Les d'jeus, les t'ch'faus, les t'chéns, les fisiques èt les gruwes
Les bablutes, les t'ch'mins d'fier, les bublots, les batias,
N'sont pu qu'in sondge pour vous. Vos avè pierdu d'vuwe
El grand Saint Nicola èt tous ces clikotias.
O cange sus wère di temps. Ainsi l'annéye passèye
Vos m'tîz co vo platène rimpliye di gros toutchas
Délé l' t'chèminéye. Toute èl nut, vos pinséyes,
Vos priyères astin'nt pour li : pou l'bon Saint Nicolas.
Ataulè à vos dwèrs, c' t'à pène s'on vwè vo tiesse
Padri las tas d'kayets, lives èt tout l'saint frusquin ;
On n'pout nén vos parlér. Pour vous, aster, c'est fiesse
Quand vos pouvèz r'nachi dins tous les p'tits bouquins.
C'est qu'vos avèz grandi ! Adjeu tous les d'juglatges,
Les condgis pou des réns ; faura d'mèré au sto.
Et momint c't'arruivé de vos armer d'courâtge
I faudra piyochi, trimé, buchi d'asto.
Tout âdge à ses pléjis. El viye est s'ainsi fète :
Efant, o d'jouwe volti; pu tard c'est les tracas.
Pu vîx c'est co aut'chouce ... et bén souvint o r'grète
El temps qu'o m'tout s'chabot, l'vèye dè Saint Nicolas !
Uzeu:Reptilien.19831209BE1/sobalance/Adjeu Saint-Nicolas
Loukîz vaici. Radjouté pa Lucyin li 28 di setimbe 2020, d’ après èn emilaedje di 1998 da Daniel Sotiaux, ki Jules Vigneron sereut « un grand oncle ». Ortografeye nén acertineye ! D'après on papîscrît ?
Adjeu Sint-Nicolas
diviè 1930
Adjeu Saint-Nicolas