Elle èst por vos,ci p'tite tchanson
Vos l'boskiyon qui sins façons
M'a d'né dè bwès po fé dè feû
La qu'dj'èsteû câzî mwért di freûd
Vos qui m'a bin restchafé cwand
Lès vergougneûs lès mâs pinsants
Tos lès flêrants èt lès glawènes
M'avîs r'clapé l'pwète a l'narène
C'n-esteût qu'ine pougnèye di cayèts
Assez po r'tchâfer mès ohês
Pus-awoureûs qu'on pâcolèt
dj'èsteû come divins on banquèt
Vos l'boskiyon cwand vos n'îrez
Qui l'côrbiyârd d'vrè v's-èminer
La qu' vont tos lès cis qui n'sont pus
Al bone wâde di Diu.
Elle èst por vos ci p'tite tchanson
Dame dè lodjis' qui sins façons
M'a d'né quéquès tâtes di sayin
La qu'dj'èsteû câzî mwért di fin
Vos qui m'a si bin r'pahoût cwand
Lès vergougneûs, lès mâs pinsants
Lès djins qu'inmèt bin d'intriguer
Avîs bon di m'vèyî didjuner
C'n'èsteût portant qu'on boquèt d'pan
Qui m'rindéve on pô pus valyiant
C'èst vos qu'ârèt l'pus bê boquèt
D'maveûr mètou so l'houpdiguèt
Dame dè lodjis' cwand vos n'îrez
Qui l'côrbiyârd d'vrè v's-èminer
La qu'vont tos lès cis qui n'sont pus
A l'bone wâde di Diu
Elle èst por vos ci p'tite tchanson
Vos l'ètrindjîr qui sins façons
D'in êr mâlureûs m'a sori
Cwand lès gablous m'on-st-apicî
Vos n'avez nin aplôdis cwand
Lès vergougneûs lès mâs pinsants
Lès djins qu'inmèt bin d'intriguer
Avîz bon di m'veûye èminer
C'n-èsteût portant qu'on pô dèl lâme
Mins èle m'aveût rihandi l'âme
Dè fond dè coûr dji v'dis merçi
vos m'drovez l'pwète dè paradis
Vos l'ètrindjîr cwand vos n'îrez
qui l'côrbyiârd d'vrè v's-èminer
La qu'vont tos lès cis qui n'sont pus
A l'bone wâde di Diu.
Tchanson po l'boskiyon
Ciste ouve ci egzistêye eto divins ds ôtès ortografeyes : Rifondou walon.Tchanson po l'boskiyon
Tchanson po l'boskiyon