Prumire lete da sint På ås djins d’ Corinte/XIII
XIII
1 – Cwand dji cåzrè les lingaedjes des djins eyet des andjes, si dji n' a nén l' amour, dji so di bronze ki bouxhe ubén ene cloke ki sonne.
2 – Cwand dj' årè el bistoke des profetes, del syince di tos les misteres eyet totes les sepyinces ; cwand dj' årè li fwè a fé bodjî les monts, si dji n' a nén l' amour, tot ça n' sieve a rén.
3 – Cwand dji dinrè tot ç' ki dj' a åzès pôves po ki mindjnut ; cwand dji dinrè m' coir po-z esse broûlé, si dji n' a nén l' amour, ça n' sieve a rén.
4 – L' amour a bén l' tins, l' amour est po aidî, i n' est nén djalot ; l' amour ni s' vante nén, i n' si gonfele nén po esse veyou.
5 – I ni fwait nén so çk' i n' fåt nén, i n' catche nén a wangnî, i n' pestele nén ey i n' sondje nén a fé do må.
6 – I n' si plait nén di ç' ki n' est nén djusse, mins i catche après l' veur.
7 – I pardone tot, i croet tot, il espere tot, il edure tot.
8 – L' amour ni tchait djamåy. Ki ça soeye des profetaedjes, des linwes, del sepyince ; i sront arestés.
9 – Paski c' est a mitan ki ns advinans ki nos cnoxhans.
10 – Totfeye, cwand l' ci ki srè parfait årè vnou, c' est l' ci k' est a mitan ki srè aresté.
11 – Cwand dj' esteut èn efant, dji cåzéve come on gamén, dji tuzéve come on gamén. Cwand dj' a divnou èn ome, dj' a aresté d' esse èn efant.
12 – Ouy, nos veyans pa on muroe, d' ene môde nén foirt claire, mins adon, nos virans djaive-a-djaive. Ouy, dji cnoxhe a bokets, mins adon, dji conoxhrè come dj' a stî cnoxhou.
13 – Asteure, troes afwaires dmeurnut : li fwè, l' espwer, mins l' pus foirte, c' est l' amour.