji l’a r’çu d’on camarôde.