I gnia è Vré Condroz, on clapant p’tit viyèdje bin k’nohou dès pôrmineûs. Ine sôre di paradis avou s’ tchèstê, s’ tchapèle, sès vèvîs èt sès bwès. Li ry qu’ èl trivièse èt qu’ fåt passer a wé… Mins qu’ sèreût on « paradis » sins sint ? A sazinme siéke, dè trèvint dès guères di r’lidjon inte lès Réformés èt l’ påpe, li tchèstûrlin a candjî l’ nom dè viyèdje, dè mons l’ manîre di l’ sicrîre. « Cint fontinnes » a div’nou « Saint-Fontaine. » Po fé assoti lès Protestants qui n’ volît pus étinde djåzer des sints ? Ou bin po-z-aler pus rade è Cîr sins d’veûr payî dès induljances a Rome ? Todi ènn’ èst-st-i qu’ on n’ troûve nou sint qui s’ loume « Fontaine » so l’ calandriyer qui portant n’ ènnè måque nin.
Dispôy ayîr portant, il a s’ potale.. A d’zeûr di l’ oûh’ d’ intrèye di mohone ! On n’ rawåde pus asteûre qui lès pèlèrinèdjes.