Uzeu:Lucyin/djermons/Li Bleû-Bîhe

Èn årtike di Wikisource.
Li Bleû-Bîhe
rortografiaedje da Jean Haust

Matî, årmurî
Nanesse, si feume
Nonår, ovrî d'a Matî

Sinne V
Nanèsse, Matî

Matî (tot sondjant) - Lès vèces[1] sont podrî l’ ouh

Nanèsse (si r'toûne tote mouwêye). - Qui t’ m’ as fait sogne !… Lâ ! I dwèm !

Matî (todi sondjant) - C’èst l’ pèkèt.

Nanèsse (tot s’ måv'lant) - Èt vola k’mint qu’ s’arindjèt !… N’ èst-ce nin po v' fé potchî foû d’ vos clicotes ? Îr, il a cwité s' vis′ qu’i n’èsteût nin qwatre eûres, il a passé l’ nut′ a beûre al Sôcièté ; a c'ste eûre; vo-l’-la, loukîz, l' bê bokèt.  ! lès colons, lès colons ! Si dji t'néve li dièrain…, il åreût sûr fait s’ dak ! C’èst li rwène dès p'tits manèdjes d’ovrîs ! Tot-rade, c’èst po dès vèces ; tot-rade, c’èst po taper, po lès coreûs, qui sé-dj’ don, mi ? Sins compter çou qu’on lêt-st-a l' canliète èt çou qu’on pièt′ a l’ovrèdje… Loukîz, djans, loukîz 'ne gote qué visèdje ! Pa, sûr qu’i d'vinrè bômèl, èl divénrè-t-i ! (Èle l’apougne po l’ brès′ tot brèyant) Matî !… Matî !… On-z-èst rim'nou…

Matî (s’ dispièrtant) - Il èst rim'nou !… Corez-l' (I s' drèsse). Abèye, Nonår ! Wice ès-s′ don, pourcê ?

Sinne VI
Lès minmes èt Nonår qu’inteure a dreûte

Matî (a Nonår) - Èt l’ colon ?

Nonår (èwaré) - Qué colon ?

Matî (a Nanèsse) - Qui d'hîz-v' don, vos, qu’ èsteût rim'nou ?

Nanèsse - Vos n’ savez çou qu’ vos racontez ! Dispièrtez-vs, alez, vos sondjîz ! (A Nonår) Avez-v' rintré lès-ovrèdjes, îr a l' nut′ ?

Nonår (djinné) - Nèni, nosse dame : li maîsse a qwité fwért timpe èt dj’ n’a polou fini tot seû ; portant, dj’a-st-ovré reû, savez !

Note Wikisourd

dins: Henri Simon, « Quatre comédies liéeoises », texte établi et annoté par Jean Haust, collection « Nos dialectes » n° 5, Vaillant-Carmanne, Lidje, 1936, p. 12.

Pî-note

  1. metou estô di « vèsces »