Vous-se vini, cusène Marèye (Paul Piron)

Èn årtike di Wikisource.
Ciste ouve ci egzistêye eto divins ds ôtès ortografeyes : Feller (Doutrepont)Rifondou.
Vous-se vini, cusène Marèye
Paul Piron (Cent Vieux Noëls, Dantine Frères, Charleroi, 1931), 18inme sieke
Vous-se vini, cusène Marèye

I.
Liz’bèt′
Vous-se vini, cusène Marèye,
E Bèthlèyèem avou mi ?
Nos î veûrans dès mèrvèyes
S'il èst vrèy çou qu'on m'a dit
Marèye
Nèni, ciète, i fait trop freûd;
Dji n' sâreû èri dè feû.

II.
Liz’bèt′
O ! vin don, pauve èdjalêye !
Ti vous-se broûler lès mustês ?
Qwite tès djambes dèl tchiminêye
Et prind è t' brès′ on banstê.
Marèye
Po qwè fé ? Po wice aler ?
Qui gn-a-t-i qu'est-arivé ?

III.
Liz’bèt′
On dit, dji n' sé s'il èst vrêy
Qui l' Mèssèye nos èst-oûy né :
Lès bièrdjîs a grande cowêye
L'ont, so m' fwè par assûré.
Marèye
O ! qu' savèt-i, lès bièrdjîs ?
Qu'èst-ce qu'èl'zî as-t-anoncî ?

IV.
Liz’bèt′
L'andje Gabriyèl, à mèye-nut′
Âs tchamps l’zî a-t-anoncî
Et lès andjes avou leûs flûtes
Djowet dèl muzique al mis.
Liz’bèt′
Grand Dièw ! dji n' è saveû rin !
Djans ! Corans-î tot rad’mint.

V.
Liz’bèt′
Ça ! N'î coûr nin come ine sote;
Prind dès fahes èt dès lign-rês :
On dit qu'ènn’a nin ‘ne flibote
Et nin si long qu' on bindê
Liz’bèt′
Diè ! qu' èst-i don pauvriteûs !
Il èst si pauve qu' on bribeû.

VI.
Liz’bèt′
Si dj'èsteû on pô pus ritche,
Dji m'tchèdj’reû bin, par ma fwè
Di pan’hês, di fènès mitches,
Di crènés plein nosse bodèt.
Liz’bèt′
Tinez ! V’la ‘ne djusse di lècê.
Sitopez-mèl d'on navê.

VII.
Liz’bèt′
O ! ça, v’-nos-ci arivés :
Loukans turtos d'intrer d’vins
Sûvez-me qui a bone vol’té !
Por mi, dj'a trové l' moyin.
Liz’bèt′
Nos n' avans qu' fé do fôrcer :
Tos lès payous sont trawés.

VIII.
Liz’bèt′
Bondjoû, binamé gros mâye
Mi binamé gros godon !
C'èst vos qui nos f’rè nosse pây
Et nos obtinrè pardon.
Liz’bèt′
Ci serè vos qu' doûvèrrez
Li paradis qu'èst sèré.

IX.
Liz’bèt′
Dimandans turtos a s' pére
Li pèrmission dèl bâhî.
Liz’bèt′
Non fait ! dimandans-le a s' mére :
Ele nos l'acwèdrè co mîs.
Mére di Dièw, vis plaîst-i-bin
Qui nos l' bâhanse on moumint ?

X.
L' Aviedje
Dji v’s èl pèrmèt′ toûr a toûr,
Mins qui ç' seûye tot bin doûcmint.
Qu'on nèl bodje nin djus di s' foûre
Afin qu'on nèl kiboye nin.
Marèye èt Liz’bèt′
Ârans-ne mây on tél bouneûr
Qui d'abrèssî nosse Sâveûr ?

XI.
Liz’bèt′
Qué damadje qui cisse djournêye
N'a nin qwinze, saze eûres di djoû !
Nos f’rîs ine boune règalêye;
Nos fricass’rîs l' poye èt l'oû !
Dinans vite ço qui n’s avans :
Il èst târd, nos è rirans.

XII.
Liz’bèt′
Si târd qu'i seûye fans ‘ne aubâde
So nos flûtes èt nos håbwès.
Vin vès cial, cusin Erade !
Ti djowes si bin so l’ huflèt.
Turtos
Turlutu è turlutu :
Adiè, binamé Jésus !

Note Wikisourd

Aschoûtåve e tchantaedje d' ene tchantreye (sol sitroete plake "Noyés walons", accint do payis del Viye Såm)