C'èst twâs p'tits mots come twâs p'tits princes
qui dans’t-in rond, s' tènant pô bras ;
ça monte al tièsse, sans qu'on-i pinse,
c'èst twâs p'tits mots nîⁿ pus wôts qu' ça.
Quand l' solèy bleûwit lès stokéyes,
quand l' breune trinne dèvins l’ pèrfond k'min,
on lès-intind l' long dès-uréyes,
yun pa d'rî l'ôte, passer doûç'mint...
…èt voler, skeûjant leû n-ariète
dè su l' bouche dès galants roudjots ;
c'est twâs p'tits mots toudis in fiète,
c'èst twâs p'tits tchats qui font l' gros dos.
Èt c'èst pour vous, si fignolète,
pou vos grands-îs, bleûs come el djoû,
pou l' clére dantèle dè vo risète,
què tout-ô long, dju lès scrîroû
si d' povoû coyî vos pinséyes
'yèt vîr què vos n' riyèz nîⁿ d' mi…
Mès vos v'la toute inscoubaréye…
S'roût-i vré ? Vos m'ârîz compris ?
Li discôpaedje e hagnons a stî ene miete ricandjî roci.