Vos vikeroz sins mi. Vos m’ doneroz vosse pardon d’ moru avant vos. Dj’arè yeû l’ mèyeûse dès paurts è rindant m’n-âme li prumî ! S’on saveût mèsurer noste amour avou dès liârds, nos-ènn’ârîn’ plin nos potches. On s’a vèyu voltî come dès sots, mins nos, on s’arè vèyu voltî djusqu’à nosse dêrin djoû.
Vos, vos-avoz d’jà moru on djoû : li djoû qu’Alzheimer à prins tote vosse tièsse. Mins vos-ouys rilujenut co d’ plaijî quand dji m’achid à vos costés. Vos-avoz co d’pus d’ santé qu’ mî. Seûr qui dj’ènn’irè po d’ bon avant vos.
Quand dji n’ sèrè pus là, quî ç’ qui waîterè à vos ? Quî ç’ qui sârè co lire dins vos-ôuys ? Quî ç’ qui compudrè co c’ qui v’ v’loz, come djè l’advineûve.
Dji n’a pus l’ timps d’èdaumer lès-ovradjes po bin fé comprinde qui nos nos vèyîn’ voltî come jamaîs. Ça mèritreût on grande paje dins l’ lîve dès r’côrds. One miète di r’conèchance, ça n’ faît pont twârt à pèrson.ne. On s’a tant vèyu voltî ; à n’ nin crwrêre ! Di tote maniére, nos n’avîn’ pont d’ambicion. À fwace di nos veûy tant voltî, nos n’ vèyîn’ pus ç’ qu’i s’ passeût autoû d’ nos.
« Nos n’avans nin sayî d’atraper l’ bouneûr à l’ poujète ou avou on filet po lès mouchons. »
Nos n’avans jamaîs yeû dandjî d’on-aparèy à fotos. À paurt lès cènes dè l’ djoû qu’ nos-avans rèchu su l’ têre, lès cènes di nosse mariadje, quétefîye li cène prîje par on plankèt li djoû qu’ dj’a tapé djus : nos n’ laîrans pont d’imaudje di nosse bouneûr. Lès seûles qui nos r’chonenut co, c’èst lès cènes di d’ssu nosse cârte d’identité.
« Nos-ènn’avans yeû do timps ! »
Tos lès djoûs c’èsteût solia por nos, totes lès saîsons, totes lès-anéyes. On s’è fouteûve di prinde di l’âdje. Nos n’avîn’ nin dandjî d’ murwè. Nos savîn’ qu’ bin lès rôyes, lès tchènus, ci n’èsteût qu’ dès minterîyes : dès brûts cosèmés d’ssu nosse vôye pa dès djalous.
« Dji voureû bin qu’ vos m’ mètriz one couvêrte dissu mès spales. »
Vos n’ savoz pus causer ni v’ fé comprinde, mins quand c’èst mi qui d’mande, vos-èstoz todi l’ prumère.
Li djaléye à ratindu qu’ nosse tchôdêre tchaîye èn pane po nos sorprinde. À l’ospitau, ça sèreût d’dja r’tapé, mins dj’inme mia moru véci è nosse maujone. Dji pudreû co bin one bone jate di bon cafeu, si vos-ènn’avoz co dins l’ tèrmos. Tot-à l’eûre dji mindjerè on couyî d’ crinme vanîye-chocolat. Si dj’ tins co djusqu’à l’ Noyé, dj’arè mès-ans, quatrè vingt-ans vîs ; vos m’ pouroz quétefîye co fé glissî one pitie couyî d’ Champagne yinte mès lèpes.
« Purdoz mès mwins, come dè l’ glace po lès rèstchaufer pa d’zo vosse cote. »
Dji voureû bin qu’ vos m’ tchanteriz one tchanson d’ nosse djon.ne timps. Dj’a pièrdu lès paroles. Atrape onk dès-aîrs qui toûne au d’zeû di m’ lét. Waite li lune, ti direûs qu’èle a dès varices. Tot ç’ qu’èle mèrite ; c’è-st-on côp d’ fusik !
« Mèt l’ courant à l’suçeû d’ pouchêre po satchî l’ nut pus rade, po qu’ dj’auye cor on djoû d’pus. »
Rissatche mi foû di m’ lét d’ sofrances po qui dj’ vôye dîre ci qui dj’ pinse à l’ fîve, à mès maus, à mès peûs. Dispètchîz v’, dispètchîz v’, dji n’ vou nin moru sins l’zeû dîre leûs quates vèrités yinte quate-z-ouys.
« I-gn-a sèt solias dins l’ grande drèsse. Drove lès deûs batant tot laudje. »
Dji vou moru asblouwî !