Cisse pådje ci a stî coridjeye ey est l’ minme ki l’ sicanaedje.
DEUJHINME AKE
SINNE I
EMILE (cwerant on col)
Dji n’ sai vormint wice ki m’ mame a metou mes cols !
(silince di kékès sgondes, i cwirt)
SINNE II
EMILE — DADITE
(rivnant d’ messe)
EMILE (veyant s’ mame)
A ! i n’ a nou må ! Vola ene eure ki dji cwir on col, mame !
DADITE
Vos n’ veyoz gote surmint m’ fi ; pa loukîz vola… cial tot droet, si ç’ aveut stou on tchén, i vs åreut hagnî.
EMILE
Bén alez, dji nel veyeut nén.
DADITE
A ! mins les omes, vos n’ trouvrîz nén d’ l’ aiwe e Mouze, dê vozôtes.
EMILE
Asteure, atelez mel on pô, si vs volez bén.
DADITE (disfijhant ses wants)
Leyîz m’ disfé mes wants todi. Djans vinoz cial. (elle atele li col a s’ fi) Oho, vos n’ savoz nén ? Dji vén do fé l’ voye dispoy l’ eglijhe diski cial avou madame Fordjeu…
