Matî, colebeu et mwaisse d' èn ovroe d' årmurî
Nanesse, si feme
Nonård, ovrî da Matî
…
Matî (tot sondjant) - Les veces sont padrî l’ ouxh…
Nanesse (si rtoûne tote mouwêye) - Ki t’ m’ as fwait sogne !… La ! i doime !
Matî (todi sondjant) - C’ est l’ peket.
Nanesse (tot s’ måvlant) - Et vola cmint k’ i s’ arindjèt ! N’ est ç’ nén po vs fé potchî foû d’ vos clicotes ? Ir, il a cwité s' visse k’ i n’ esteut nén cwatre eures, il a passé l’ nute a boere al Societé ; asteure vo l’ la, loukîz, l' bea boket. A ! les colons, les colons ! Si dji tneu li dierin, il åreut seur fwait s’ dak ! C’ est li rwene des ptits manaedjes d’ ovrîs ! Torade, c’ est po des veces ; torade, c’ est po taper, po les coreus, ki sai dj’ don, mi ? Sins conter çou k’ on lait-st al candjlete et çou k’ on pied a l’ ovraedje. Loukîz, djans, loukîz ene gote ké vizaedje ! Pa ! seur k’ i dvénrè bômel, el divénrè-t i ! (Ele l’ apougne pa l’ bresse tot breyant) Matî ! Matî ! On-z est rivnou !
Matî (s’ dispiertant) - Il est rivnou ! Coroz l' (I s' dresse). Abeye, Nonård ! Wice ess don, pourcea ?
Matî (a Nonård) - Et l’ colon ?
Nonård (ewaeré) - Ké colon ?
Matî (a Nanesse) - Ki djhîz vs don, vos, k’ esteut rivnou ?
Nanesse - Vos n’ savoz çou k’ vos racontez ! Dispiertez vs, alez, vos sondjîz ! (A Nonård) Avoz vs rintré les ovraedjes, ir al nute ?
Nonård (djinné) - Neni, nosse dame : li mwaisse a cwité foirt timpe et dj’ n’ a polou fini tot seu ; portant, dj’ a-st ovré roed, savoz !