Dj’han-Piére èsteût r’qwèrou di totes lès djon.nès fèyes,
mins l’ crolé passeû d’êwe riyéve di leûs-amoûrs
Èt djamåy nole di zèles n’aveût fêt toketer s’ coûr.
Dè l’ wåmîre å tchèstè, ci n’èsteût qu’ine complinte :
On djåséve dè djon.ne ome, tél qui ç’ fouhe on sègneûr,
Èt pus d’ine grande madame ènn’åreût fêt s’ monkeûr.
Mågré totes lès promèsses, li vîreûs passeû d’êwe
Riboutéve li marièdje et lès sètch di skèlins,
I n’åreût nin d’né ‘ne cens’ po diveni tchèsturlin.
Li passeu d’êwe in.méve ôte tchwè qu’ine tchèsturlin.ne :
Si rapècetêye nèçale èt sès vîs navurons
Lî d’nît dès-ôtès djôyes qui l’ pus bèle dès mayons.
A l’êreûr, on l’ vèyéve tot-avå nosse bèle Moûse;
Si prôpe vantrin d’ grîse teûle èt si p’tit coûrt såro
Lî d’nît l’air d’on randahe qu’åreût mêstri lès flots.
Nosse clére êwe, po Dj’han-Piére, ridohîve di carèsses;
Si vwès, doûce èt nozêye, gruzinéve tot dè lon
Dès saqwès qu’on tchantéve è nosse payîs walon !
Lès prétins plins d’ sinteûr passèt come dès nûlêyes,
Lès tchansons divenèt vîles, on candje d’êr mågré lu,
Lès rèspleûs qu’on-z-in.méve si roûvièt sins l’ savu…
Li nèçale d’à Dj’han-Piére è-st-èvôye dji n’ sé wice !
Dè crolé passeû d’êwe, asteûre, li fåve èst foû.
Avou sès vîles candes, i s’ ripwèse ås Tchåtroûs…
Uzeu:Reptilien.19831209BE1/sobalance/Li passeû d’êwe
Loukîz vaici. Radjouté pa Lucyin li 23 di fevrî 2021, tot pinsant ki c’ esteut li felerijhaedje da Maurice Piron, mins l’ ortografeye n’ est nén l’ minme, loukîz cial. Sourdant nén cnoxhou.
Li passeû d’êwe
Li passeû d’êwe