Uzeu:Srtxg/L' arpagon eyet l' savtî

Èn årtike di Wikisource.
Aller à la navigation Aller à la recherche
L' arpagon eyet l' savtî
ratournaedje da Srtxg e rfondou
2020


Èn arpagon dmoréve lé l’ savtî Djåke Criyård,
Eyet di djoû å niût, i n’ fjheut k’ roufler ses liårds !
Mins i n’ åreut nén seu peter on some.
Djåke, å contraire, c’ esteut èn ome,
Ki doirméve, ki tchantéve, a discheter s’ goyî.
Et cwand l’ amasseu vleut sokyî,
I vos l’ rewoeyive co pus rade,
E fotant ene di ses rôlades !
« Pocwè djheut i l’ avare, çk’ on n’ vind nén å martchî
Do soumey, come dji vind, les waeyéns d’ mes paxhis ? »
I fwait vni Djåke, didins s’ måjhone,
Avou s’ cindrén et s’ cråsse marone.
« Schoûtez Djåke, so èn an, cwè poloz bén wangnî ?
Dit-st i l’ avare å noer savtî ;
Ki lyi respond : « I n’ a nén co stitchî dins m’ tiesse,
Di carculer ça so papî !
Dji n’ etasse rén dins m’ dresse,
Dji so seulmint binåjhe k’ al fén,
Tos les djoûs dj’ a yeu m’ boket d’ pwin ! »
« Ebén par djoû ? dit-st i l’ crézusse, e clignant s’-n ouy :
« Kéke fwé pus, kéke fwé moens, dit-st i Djåke e riyant !
Mins djhoz k’ la ddins çki nos imbrouye :
C’ est k’ i nos fåt shure e priyant,
Les Påkes, les dimegnes et les fiesses,
Et k’ i nos fåt daler a messe,
So poenne di esse dåné,
Dit-st i l’ curé.
Pol moes Mariye, fåt payî leus guirlandes,
« A ls etermints, fåt daler a l’ ofrande.
A l’ eglijhe, c’ est todi payî :
Vni å monde, fé ses påkes, si maryî, yet mori !
L’ ritchåd riyeut come ene grosse biesse !
I lyi dit : « ådjourdu, dji vou k’ ti fwaiyes el fiesse :
Dji m’ va t’ diner ‘ne sacwè :
Va-z è cwer on bouli, do boure et do stofé.
Tén vla cint francs ! poite les rade dins t’ tirwer !
Po t’ è siervi, cwand t’ end årès dandjî. »
Djåke prind les liårds, i s’ è va boere
Ene pinte å cåbaret, i raconte ès-n istwere,
Et pu dins s’ cåve, i va radmint foyî,
Po-z eterer ses liårds, ki lyi fjhént tant d’ plaijhi !
E-n eterant ses liårds, il eteréve s’ bouneur !
I n’ pleut pus doirmi ‘ne dimey eure !
I n’ mindjive pus ! i n’ tchantéve pus !
I divneut setch come ene eschete !
Il aveut peu d’ esse ratindu,
Epwezoné ! stronné, ou ptete :
K’ on l’ trouve dins s’ lét assaziné !
Par niût, si l’ tchet fjheut tchaire, el cocmwår ou bén ‘ne tasse,
I sôtléve so s’ trintchet !
Po diskeude el carcasse
Å prumî k’ åreut vlou waitî d’ lyi prinde ses liårds !
I lyi åreut rade mostré cwè çki c’ est d’ Djåke Criyård.

Oyi mins di ç’ trén la, il a rade yeu stî lasse !
I prind les liårds, i pårt, vént dire a l’ arpagon :
« Rindoz m’ èm fwin, èm some, eyet m’ vwès d’ basse,
Eyet rpurdoz vos picayons. »

MORÅLE :

Estitchîz vs bén tertos dins l’ tiesse :
Ki l’ contintmint passe el ritchesse.