Pawoureûsté

Èn årtike di Wikisource.
Ciste ouve ci egzistêye eto divins ds ôtès ortografeyes : Rifondou walon.
Pawoureûsté
rortografiaedje da Maurice Piron
Pawoureûsté

Dizo l' bleû cîr, l'arondje
pidjoléve djoyeûs'mint
èt, come lèye, mès p'tits sondjes
s'ènêrît lèdjîr'mint.

Qwand, tot d'on côp, 'n-orèdje
vina rèvinter tot;
èt mès sondjes, è fouyèdje
si såvît come des sots.

Li tére si lamièn'téve
èt m' Boneûr djèmihéve
come in-oûhê blèssî…

Mins qwand, k'hiyant 'ne nûlêye,
li solo fa 'ne trawêye,
tos mès p'tits sondjes tchantît !