Lë Nwêr Boton a vèyë l’ djoû dins l’ Corporâcion dès Romans Scrîjeûs » qu’aveût skèpî à Auve lë 27 dë sètimbe 1969.
Bén qu’avë stî èlèvé è walon dins l’ cinse de mès parints à Mélin, djë d’mëréve à Djëblou po m’n-ovradje ! C’èst bén vélà ; è 1965 quë dj’a rèscontré Lucien Somme, à quî qu’ dj’aveû mostré cë qu’ djë s’crijeûve. Ë m’a prësinté au « Rèlis Namurwès » à Nameur. Dj’î a stî tameji à l’ passète aus scrabîyes, dins lès mwins dè l’ Présidint Lucien Léonard après-avë faît mès preûves one cope d’anéyes.
È 1968, Lë soce dès « Rèlis Namurwès » à drovë s’-t-ëch à André Dewelle dë Djodogne, èt Henri Lerutte dë Djausse. Monsieû l’ këré Gids, doyén d’ Auve, èsteûve dë bone conèchance avou Lucien Léonard : le présidint dès Rèlis Namërwès Ë lî a faît soyë qu’ dès scrîjeûs walons, ë ènn’aveût à chepléye dins l’ Brabant Walon. C’èst come ça qu’ l’ëdéye dë mète së pîds one soce dë scrijeûs walons à Auve, à djèrmé dins leû tièsse !
Èlle a prins l’ nom d‘ « Corporâcion dès Romans Scrîjeûs » à l’ocâsion d’ leû prëmi raplou le 27 dë sètimbe1969. Ë s’ont ègadji à dësfinde leû lingadje, dë totes leûs fwaces avou come parole : « Rén sins rûjes »
À combén èstîn’ cë djoû là ? Djë n’ vos sareû pës dîre. C’èsteût më l’ pës djon.ne. Mins dj’a bén comprins quë dj’ mèteûve më sëgnatëre au d’zo d’on papî quë m’ lôyive à tot jamaîs à dësfinde lë lingadje dë nosse man !
Nosse prëmî présëdint à sti Jules Flabat dès Rou-Mërwè èt nosse sècrètêre ; Marcel Èvrard dë Saut-Monsieû-Djame. Lë prëmi nëmèrô dè l’ Nwêr Boton à vèyë l’ djoû è 1971. Dj’a yë l’oneûr dè l’ prëmëne pâje.
Poqwè l’ Nwêr-Boton, ? Pace quë c’èsteût l’ punëcion quë l’ maîsse doneûve au scoli quë rèspondeûve è walon dins l’ coû rècrèyacion.
Lès noms dès prëmis membes : dj’a peû d’ènnè rovi onk. Èt ça n’ sèreût ni comëfaut po tos l’s-ôtes. Todë è-st-ë qu’on-z-a vèyë ç’ djoû là qu’ nos-avîne dëpës dë scrîjeûs qu’aus Rèlis Namurwès.
Lë « Nwêr Boton » aveût drovë s’-t-ëch à dès membes quë scrîjîn’ èto è françès. C’èsteût foute lë tchèt dins lès pôyes. Chaque lingadje à tchwèsë s’ novèle planète. Lë Nwêr Boton à tchandji d’ nom è 1983 après l’ nëmèrô 116, po dëv’në « L’ Sauvèrdia » qu’ènn’èst à s’ nëmèro 394 cë mwès d’avrë cë è 2022. Po dî numéros quëparètenënt par an, ça nos faît d’djà 51 ans.
Dès djins qu’ont pwârté l’ « Nwêr Boton » à batème ; i n’ dëmèreûve pës qu’ J-Jacques Gaziaux èt më… Jean-Jacques è r’monté au paradës dès scrîjeûs walons, le 31 dë janviér 2022…