Mi feye si plind ki s’-n ome li brogne, pask’ i n’ sont pus libes di s’ fé des tchôdes e des letchreyes del nute, plamour ki leu grande båshele di onze ans vout d’ tote foice vini coûtchî dins leu tchambe. Et mi, on moumint k’ dji so tot seu avou l’ glawene :
« Diåle m’ ancate ! Ene grande båshele come vos, on mete swessante-shijh hôte, co voleur vini coûtchî dilé moman et popa. Pile a voste ådje, ‒ onze ans et nouv moes ‒, dji doirmeu fén mierseu dins ene pitite tchambe, deus metes lådje et troes metes fonde, e l’ pinsion amon les ptits frés des scoles crustinnes, a Sint-Tibåd. »
Portant, disk’ adon, dji n’ aveu måy passé ene sakêye nute foû del måjhone. Minme cwand on a basti et dismoli nosse viye måjhon. Adon, nosse pa et nosse mame avént decidé di fé on lodjisse provizwere dins l’ tcheri, djusse padrî l’ tchantî des maçons. On tcheri amonté pa m’ pa avou on camaeråde di mestî et èn ôte aidant, djusse deus ans dvant çoula, et ki l’ divanteure esteut co tote å lådje. On l’ aveut ristopé avou on meur di djåbes ki tneut come i pleut. Mins i dmoréve on grand drovaedje å mitan, lådje assez po passer avou li tchvå et l’ begnon. Come ene poite di xheure, mins sins vraiy ouxh. Estô d’ ça, on vude ki montéve disca l’ pene do toet. Lacobén ki c’ esteut di l’ esté. Mins mågré tot, il î fjheut padecô cayant d’ froed.
Mes ptitès sours avént stî elodjeyes pa ene viye cuzene al cwatrinme botnire. Mins mi, dji n’ î aveu nén vlou aler dmani. Po dmorer, mi eto avou popa et moman.
Li mierkidi et l’ semdi del vesprêye, dj’ aléve diner « on côp di spale » ås dismolixheus. Ti sins bén k’ il avént bon di vey li roufion d’ set ans k’ dj’ esteu adon, greter dins les rmanants des meurs di stramé, u dins les bokets d’ plafonaedje ås anås d’ tchene. Dire ki ces dismolixheus la, c’ esteut co des djins do viyaedje k’ avént vnu al corwêye. Dj’ ô bén, sins dmander po-z esse payîs. C’ est l’ dierin côp k’ on a stî ovrer al corwêye dins nosse viyaedje, va, dazår.
Tot ça po vs dire ki dji n’ aveu måy cwité mes cwate meurs divant onze ans nouv moes. Nén ddja aler å camp avou l’ patro do viyaedje. Å resse, dj’ aveu yeu la l’ nez fén. Li gros curé Detchamp ‒ li ci ki fjheut patro ‒ a stî ametou ‒ mins bén pus tård ‒ po-z awè froté l’ djambe a sacwants patronés. Et rtrossî les cotrês des patronêyes po lzî fote so leus fesses, avént ele fwait ene pitite biestreye u l’ ôte. Mi, i n’ m’ a måy oizou aduzer, minme cwand dji m’ ritrovéve tot seu avou lu e l’ sacristeye, ki dj’ aléve siervi messe come åcolete tos les djoûs å matén.
Bén nonna, taiss, ki dji n’ raconte nén tot ça a m’ pitite-feye di onze ans. Dimwin u après, cwand l’ zine lyi prindrè, elle irè coûtchî tote seule dins s’ tchambe, come ene grande. Motoit cwand elle årè passé ene samwinne u deus e l’ « setinme anêye » ‒ nosse shijhinme d’ umanités, dinltins, li prumire renovêye d’ asteure. Et s’ abaiti k’ a tchaeke eure di cours, elle årè on prof diferin, k’ i fårè lomer pa ç’ no la : « professeur ! ». Po bén mostrer l’ adire avou l’ anêye di dvant, ki c’ esteut des mwaisses, des dames u des damjheles di scole. Zels ezès ptitès scoles, les scolîs et scolresses les arinnént tot djhant « mwaisse ! » u « mwaistresse ! ». Li crapåde di m’ feye, elle end a yeu cwanlminme ene vintinne di diferins, so ses shijh ans d’ prumaire. Dire ki mi, dj’ aveu fwait totes mes prumaires avou l’ minme mwaisse, et les shijh anêyes dins l’ minme såle di scole ! S’ abaiti, di dj’, tot candjant d’ prof a tchaeke eure, k’ ele serè divnowe ene pitite djonne feye, ki les djonneas, et minme les omes fwaits, atacront a ziyter après.
A ciste ådje la, mi, come dji vos l’ dijheu-st enawaire, dj’ esteu a Sint-Tibåd, amon les frés. Ké ralaedje e-n erî !
C’ est adon ki l’ imådje da Mitchî do Mwinni ‒ li Mwinni-Sint-Blåjhe, c’ est did la k’ i provneut ‒ m’ a raspité dvant les ouys. Lu eyet l’ drole di paskeye k’ il a viké mon des ptits frés d’ Sint-Tibåd.
— Mon Diu todi ! Ké måleur, mes djins ! Sint-Tibåd a broûlé !
Nozôtes, les scolîs di shijhinme d’ umanités, nos pinséns dedja esse rascoyîs dins des cahoutes di bwès come les ovrîs d’ tchantîs. U des barakes di tole, a môde di bule-tunel, come les houyeus itålyins après l’ guere di 40. On l’ aveut vizité a noste escursion å muzêye do Bwès do Cazî l’ anêye di dvant. Oudonbén dins des toeteas d’ vete toele del Rodje-Croes, come les retchessîs do Catanga, k’ on nos aveut mostré dins les noveles k’ on passéve divant l’ cinéma do dimegne ‒ todi mon mon les ptits frés d’ Sint-Tibåd.
Mins nosse mame aveut fwait l’ diåle pus noer k’ i n’ est. I gn aveutk’ on gurnî k’ aveut griyî. Les pompîs d’ El Rotche, houkîs ås prumirès hinêyes di foumire, avént mwaistri l’ målfeu abeydimint.
Oyi, mins, li gurnî k’ aveut rayi, c’ esteut l’ ci djusse ådzeu des tchambretes des shijhinmes ; les nosses, dabôrd.
Dazår on côtcircwit. Li bastimint n’ esteut pus d’ prumire djonnesse. Mins nén si vî k’ ça nerén.
Bawaite ! On nos a rlodjî dins les minmès tchambes, k’ on aveut ahouté avou des grossès båtches di cirêye toele. Cwand i ploveut del nute, t’ oyeus l’ roudinaedje des gotes djusse ådzeu di t’ tiesse. Padecô, i s’ fijheut des potches d’ aiwe dins båtche metowe dins l’ poice, la ki l’ plafond n’ aveut nén tnou. Adon, el fré Luk, li responsåve di noste anêye, aléve cweri on råve po les rbouter foû. Si t’ esteu dins l’ tchambe djusse djondant, t’ aveus l’ waclêye ki disgolinéve so t’ cwårea, divant di s’ piede dins les colires ådzeu d’ l’ astaedje do dzo (nosse plantchî esteut on pô pus stroet ki l’ ci d’ å dzo) pu dischinde dins les gotires et les atchenås.
Gn aveut do maxhuron å plafond, copurade les tchambes do dbout do poice. C’ est la k’ gn a les montêyes di scours, ki dischindnut disca d’ flaxhe, dins les buros do prefet et do directeur.
Les deus troes scolîs k’ avént leus tchambes ladrî, inte di zels nosse Mitchî do Mwinni, il avént stî rlodjîs å plantchî di dzo, avou les cwatrinmes.
Il ont rfwait l’ toet tins des grandès vacances. Tantea ki tot resteut come divant al rintrêye di setimbe, avou des tchambes rimetowes e coleur. Mins nozôtes, adon, dj’ esténs e l’ cénkinme, dins ene ôte coirnêye des bastimints.
Dji n’ vos l’ a nén dit, mins vos l’ avîz adviné, azår. Li feu aveut prins on semdi al nute, cwand les scolîs estént revoyes e leu måjhone.
Mins ribolete ! E moes d’ octôbe, novea målfeu, on dimegne di ttå matén, ç’ côp ci.
Li prumî côp, on raveut yeu cours li londi. Ci côp cial, on a stî cwites des messes å matén d’ tos les djoûs pol restant d’ l’ anêye. On côp l’ samwinne, tchaeke classe aléve a messe a l’ eglijhe do viyaedje.
Gn aveut la on curé wårdiveus. Mågré ki l’ concile Vatican II aveut racacandjî les viyès uzances des catolikes, ci curé la aveut cotodi ene afitche, agraptêye dilé l’ benitî : « Les omes a droete, les cmeres a hintche, leu tiesse afûlêye. »
Dj’ esteu on foirt boun eleve, adon. Si aveu dj’ sitî tchoezi come åcolete, les djoûs k’ c’ esteut nosse classe k’ aléve a messe å matén å moustî.
E scole, dj’ esteu sol minme banc k’ Mitchî do Mwinni. Mins lu, il esteut tofer li tiesse dins les nouwaedjes. Nouv côps so dijh, i m’ lyi faleut shofler les responses cwand on prof lyi dmandéve ene kesse al taxhlete. Come s’ i tuzéve toltins a ôte tchoi. Come s’ il åreut yeu viké dins èn ôte monde.
I n’ esteut pus dins l’ minme classe ki mi e cwatrinme ey e troejhinme. Mins dj’ a ristî foir e hant avou lu e l’ powezeye, cwand dj’ a cmincî a rôler les bals di dicåce, et lu m’ priyî on côp al fiesse å Mwinni. Ddja bén toumé ! On coreu après les minmès djonnetes, k’ on s’ ripasséve kéccô d’ onk a l’ ôte. Sins må sins malice ! Di ces trevéns la, a saze dî-set ans, on n’ aléve nén co foirt lon dins les resseraedjes et les ratchoftaedjes.
Dji n’ vos di nén l’ fén mot des feus del sicole des frés d’ Sint-Tibåd. C’ esteut pår des målfeus metous. Li piromane, c’ esteut l’ prefet lu-minme ‒ on civil, nén on ptit fré ‒ ki ns avéns tertos sogne di lu. Avou s’ cwåré front, si longou vizaedje, si nez d’ fougnant, ses tchveas côpés al broushe, il arivéve tocosté avou ses féns solés. Come i rotéve a môde d’ on canî, tot balancinant les hantches, et k’ il esteut todi a båker dirî les cwårea, on l’ aveut rbatijhî « Båke-et-hosse ». Et i nos touméve sol tcherpinte cwand dj’ esténs a damadje, a randaxhî e-n ene plaece u l’ ôte k’ i n’ faleut nén, u a djouwer a des djeus k’ on n’ pleut nén foûzeure.
Kékes anêyes di gayole, et on nd a pus oyou cåzer. Il esteut del Grande Ombwè ‒ on viyaedje del Grande Dutcheye nén lon d’ Madjrè et di Bnontchamp, dins l’ payis d’ Bastogne ‒ et i saveut bén l’ almand. Adon, cwand il a yeu tot fwait s’ tins e l’ grande måjhon ‒ li prijhon d’ Andene, s’ i vos fåt sawè les ca et les ma ‒, i paretreut k’ il a chwiné e l’ Otriche. Et s’ aler recoeter dins on retrôclé viyaedje låvå dins les montinnes. Si fé rovyî des cis did par ci, todi.
Didpu don, gn a bråmint d’ l’ aiwe k’ a corou dizo l’ pont ds Åtches a Lidje, dizo l’ pont d’ Djambe a Nameur, dizo l’ noû pont d’ Sambe a Tchålerwè, et dizo l’ pont Mareye-Téjhe sol hôt d’ l’ Aiwe di Lesse. Mitchî do Mwinni ‒ et mi tot parey ‒ dj’ avans atrapé del nivaye dissu nosse cahoûle.
Lu a deus ptits molons. Li prumî : ramasser les mayots d’ coreu a velo. Houte di çoula, il a divnou on fel waloneu, et scrire des paskeyes, des arimés et pår des pîces di teyåte dins l’ lingaedje Dofrexhoe.
On djoû ‒ et dji n’ sai pus pa ké sint ‒ on s’ a rtrové, et i m’ a dit insi : « Douli ‒ c’ est mi spot ‒, si ti n’ as rén a fé on djoû del samwinne ki vént, dji t’ preye di vni magnî ene crosse e m’ måjhone. Èm feme nos aprestêyrè do lapén ås pronnes. Ele tént des robetes, et gn a ene niyêye fene presse po voler e l’ tchôdronete. Dji t’ mosterrè èm coleccion di tchmijhes di coreus ciclisses. End a minme ene da Edi Merckx ey ene da Flipe Djilbert. A ! ene rålisté : ene da Ferdinand Brake, k’ esteut d’ Wanfurcêye, si t’ as co sovnance. Del mimne shijhe, ti m’ frès plaijhi di dire ene pitite fåve ‒ c’ est d’ Ezope, et ça s’ lome « li bijhe et l’ solea » ‒ avou ti accint walon d’ Foufniye. On n’ a co rén d’ après ces cwéns la dins nosse Djåzant Atlasse Éndjolike. »
« Cwè çki c’ est co d’ ça po ene biesse ? »
« Ti nel kinoxhes nén ? Away, dji rovyive. Ti n’ es waire eternetisse, ti-minme ! T’ as meyeu lére des lives. Ass co todi ti telefone axhlåve Nokia prumire djermêye come do tins d’ Matîssalé ? Co pont d’ sûtifone ? »
« Dji sai co viker sins. Minme pol minêye di gripe chinwesse, dj’ a fwait imprimer m’ passe-avant. Portant, mi feye m’ a soyî les coisses ‒ po n’ nén dire pelé l’ panse ‒ po k’ dj’ end atchtêye onk. Ele mel vleut minme payî. Mins mi, todi ossu buké : si ti m’ l’ amoennes, dj’ el tape e l’ sitouve. »
« Iva ! On bådet ki fwait a s’ môde, c’ est l’ mitan di s’ nouriteure. Si piede-t on s’ savon a laver l’ tiesse d’ èn ågne. Portant li ci ki n’ saye rén n’ a rén. Dji t’ va acsegnî nosse Djåzant Atlasse, et ti m’ è dirès des noveles. Et ‒ dijhans todi kécfeye ‒ ti t’ î metrès come les ôtes di nost ådje, a piyanoter so les tapreces et rôbaler sol Daegntoele. Voye non voye. »
Franc come on tigneus, el Mitchî ! Lu k’ esteut si télmint djinné cwand i dveut atôtchî les djins, divinltins.
Li shijhe s’ a mo bén passé. Merci.
Li conin esteut rassawourant a l’ idêye. Dj’ a prins des fotos des pus beas d’ ses mayots d’ coleccion. On a eredjistré si ptite fåve do vî vî tins. Si a dj’ veyou kimint k’ on pleut rischoûter trinte-shijh ôtes accints do walon, rén k’ avou on clitch so ene éndjole, tot betchtant so les waibes et rtchaire å passet sol boune pådje. On djeu d’ efant. Dji sint ki dji m’ va riscoler po tot çoula, mågré k’ dj’ a todi volou dmorer sins, dispu li cminçmint des trevéns d’ l’ internete.
Copurade k’ il aveut sintou l’ plaece ki dj’ aveu må, tot m’ traitant deus côps d’ bourike.
Dedja po soper, il aveut stî rcweri on vî croteus borgogne di padrî l’ hopea d’ faxhenes. Après l’ eurêye ey ene boune djate di crås cafè, il a stî rmonter del cåve ene botaye di blanke gote d’ alambikî, atchtêye do costé d’ Djivet. Les ptits veres si shuvant, l’ ome a cmincî a s’ leyî aler a dire des sacwès k’ i n’ åreut kécfeye nén dit ôtrumint. Copurade ki l’ feme, fornåjheye, esteut-st evoye dins ses plomes.
— Ti sovénss do dortwer des shijhinmes ? Twè, t’ esteus å mitan, riwaitant li ptit bwès bwès d’ tchårnales. Mi, dj’ esteu tot å coron, ene des troes tchambes metowes sol lårdjeur do colidôr. A costé di m’ tchambe, gn aveut les montêyes ki dischindént å buro do prefet. Ti rmimberes tu kî çk’ esteut prefet ?
— Bén c’ esteut l’ vayant « Båkehosse », come on l’ aveut spoté, li ci k’ a bouté deus feyes li feu al cassene.
— To l’ as dit ! Et pocwè l’ a-t i fwait, a t’-n idêye ?
— Bén c’ esteut on malåde ; on piromane k’ on-z a dit dins les gazetes di ç’ tins la.
— Li papî s’ lait scrire. I n’ esteut nén pus piromane ki mi. C’ esteut ene bole-a-pårt. Åresse, cwand il a yeu prudjî s’ tins al pote, il a disparexhou d’ avår ci. Il a rprins ene veye di djin e l’ Otriche. On n’ a pus oyou dire k’ il aveut stî djouwer avou des brocales åtoû des moyes di strin lavola. On l’ åreut rsepou, minme avår cial.
— Et douvént k’ i nd a-st aloumé deus, onk so l’ ôte, a Sint-Tibåd, dabôrd, di målfeus. Il a bén ricnoxhou ki c’ esteut lu k’ els aveut bouté.
— Dji m’ ti va raconter åk ki m’ feme a-st oyou co traze côps. Mins ki dji n’ aveu dit a nolu, a l’ epoke. On djoû tins del nute, dji m’ a rewoeyî dins ene saizene. I gn aveut ene djin dins m’ tchambe ki sayive di m’ sitronner. Dji croe awè boerlé, mins nén si foirt ki ça, poy ki les tchambes d’ a costé ni s’ ont nén dispierté. Dj’ esteu dandjreus dins on dmey soumey. Cwand dj’ a rdrovou les ouys podbon, dj’ a veyou come èn ombion d’ djin ki s’ winnéve evoye foû del tchambe. Et rclitchî l’ ouxh sins pont fé d’ brut.
Dj’ esteu sonkenaiwe. Dji n’ mi saveu redoirmi. N aveut totès noerès idêyes ki berôlént dins m’ tiesse. Esteut ç’ ene djin ? Esteut ç’ on diåle ? Taiss k’ on nos rbateut les orayes avou l’ infier, mon les ptits frés, di ces trevéns la.
— Mins ti n’ î creyeus nén !?
— On croet tot çki les mwaisses vos acsegnnut. Li rlidjon est fwaite d’ ene seule pîce ; ci n’ est nén on menu à la carte. Et li ci k’ a fwait nosse rilidjon… ‒ dji di nosse rilidjon, paski dji va co a messe tenawete. L’ askepieu do crustinnisse, di dj’, c’ est sint På, nén Djezus-Cri. Lu i vleut djusse ricoridjî li grandiveusté des djwifs. Mins sint På… Schoûte mu on pô çou ki dj’ vén d’ lére dins on ratournaedje e walon d’ ene di ses epites. Si nos fjhans des petchîs e-n esprès, tot çou ki nos dmeure a fé, c’ est d’ ratinde li djudjmint do Bon Diu. Et d’ awè peu do feu d’ l’ infier ki va rayi les djins ki n’ volnut nén schoûter.
Dabôrd, mi, on roufion d’ 13 ans, on gamén sins brut, dji m’ dijheu ki ç’ åreut polou esse on diåle ki m’ åreut yeu vnou pûni paski dji fjheu des petchîs.
— Ké petchîs ? Tertos è fjhèt ! Si, do moens, on petchî, c’ est çou k’ on nos djheut k’ c’ esteut : djurer l’ no do Bon Diu ‒ ki ça soeye avou des « nodidju », des « miyårds » u des « godferdom ». Ubén n’ nén schoûter ses parints, u co s’ margayî avou ses frés et sours…
— Taijhe tu avou ça ! Ni cåzans waire, mins cåzans bén ! Rivouss ene pitite gote ?
— Iva ! Dj’ erirè tot mzurant les voyes avou l’ oto. Dj’ espere bén ki dj’ n’ irè pus fougnî l’ nez dins l’ aiwe di Lesse a Houyet, come dj’ aveu fwait do tins ki dji vneu hanter a foice å Mwinni. Èt sovénss ?
— Åy. Dji m’ dimande todi bén kimint çki t’ aveus fwait po rahertchî ti ptite Flandriya so l’ hourêye, on gros mete hôt. Et rivni disca mon m’ mononke-tåye do Fond d’ Ahinvå, tot l’ poûssant al mwin. L’ ome t’ aveut stî remoenner e-n oto. Et vos avîz vnou rcweri l’ moto, avou l’ tracteur et li sglisse, li londmwin di l’ après-nonne. La des ans et des razans did ça.
— Ça n’ nos radjonnit nén, ces sovnances la. A twè !
— A twè et a mi ! Rivudans è ene, li dierinne. La lontins k’ on nd a ddja metou dins les deus djambes.
— Et boere li pwaire di Badjimont !
— Cwè çki dji djheu ddja ?
— Ti dvizéves di Bocolse, et d’ tes petchîs nén come les minnes.
— Asteure, dji so a mitan berzinke. C’ est po ça k’ dji tel oize dire. Dinltins, dji nd åreu yeu djamåy moti. Målureus, vozôtes ! Vola : al nute, dins m’ tchambe, cwand il avént shoflé les loumires, dji m’ fotéve ene drine. Et li ptit djeu m’ plaijheut si télmint ki c’ esteut cåzu tos les djoûs. Et å moumint d’ awè bon, dji somadjive tot hôt.
Dji ravala m’ toursea. Mågré k’ on a d’ l’ ådje, on n’ s’ a nén adû a djåzer d’ ces cayets la avou les djins. Adon, fé shonnance di rén et s’ diner do ton :
— C’ est nén po ça k’ on t’ åreut vlou vni stronner, taiss !
— Taijhe tu ! Lai m’ dire, et t’ etindrès l’ pona et l’ cova. Cwand dj’ a yeu l’ fameus « vraiy fås tchôcmwår », et ki dji n’ mi saveu ressocter, dji tuzéve cwè fé. Dj’ a decidé di rexhe di m’ tchambe et d’ aler raconter cwè å fré Luk, nosse responsåve des shijhinmes. Il aveut s’ tchambe a l’ ôte dibout do colwer. Mins dj’ a yeu bea bouxhî a s’n-ouxh, gn a nouk k’ a vnou drovi. I n’ esteut nén ddja la. Dji n’ a fwait ni ene ni deus. Dj’ a dischindou d’ on plantchî, ey aler trover l’ fré Benoet, li ci des cénkinmes. Lu, i m’ a drovou, et m’ fé intrer dins s’ tchambe, et m’ schoûter dire. I vleut k’ ça n’ soeye k’ on tchôcmwår, et sayî di m’ rapåpyî. Mins dji sotneu k’ i gn aveut-st on tolu, djin u spér, k’ aveut bén moussî e m’ tchambe. Al difén, i vola bén rmonter avou mi po vey cwè.
Cwand on rariva a l’ astaedje des shijhinmes, kî çk’ adramtéve, vinant do contraire costé ? Nosse Bocolse. Li fré Benoet ni pleut rén fé d’ ôte ki d’ lyi conter l’ faitindje. Et lu awè l’ air tot sbaré. Mins ‒ dj’ el voe co come si ç’ sereut ersè ‒ c’ esteut ene air di deus airs, avou come on riya do gros des dints. Dji direu minme k’ il esteut ene miete djinné. Lu k’ aveut todi des paroles côpantes come on razoe, i tchafouyive ene miete e cåzant.
Il ont vnou zels deus razouyî l’ ouxh, et m’ lét, et clitchî onk u k’ c’ est deus côps, po vey si on pleut drovi et rclôre sins crînaedje. I n’ ont rén dit inte di zels, et m’ cwiter avou : « Alez ! Fåt fé chlop, asteure. Fouxhoz seur ki ça n’ si rprezintrè pus. Dji frans mete ‒ ecsepcionelmint ‒ on loket ki vs pôroz clôre d’ ådvins. Come ça, vos rdoimroz påjhûle. »
C’ est l’ fré Benoet k’ aveut cåzé. L’ ôte aveut hossî s’ tiesse po dire k’ åy. »
C’ est a ç’ moumint la ki l’ feme da Mitchî ‒ ene djonne, mins c’ esteut ddja l’ troejhinme do no ‒ a-st ahuzé dins l’ bele plaece avou s’ cote di nute foirt dismousseye.
« Alez, monparan ! La bén deus eures ki dji vs ratind sins m’ sawè essokyî. Et m’ kiverouyî dins les lénçoûs tantea ki l’ lét est tot cou dzeu cou dzo. Mande escuze, Douli — dji di come Mitchî —, mins dimwin, il a radjoû a l’ oculisse a dijh eures, et dj’ årè co des rujhes a l’ fé lever, avou çki vos avoz ddja flûté. »
Cwè responde a ça, foiravant dimandé pa on si bea ptit boket ? Dji m’ a-st essåvé sol betchete des pîs. Et rintrer pa totès ptitès voyes po n’ nén rescontrer des bleus ki m’ årént fwait shofler dins l’ balon. Et sins manke, mi fé passer l’ restant del nute a l’ amigo.
Après cisse shijhe la, dj’ a rpierdou nosse Mitchî d’ vuwe. Fåt dire ki dj’ a yeu ene laide passe å moumint ki dj’ a prins m’ pinsion. Cénk ans dvant l’ ådje, cåzu tapé a l’ ouxh des noerès cotes, la k’ dj’ aveu divnou procureu do rwè.
Oyi, dji n’ vos a nén co djåzé di m’ mestî. Bén vola, c’ est fwait.
Ene cårire sins taetche, dispu m’ diplome al fak di droet di l’ univ di Lidje, disk’ a l’ « arindjmint » ki dji vén di vs dire.
Cwè çk’ i gn a yeu inte mi et l’ ministere del djustice ? Asteure ki les faitindjes sont passêyes et forpassêyes, et ki dj’ a cåzu l’ ådje del pinsion po tertos, dji n’ a pus sogne di djåzer.
Av co sovnance do bôdård francès lomé Besri. Èn anårtchisse ricwerou pa totes les polices di Djudla-Kevrin. Si droet-bresse, c’ esteut on Walon, on lomé Djaki Lidint. Cwand s’ tchîf a yeu stî ramassé après ene porshûte dins Paris k’ a stî so totes les gazetes, nosse Lidint a stepé evoye, et si vni rmete al coete adlé nozôtes. Mins il esteut trop veyåve, et il a fini pa esse ricnoxhou. Et rouf ! e l’ pote !
Nozôtes, les efants d’ may 68, nos esténs roeds bleus sots di ces anårtchisses la. K’ alént scheure li biyokî ‒ taper on grand côp d’ pî dins l’ copixhreye, si vos vloz ‒ et rascandjî l’ vî sistinme.
Li djoû del prumire aschoûte å tribunå, nos esténs priyîs d’ esse la, come estudiants stadjaires del dierinne anêye di droet. Dji n’ sai li ké d’ nozôtes ‒ mins ci n’ esteut nén mi, dji vos l’ djeure so m’ vé et so m’ coye ‒ li ké crawieus d’ etur les studiants, di dj’, k a-st emantchî on plan makiavelrece po fé skifter evoye nosse Lidint.
L’ anêye di dvant, onk di nosse nindje di swessantûtîs ‒ co on côp, dji n’ sai pus l’ ké, mins nén todi mi ‒, il aveut fwait on voyaedje amon nos cuzéns walons del Wisconsene, avou ene soce d’ après Nameur. C’ esteut on rafiyant d’ åres di pougn. Ladrî, il avént stî viziter ene årmurreye, et lu aveut dmoré ståmusse divant on bronigne raptiti. On ptit caliguluk tecnike, po di ç’ tins la. Sbaré, nost ome, d’ aprinde k’ on pleut atchter ça sins papî sins rén. Djusse li mete dins l’ tcherete do sårma, passer al caisse, et payî aidants sol mwin. Mins, djonne situdiant, i n’ aveut nén les cwårs po.
Tot leu voyaedje, il estént lodjîs amon des Walons d’ après Nameur, Brussele, Grand-Lé, Rozire et les ôtes viyaedjes walons del Vete Baiye. Lu, c’ esteut emon ene viye djonne feye, ki l’ aveut-st al boune. Li dierin djoû, ele s’ amoenne avou on ptit paket bén ratoirtchî dins so gris papî. C’ esteut l’ bronigne k’ il aveut tant djeryî après.
Dji n’ vos dirè nén kimint k’ i l’ a seu fé rpasser ås dwanes. L’ amerikinne al rexhowe del Wisconsene, ci n’ esteut co rén : il estént dins on ptit busse, et i n’ elzî ont nén fougnî les bagaedjes. Mins a Toronto, po monter dins l’ areyoplane, la k’ les gableus tchaiynut sol niyåd. Franc come on tigneus, nost ome, et dire ki c’ esteut po ses tépés d’ crimino, tot mostrant s’ cwåte di studiant et lomant l’ tchîf diwanî « confré ». Les Canadyins lyi avént fwait on bea gros paket, selé al cére, avou tos les catchets k’ i fåt. Mins n aveut co l’ dwane bedje a Zaventem. Djans ! dji clô m’ gueuye ; dj’ end a ddja dit dtrop. Dj’ aveu prometou di tni m’ linwe ‒ et m’ croyon ‒ et vos savoz bén ki dji n’ rimagne måy mi parole.
Todi est i ki ç’ pistolet la esteut wårdé a Lovén ‒ li vî Lovén, la ki s’ pa ovréve a l’ univ. Nén eredjistré nene pårt e l’ Beldjike. L’ ideyå po mete dins les mwins da Lidint, et l’ fé schiper foû des grawes del djustice. Paski, po nozôtes, ces anårtchisses la, c’ esteut des heros, nén des halbôssåds.
Avou kî onk del binde s’ aveut i etindou po poleur moussî e l’ såle do palå d’ djustice di Lidje, divant l’ ashyinne ? Et sawè so ké banc ki l’ ametou sereut-st ashît. Dji n’ vos l’ såreu dire nerén.
Item est i ki, å moumint d’ passer dvant les djudjes, nosse Lidint n’ a yeu k’ a grevissî padzo s’ banc po trover li bronigne k’ on a dit. On lyi aveut-st adon rsaetchî les pôssetes, por lu poleur lever l’ droete mwin padvant, et responde dizo siermint. I n’ a yeu k’ a saetchî on côp e l’ air po mostrer ki ç’ n’ esteut nén on djouwet d’ Sint-Nicolai. Pu mancî les djindåres po moussî foû.
La, gn aveut ene moto Guzi k’ el ratindeut. Passer dins les rouwales di Lidje et d’ Angleur, dins les pazeas eviè Tif et Beafayi et si svinter dins les grands bwès d’ Årdene, come Ambiyorisse do vî vî tins da Djule Cezår.
Dji n’ vos såreu dire nerén kî çk’ aveut-st eteré s’ moto ‒ nosse moto, mins chute po ça ! ‒ dins on retrôclé hamtea come Xhoûtsiploû.
Mins on bea djoû, cisse plaece la, dins ç’ retrôclé hamea la, elle a toumé e mitan d’ on pordjet di cinte di spôrts et d’ plaijhance del comene di Bûtba. Et les paileuses disterer nosse fameuse Guzi. Et do fi disk’ å trô d’ l’ aweye, ritrover nosse binde di studiants do ceke di droet, k’ avént fwait ene cagnote po l’ atchter.
Trinte-cénk ans après, il ont stî rtrover tos les nos, li ci da bibi emey li djivêye. Por mi, c’ esteut onk di nozôtes k’ aveut fwait do djudas, pask’ on n’ aveut scrît çoula nole pårt. Ti sins bén !
Dins ces condicions la, foirt rujhûle po ene sakî di dmorer procureu do rwè ! Nén mezåjhe di vos fé on dessén.
Djans ! Dj’ a tapé m’ cote sol håye, al taxhlete, sins grandès aiwêyes dins les medias. Cwand on est del måjhon, on s’ pout todi arindjî avou les colegues et les gros-colés del pédjî po neyî l’ pexhon.
Por mi, ça n’ a nén stî sins må. Dj’ endè fourit pår disbeli, et divni on vî grigneus. Tantea ki m’ feme m’ a leyî la hatche et matche. Ti sins bén. Divant çoula, dj’ esteu cåzu l’ decideu ‒ dj’ aléve dire del veye ou del moirt, mins n’ a puch di poenne di moirt dispu bele ådje ‒ do nombe d’ anêyes di prijhon, todi, d’ on mårivnant u l’ ôte. Après m’ demission, dji divneu on simpe dimanant, et s’ fé rwaitî d’ cresse på dierin des mandayes.
Mes efants s’ avént metou tertos do costé d’ leu mame. Et m’ fé poirter l’ donlêye po nosse tårdou dismariaedje. Gn aveut ki m’ pus djonne des feyes ki rivneut cobén e l’ måjhone, avou s’ pitite båshele di 11 ans. C’ est l’ cene ki vleut todi aler coûtchî avou popa et moman, ki dj’ a-st edåmé nosse paskeye avou leye.
Dj’ esteu don moloné pal disbåtchance. Adon, çou ki dveut ariver ariva. Dj’ a fwait on ptit crantche e cervea. Lacobén : on bea ptit nocrê bén rond, nén èn estoelé come onk des ôtes ki s’ aveut fwait ratraper come mi. Lu vént d’ leyî la ses hozetes. Mi dji m’ a fwait médyî a Erasse a Brussele, avou l’ « Gama-coûte », li « coutea » ås rais gama. C’ est l’ dierinne discoviete po sognî les cancers del tiesse. Et dispoy kékes moes, les cis d’ Erasse sont sol houptiket. Pupont d’ traece do må, ni å petsicane ni a rén. Gråces et dank et merci, grand Diu deyî !
C’ est dins cist estat la ki dj’ so, pol djoû d’ ouy. On rweri, ki s’ a racmoirdé avou s’ vicance, et ricmincî a rassawourer les ptits plaijhis del veye, po les kékès anêyes ki lyi dmeure a viker.
Dj’ a rsondjî a Mitchî do Mwinni et a si pasmint d’ tins di scrijheu e walon. Dji m’ a-st abouné a totes les gazetes di waloneus : « Li Rantoele », « El Moxhon d’ Ônea », « Singulîs », « El Bourdon », les « Cayés walons », « Nosse lingaedje », eyet l’ « Walone » di Lidje. Et li ptite gazete des Måmdiyins, avou. Et pår « Li Soverdea » des cis do Roman Payis.
Dji lé voltî les scrîts da Mitchî, ki parexhnut dins deus s’ troes gazetes. Todi foirt politicmint comifåt, åresse : pititès sovnances po rire, rimas sol bontins, so l’ ivier, so les hantijhes des djonnès djins. Todi bén toirtchîs, djamåy houfs. Avou des beas vîs mots walons, des cis ki dji m’ rimimbere awè oyou a Foufniye et ossu tins d’ mes scolaedjes a Lidje. Mins ossu des ôtes, ki sont noveas por mi, et ki dj’ raprind. Po ça, dj’ a-st atchté tote ene trûlêye di motîs, do ptit d’ potche des rfondeus al grosse brike da Francård. Et lanawaire, les deus d’ Ite, Hôt Ite, Vejhnå ey avår la, walon-francès et francès-walon. Des ovraedjes di nûton. End a tote ene raiye divins m’ bibioteke.
Mins cwè çk’ il a divnou, nosse Mitchî do Mwinni ? Dispu troes limeros, i n’ metnut mus rén d’ lu dins les « Cayés walons », k’ i gn aveut tchaeke côp onk di ses bokets.
Si dj’ el houcreu å telefone, po vey cwè.
I n’ esteut nén la. Dj’ a yeu s’ feme. Cwand ele m’ a yeu rmetou, ele s’ a tapé a tchoûler.
« Taijhoz vos, Douli. Il esteut-st evoye a on raploû so les ptits lingaedjes, ene sadju e l’ Otriche ‒ mins dj’ a rovyî l’ no. I m’ a houkî k’ i dmeurreut låvå ene samwinne après l’ raploû. Mins la l’ samwinne k’ est passêye et rapassêye et pus nole novele. Si sûtifone ni respond pus.
Dj’ esteu clawêye la. Dji n’ saveu cwè pinser, cwè fé. C’ est adon ki dj’ a rçû l’ vizite di deus policîs e l’ måjhon. « N’ åyoz nén sogne, nosse dame, mins vost ome a stî metou e-n egzamin pa nos colegues di Klaguenfour. C’ est e l’ Otriche. Ene djin k’ il aveut stî e hant avou leye sacwants côps les djoûs di dvant, et k’ est inte li veye et l’ moirt a l’ ospitå, avou on må k’ les docteurs ni comprindnut nén. Neni, nén ene kimere. Ene djin, ça pout esse èn ome. Et c’ esteut èn ome. On lomé Flipe Bocolse, k’ a l’ dobe nåcionålté : bedje et otrichyinne. Ça vos dit åk, ci no la ? »
Dj’ a manké d’ toumer dins les cropecindes, savoz, Douli. Ça dveut esse li fameus Båkehosse, li prefet d’ diciplene di Sint-Tibåd. Il è cåzéve todi pus sovint dispu ki vos avîz vnou e nosse måjhon l’ ôte feye. La ddja bén deus s’ troes ans. Mondju ! Ki l’ tins passe rade. Nonna, i vole evoye.
Ki fåt i fé, Douli ? Vos ki cnoxhe les lwès et les catoûs del djustice, nos pôrîz vs bayî on côp di spale ? »
Li cmere si rtaijha, et ricmincî a sogloter.
Dj’ end ava les djambes côpêyes. Paski, dispu li fameuse shijhe la k’ il aveut cmincî a discovri l’ potêye, dj’ aveu stî ene miete rinaxhî dins l’ dossî des målfeus d’ Sint-Tibåd. Do tins ki dj’ esteu co « dins l’ måjhon », ci n’ esteut nén målåjhey por mi. Dji m’ aveu minme fwait riscaner tot l’ papiyåd. A stoumuligne, ca dji n’ aveu nén l’ droet di ranxhî dins ene « afwaire classêye ».
Po dire li veur, Bocolse aveut stî ametou dins deus dossîs. C’ est l’ prumî djudje ki les aveut discoplé. Li prumî dossî, c’ esteut « boutaedje di målfeus ». Li deujhinme, c’ esteut « tchaspougnaedje di mineurs ».
Ci prumî djudje la, c’ esteut on Poncin, li prôpe neveu do fré directeur di Sint-Tibåd. Tén, la rén ! Gn a åk di nén trop catolike padrî çoula.
Bocolse a stî codåné po les målfeus. Dijh ans a fé des saetchots. Mins il a stî rlåtchî après set ans, po « rigretaedje di ses målès keures, et fene boune kidujhance e prijhon. »
Pol dossî d’ abuzaedje di mineurs, il a stî acwité, manke di prouves. L’ afwaire a stî forcloyowe.
Manke di prouves ? C’ est ki l’ paskeye di nosse Mitchî aveut stî stofêye. Et motoit les cenes di des ôtes efants. End esteut i å corant, li pôve micoye, di ç’ deujhinme dossî la ?
I fåt ki dj’ sepe les pondants et les djondants d’ l’ afwaire. Po ça, n’ a nén a tchicter. I m’ fåt aler a Klaguenfour.
Dj’ a rsouné al feme Mitchî. Dji m’ rissovneu di s’ pitite cote di nute, k’ on veyeut cåzu houte, cwand ele meta ene ahote a nosse sôlreye-adjåzia, li djoû do soper å lapén ås pronnes. Pu tchessî ces « impeurès pinsêyes » la ‒ come on les loméve a Sint-Tibåd ‒ po n’ nén rinde måloniesse çou ki dj’ lyi aléve atåvler.
— Dijhoz, Birdjite ‒ c’ est s’ pitit no ‒ serîz dacoird di l’ aler vir e l’ Otriche avou mi ? Dji sai mî k’ èn ôte kimint dmander les permissions k’ i fåt por vos l’ poleur rescontrer. Et ossu loukî li meyeuse des manires po l’ saetchî foû di spexheur. Mins po çoula, i m’ fåt saveur cwè et kesse so çou ki s’ a la passé å djusse.
— E l’ Otriche ! Po cbén d’ tins, ô, vos ? Dji n’ a ddja måy sitî si lon e voyaedje, savoz, mi. Et kî çki ténrè mes robetes cwand dji n’ serè nén la ?
— Vindoz lzès ! Vos è rtrovroz bén des ôtes cwand vos rvénroz !
— Totès biesses di concours ! Dj’ a co fwait on prumî pris aL Rotche al bate di ptit bisteu nén pus vî ki l’ moes passé.
— Vost ome våt bén des robetes di sôre. S’ i catche des sacwès ås inketeus, drola, i cåzrè motoit pus åjheymint cwand vos l’ åroz holé, por lu dire li vraiy. Si dji n’ a nén l’ droet d’ esse avou vos deus tins del vizite, vos m’ fårè rdire totafwait paraprès.
Ele s’ a leyî adire, et trover ene djin po lyi sognî ses robetes.
Prinde l’ avion a Gochliye, so Wîne, Pu adon on trén po Klaguenfour. Dins l’ convwè, dj’ avans yeu l’ tins d’ berdeler, avou l’ Birdjite (dins l’ avion elle esteut mo strindowe ; ele ni motixheut gote).
C’ est mi k’ ataca a sayî d’ disvôtyî l’ lonxhea do « cas » Mitchî do Mwinni.
— Taijhoz vos, Douli ‒ dji vos pou co lomer « Douli », pår foû d’ nos waibes ? I n’ a sepou aveur des efants avou ses deus femes divant mi. Si fi ‒ k’ i n’ est pus e hant avou lu dispu bele ådje ‒, c’ est èn afiyî.
— Cwè vloz dire pa « afiyî » ?
— Èn orfulin, sins parints, k’ il ont-st adopté, lu et s’ prumire feme.
— Et avou vos ? Dji m’ permete, paski ça pôreut espliker bén des sacwès.
— Eee… Dj’ a målåjhey di cåzer d’ tot ça. C’ est nén des sacwès k’ on va brûtyî voltî foû. Mins avou les deus femes di dvant, i n’ arivént måy a s’ etinde… dji vou dire po coûtchî eshonne. Après tot on tins, dj’ a comprins çou k’ i djheut a dmeys mots… dj’ ô bén k’ i n’ esteut djamåy ridje assez å bon moumint.
— Et avou vos ? Si dji m’ pou co permete, pol bén d’ l’ inkete a vni.
— Mi, dji cnoxhe mî les biesses ki les djins. Dji n’ a k’ on ptit diplome d’ acleveuse. Mins c’ est po ça ki dji so-st afeye pus naturele. Et mi pasmint d’ tins, c’ est d’ lére des lives di sicolodjeye. Dji m’ a dit ki, Mitchî, i m’ lyi faleut fé rcåzer di totes ces anêyes la, k’ il aveut todi catchî å parfond d’ lu-minme. Tot cminçant pa cisse fameuse nute la, k’ il a sondjî k’ on l’ aléve sitronner. I vos l’ a raconté, m’ a-t i acertiné.
— Taiss k’ åy ! Et dmoréve-t i so si prumire idêye, di stronnaedje ?
— C’ est mi ki, pitchote a midjote, lyi a fwait comprinde ki, cisse djin la k’ esteut dins s’ tchambe, ci n’ esteut nén li stronner k’ ele voleut, c’ esteut… dijhans l’ platkizak : c’ esteut lyi sinte les pårteyes.
— Dji m’ end aveu doté ossu. Mins kî çki c’ esteut ?
— Il î a tuzé et ratuzé. Tot doûçmint, il a-st abandné l’ idêye d’ on diåle ‒ mins a falou l’ tins ! Dji lyi a fwait dire ki ça n’ pleut esse ki troes djins. Li prefet u l’ directeur, k’ avént les montêyes di scours po disparexhe sins esse veyou. Ucobén l’ fré des shijhinmes, li fré Luk, ki lodjive sol minme plantchî, et ki n’ esteut nén dins s’ tchambe cwand i l’ a volou aler trover. Et k’ a trinné des pîs po mete li fameus clitchet ki l’ fré Benoet, des cénkinmes, aveut prometou. Li prefet, l’ directeur et l’ fré Luk : totès djins ki lyi ont todi seriné k’ il aveut fwait on tchôcmwår. Et lyi disfinde di ratchafyî so çt istwere la avou Pire, På et Djåke.
Gn a ki l’ fré Benoet k’ a yeu l’ air d’ el croere. Tote l’ anêye d’ après, cwand c’ esteut lu si responsåve, il aveut stî foû amiståve avou Mitchî.
Ci fré Benoet la, i l’ aveut rtrové èn an u deus après k’ il aveut yeu cwité Sint-Tibåd. A on raploû d’ ancyins ‒ vos î estîz ptete ossu. Mins i s’ ont djusse rescontré al varade, dins les montêyes. Li fré lyi aveut dit : « A ! c’ est vos, l’ fameus « do Mwinni » ? On a co rdjåzé d’ vos… » C’ est come s’ il åreut volou porshure, mins i montéve ene sawice, et awè l’ air di s’ ehåster, et Mitchî dischindeut avou l’ troplete d’ ancyins. Cwè çk’ i s’ årént yeu dit, s’ il årént yeu vnou a dvize ? Bon Diu l’ sait.
— Mins rivnans ås troes « suspets ». So l’ ké des troes k’ il aveut l’ pus di dotance ? I shonnéve n’ è vleur k’ a Båkehosse, li prefet. Aveut i rlavé li directeur et l’ fré Luk ?
— Båkehosse esteut malén ki l’ diåle. C’ est po ça k’ les frés l’ veyént voltî. I lzî fjheut wangnî des liårds, tot-z adjinçnant des fiesses di parints avou ene candjlete å wiski et totès foitès gotes inla. I lomént çoula li « bodega ». Ti sins bén k’ i gn aveut k’ les pus ritches des parints k’ î plént aler pinter, télmint k’ c’ esteut tchir et vilin. Pask’ a Sint-Tibåd, t’ aveus did tot : des efants di ptits halcotîs, petrons et li cpagneye, mins eto des fis d’ dintisses, di docteurs, d’ apoticåres, d’ årtchitekes, di notaires, di djudjes, di borguimwaisses, di deputés a l’ province, et tot ça. I paretreut k’ il î årént minme djouwé a des djeus d’ sôs, et k’ c’ esteut nosse Bocolse ki fjheut do croupî.
Il aveut ossu trové ene ôte wangne, todi po ratozer l’ cagnote des frés. Il atchtéve des biyets d’ trén pa dijh egzimplaires ås Tchmins d’ fier, avou on bon rabat, pu les rconter ås scolîs k’ eralént so Nameur, Djiblou et Brussele å plin pris.
Bref a ça, i s’ pout foirt bén ki les frés ont clôs leus ouys so ses målès keures. Å cmince, todi, ca i n’ î creyént surmint nén. On parey ki Båkehosse ni pleut esse k’ èn ome totoute. Djourdidju, vozôtes ! n’ alez nén discåzer on sfwait crustin !
— Et l’ feu, dins tot ça ? Mitchî åreut metou s’ tiesse a côper, ki Båkehosse n’ esteut nén pus piromane ki lu.
— Al fén, dji lyi a seu fwait rnåder tot çou k’ esteut muchyî å trefond d’ ses tripes. Et i s’ a foirdjî si pitite idêye. L’ ome shonnéve prinde plaijhi a rguignî les råpéns ki s’ fotént des toutches par nute. Des trôs k’ il åreut foré e plantchî do gurnî. I s’ fwait k’ i gn aveut k’ lu a-z awè l’ clé di l’ ouxh des plaeces dizo l’ toet.
— Mins les curés codånént çoula straegnmint assez. Loukîz ene miete. Dj’ a-st apoirté ene des gazetes e walon ki dji rçû, asteure ki Mitchî m’ a-st apassé si gosse des scrijhaedjes e patwès. Dji lé çoucial :
So tos les djeus di scole, gn aveut des studiants qui n’ avént nén djustumint idêye di fé do spôrt, ki s’ pormoennént à deus ou troes tot tournant åtoû del plaece. Cwand Beabusse ‒ c’ est leu Båkehosse did la ‒ veyeut çoula, il aspitéve tot loucant d’ on laid ouy, et timpester, et s’ bôzer come ene sope å laecea. Pinséve-t i ki nos talmaxhéns conte li scole ? Ki nos planeténs do basti ene bombe ? Dji pinse puvite k’ i sondjive ki nos djåzéns d’ afwaires « impeures ».
Ey ene miete pus lon :
On bea djoû, l’ otobusse ki vneut tcherdjî des esternes aveut dvou frinner a tote foice, a cåze des scolîs ki s’ avént tchôkî n’ onk l’ ôte. Nos fourîs tertos houkîs e l’ grande såle, et l’ Directeur lu-minme vénve nos fé li lçon.
« Ni pinsez nén, kiminça-t i, ki l’ moirt ni pout racsure ki vos grands-parints. » Discar la, nén a dire, il aveut råjhon. « Mådjinez vs ki l’ accidint åye sorvinou : onk, ou bén minme puzieurs sicolîs plént esse touwés. Abén, s’ il estént, a ç’ moumint la, e l’ estat di petchî moirtel, il estént codånés å feu d’ l’ infier po tofer ! »
Mins, tot conte fwait, di ké petchî moirtel djåzéve-t i ? I gn aveut nou moudréle dins nozôtes. Mins bén seur, i gn a li « petchî solitaire », come i shonnént lomer li branlaedje. Gn aveut i troes ptits djonnes omes so cint ki nel fijhént nén ? Onk so cint ?
— Mi dji so-st ene kimere. Dji n’ croe nén ki les båsheles sont leus ostant a fé insi insa.
— Mins si les frés s’ dotént d’ ene sacwè, i pleut ristoper ses trôs al varade, rimete del poûssire dissu. Ni veyou ni cnoxhou !
— Mitchî s’ aveut metou lanawaire so ene pådje Fesbok avou des racuspoteus di margougneus d’ efants sol Daegntoele. Tofjhant k’ i trovéve des cas, i vna a tuzer ki Bocolse åreut polou awè regurniyî des fotos pornos d’ efant. On n’ cåzéve nén co d’ tot ça come enute, mins ça egzistéve dedja. I s’ poleut fé avoyî des sfwaitès fotos, u des rvuwes po les rafiyants d’ efant. Si ça egzistéve dedja, todi. I les pleut rçure direk pal posse, ca c’ esteut lu ossu ki tneut li « prokeure », ene pitite botike la k’ on pleut aler atchter des gazetes come « Tintin » u « Spirou ». Les cis k’ avént des çanses po fé, come di djusse, nén les efants d’ proletaires come vozôtes deus. C’ est don Bocolse ki rascodeut tot l’ corî å facteur et ki l’ ripårtixheut inte les frés responsåves des anêyes. Inte åtchetes : zels-minmes drovént les letes ki les scolîs rçuvént, divant d’ elzî rmete leu corî. Parey divant d’ evoyî les cenes ki les scolîs scrijhént a leu famile.
— Rivnans drî rinne. Båkehosse åreut yeu des fotos d’ efants e gurnî ? Por mi, ça s’ pout bén : li pedofileye est viye come les tchmins.
— Oyi, kécfeye ki ça s’ pout. C’ esteut l’ dierinne abayeye da Mitchî. Eyet, s’ il aveut lahôt ès bibioteke pediclastike, i nel pleut tolminme nén ebagadjî dins s’ buro a l’ intrêye, on côp k’ i strindeut a ses guetes. Ou l’ fé ebaguer pa ene camionete, mins wice les aler distrure ? Il esteut ddja motoit sorwoeyî. I gnè pleut ddja aveur des efants d’ djudje dins les plindeus. Ostant î mete li feu, et fé disparexhe totafwait a foumire.
— Et les frés årént sepou l’ cwacwa ?
— Ki sai dju, don, mi !? Mins metans k’ i lyi årént ridmandé l’ clé do gurnî on djudi. Boutans : po des ovrîs î ovrer l’ wekene, kéccô po ristoper les trôs ki des scolîs årént veyou, et s’ plinde. Lu åreut dit k’ il aveut pierdou les seres. Zels si måvler l’ vénrdi, et lu fote ene brocale so on pot d’ essince e gurnî, el semdi del vesprêye, cwand les scolîs estént revoyes e leu måjhon. On rafiyant d’ efant n’ est nén èn esprindeu d’ for crematwere.
— Et s’ i gn aveut ddja des plintes di sacwants parints, et ki l’ police esteut al cwire après des prouves ?
— Adon, on pout co tuzer ôte tchoi. Li directeur et l’ prefet bate copene come des vîs camaerådes. Båkehosse ni lyi rén catchî. Mins, sûteyemint, li prinde a s’ goidje ‒ imådjreçmint ‒ tot lyi mostrant ki, si l’ police poirtéve l’ afwaire ezès tribunås, li rlomêye di Sint-Tibåd esteut pol diåle. Dedja ki l’ pinsion esteut tchire po bråmint des parints. Avou ça k’ i gn av todi dpus d’ adire avou les scoles publikes, la k’ les pris estént beacôp pus bas, dabôrd ki l’ cwålité esteut toplin meyeuse, et les bastimints pus modienes.
— Et k’ åreut i rexhou d’ ene sifwaite bate di copene, etur prefet et directeur, sorlon vos ? U sorlon vost ome, ki c’ est lu k’ etcherpetéve tot çoula, dazår ?
— Bén, aiwdirotchmint, zels deus adjinçner ci plan la di boutaedje a feu. Les bastimints n’ estént pus d’ prumire djonnesse. Avou les monceas d’ vîs papîs ki dvént-z esse la egurniyîs, ça aléve prinde come ene moye di strin. Po rastrinde les damadjes, i telefonrént ås pompîs ås prumirès hinêyes d’ eyigneure. Les assurances ripayrént on noû toet ey on noû gurnî. Les inspecteurs del pédjî ni trovrént pus rén a-z inspecter. C’ esteut tos benefices po tertos.
— Mins, ådzeu del tchapele, i n’ aveut nole råjhon d’ fé des trôs po raguider des forfroyeus. Pocwè, adon, on deujhinme feu ?
— Ki sai dju, mi. C’ est vos ki s’ î cnoxhe dins les calinreyes des toirdous, nén mi.
Dji lyi dmandéve tot çoula po vey si Mitchî aveut pinsé come mi. Dins les dossîs d’ tribunå, li prumire dimande esteut unike : Bocolse diveut responde di veyeurisse eyet d’ målfeu. Mins gn aveut k’ des temognaedjes d’ efants mineurs pol prumî ametaedje. Et pol deujhinme, li målfeu dizeu l’ tchapele n’ aveut rén a vey avou l’ mwinde « atteinte à la pudeur ». Did la li pårtixhaedje e deus dossîs et l’ non-leu pol prumî. Mins come li djudje esteut parint avou l’ directeur, va-z è vey si c’ esteut nén ZELS TROES k’ avént dedja tuzé pus lon après l’ prumî feu, et planeter li deujhinme po poleur codåner Bocolse come piromane (5 a 10 ans d’ cadje, avou rmetaedje di poenne possibe, so ricmandåcion des sicolokes) purade ki come margougneu d’ efant (15 a 20 ans, sins rabat, adon).
Dj’ esteu enaiwé dins ces pinsêyes la cwand dj’ oya li hôt-pårleu do trén k’ anoncive « Klagenfurt Hauptbahnhof ». Dj’ esténs don arivés. Asteure, nos faleut dischinde, et rtrover nost otel.
Dimwin serè-st on laid djoû. Dji dvrè aler trover on fré d’ mestî, procureu del republike. Dji l’ aveu ddja-st atôtchî pal voye d’ ene soce eternåcionåle d’ ancyins cådes del djustice. I m’ fårè maneuvrer, avou m’ fayé almand, po-z awè totes les intrêyes por mi moenner l’ atelêye come dji pinse ki ç’ sereut l’ mî po m’ vî soçon d’ umanités, k’ est resseré vaici nén lon…
…Eyet po s’ pitit boket d’ feme, ki m’ rivént vormint bén.