Quand nos sintrans nos spales divenu pâr trop naujîyes
D'awê pwarté les crwès qu'on rescontère dins l'vîye,
Quand n's-ârans ascauchi tos deûs l'sou dèl vîyesse
Qui les-ans, les chagréns âront blanki nos tiesses
Qui nos térans bachîyes quand nos nos pormwinnerans,
Come po mia wêti l'têre èwou qu'nos nos r'pwaserans,
Quand nos brès sèront flauws èt nos pîds bin pèsants,
Nos cœûrs dimèrés djonnes s'inmeront come a véngt ans.
Nos nos r'trouverans nos deûs dins ène maujo d'seûléye,
Et nos n'quiterans pus wêre nosse fauteuy dé l'aistréye…
Les pwinnes âront flani vosse bia roselant visadje…
Dji vos wè tricotant des tchaussons, des cwârsadjes,
Qui v'vôriz mète vos-minme aux-èfants d'nos-èfants…
Aus djoûs d'fiesse, plaise-t-a Diè, èchène, nos nos r'trouverans,
Et a les r'vôy tortos, nos nos radjonnirans :
Nos lèpes ridîront co les minmes mots qu'a véngt ans.
Nos vikerans dins l'passé, pacequi nosse pôve mémwêre,
Ni s'sovenant pus d'ayîr, nos-ètrinnerè tofêre
A d'viser do vi timps, li cén d'nosse bèle djonnesse,
Li cèn éou qu'l'avenir estait rimpli d'promesses…
Quand i frè bon assez, nos n's-achidrans d'sus l'banc.
Si l'timps vént a frèchi, ma fwè, nos nos r'sérerans,
Dji d'manderé tènawète: « N'avoz nén frèd, Moman ? »
En r'montant vosse mouchwè dèl minme djesse qu'a véngt ans.
Mi tiesse, po s'aspouyî, cléncerê su vosse sipale.
Mi bouche, sins l'fé esprès, rif'téyerê vosse massale,
Mi brès, par habitude, passerè autoù d'vosse taye,
Mins vos n'mi diroz pus: « Il est grand timps qu'dj'èrvaye ! »
Et à nos vôy ainsi tos les deux, nos sondjerans :
Est-ce possibe po des vîs, d'todi s'inmer ostant !
Vos soriroz doucemint, èt quand nos nos r'wètrans
Nosse rigard sèrè ténre, todi come à véngt ans.
Li tite estant e grandès letes, i n' est nén possibe si sawè si li dvancete « a » est scrîte avou u sins accint (les deus cogne sont dins l' tecse)