Lu prôze racontrèce a walon è souvint coume sûmint des spoûles ki s’ passat mon les ptitès djins dins in viadje û l’ôte doul Walonîye, atur 1900 èt 1960. K’on pinse aus tites k’ont parèchu dins çu rilêye ci, coume: Lès Têres dau Bon Diè (Henin), Treûs contes (Masset), Blawtèdjes di veûles å solo (Van Damme), Li djoû k’i ploûra dès pupes di tére (Fauconnier) et nosse « Putite coumére avu la blantche camisole ».
Dju n’ tchindjrans nin çu-t aladje la, k’è veû flori des mwêsses coume Calozet, Laloux, Matterne, sins rouvyî des tout djônes coume Brackman.
C’est dins l’ minme êrance ku vous froz cnuchance avu lu Ptit Maurtin dins « C’est toudi l’êwe ku dwame ki nèye », èt, pus raddumint, avu Tibî Mèyî èt Colin Djôris’ dins « A tchikètes a miètes ».
Ène ôte sôrte du prôze racontrèce, c’est des contes èt des rapwatroûles ki sont fû dou tins, û dins in monde fû-naturel. Russondjans a « Li Rodje Dame » (Boussart), « Contes » (Spinosa-Mathot), û aus « Sacantès Fauvirètes di yute di d’ ci. » (Hendschel). Vous trouvroz çu modèle du scrîjadje la dins « Lu ptit rawtê », èt « Lu ptit nûton d’ Cwî ».
Mês voula k’on-z è veû skèpyî, lanawêre, ène nouvèle sôrte du prôze racontrèce, duslachêye des haurds ki l’ raloyint al termine 1900-1960, èt ou rondê doul Walonîye. Ça fwêt ki « Contes d’on payîs d’ôte på » (Houbart-Houge) su passe a Pologne, « So les tiènes » (Gilliard) dins l’ nonne du France, « Vè l’anuti » (Hendschel) dou tins des Autrichyins, èt « Di d’ lon » (co Hendschel) a Mongolîye.
C’est chûr lu pazê ku dju vons apwinter dins les anêyes a vnu. Il est dèdja afroyî ciddé avu l’ fin du « C’est toudi l’êwe ku dwame ki nèye », ki s’ passe a 2005, èt « Itto Oukemmou », ki s’ rapwate a des èvènmints ki s’ont passé a-n Aldjèrîye duvè 1994.
Pôrot valu ku ces ptits racontadjes ci alaurdjichinche ène miète lu tchamp des bèlès lètes walondes. Des bèlès lètes ki su dvat afrantchi pâr, pou polu tossi bin djauzer des fraudeûs d’ drogue a l’ Colombîye, ku des Ârdinoûs k’astint avu Wôfrèd d’ Bouyon a l’ prumîre croûjâde, la 900 ans pètants, ûcobin d’èn omosècsuwel ki mûrt dou sida.
Pou ça, i nous fåt duspoûjî les nuzoumès cwâlités dou lingadje, èt s’ fwêre toutes les sayes possibes, les classikes èt les nin classikes. C’est l’ seûle rèchuwe pou l’ sucrîjeû nu jamwês yesse a stok.
Adrovaedje d' ene ramexhnêye di noveles lomêye «Ramèchnêye», atåvlêye po-z esse metowe dins li ptite coleccion di l' SLLW, mins måy eplaideye.
Li mwaisse tecse di 1995 a stî ramidré e 1996, sorlon les dmandes des prumîs lijheus. Mins, ciste anêye la a parexhou li «Papî Ltchanteu disconte do rfondaedje do walon et des noûmots» ki va dicter a l' SLLW ene politike pår disconte li voye asprovêye pa l' oteur cial.
L' ortografeye, c' est l' cene ki li scrijheu sayive dins si Rasgoutadje des bassårdinreces, ene sôre di rfondant walon po l' Årdene nonnrece, mins ki dmeure ådvins do sistinme Feller.