Dji n’a jamaîs stî one saqui qui s’fieûve do mwai song à cause do timps, et s’ plinde à l’ plaîve ou co bin d’zo lès nûléyes. Djusqu’à l’ djoû qu’on-z-a stî oblidjî di d’morer rèssèré.
Mi v’là don, tot seû à m’ maujone, avou l’ seûl plaijî d’ choûter crèche mi baube ! Vos v’loz rîre dandjureûs ! Vos v’ sov’noz di quén mwois d’ may’ di m… qui n’avans yeû !.
Eûreûsemint qui m’ vijène à on tchin èt qu’èle ni sét pus roter. C’èst mi què l’ pormwin.ne. À co bin, oudobin dj’areû d’ moré rascrauwé, à mitan mièrnu su l’ moquète :
« Alô Uber Eats ? Vos m’ v’loz bin m’apwarter dî sèt Giant d’ad’lé Mac Do èt doze pot d’ crinme à l’ vanîye, c’èst por one saqwè qui prèsse ! »
Djè l’ veû bin audjoûrdu, quand dji drove mès rayènes, et qui l’ solia m’ tape à l’ouy èt m’ prinde dins ces brès come po m’ rabrèssî. Dji n’ vos raconte nin quén plaîji qu’ dj’a, à razouyî mès pots d’ fleûrs, qui dj’aveû laiyî là, à mitan crèvé d’ssu l’ balcon. I ravikenut !
Èt mi èto ! Mi song si r’tchaufe dins mès vwin.nes I-gn-a co do vète dins mès cayèts. Dji m’ sorprind à racawaîtî lès coûtès cotes qu’ascauchenut à pagna volant su l’ vôye do mârtchî.
Bon, po fé pus coût : mèrci branmint dès côps à l’ covid qui m’a mostré qu’ dj’aveû co do keûr po l’ timps qui faît !
emilêye a Uzeu:Lucyin avou come tite « po l' Rantoele » li 12 di djun 2021.