Pådje:Nicolas Defrecheux - Chansons wallonnes, 1860.djvu/12

Èn årtike di Wikisource.
Cisse pådje ci a stî acertinêye pa deus contribouweus.
— 6 —

Et ses deux lèp’ estît pus ros’ qui l’ fleur
Di nos rosîs.
Mâie nol fâbit’ n’a fait oyî comm’ leie
Des chants si doux.
Leyîz-m’ plorer, tot’ mi veie est gâtêie,
Ji l’a pierdou.

Vos âriz dit quéque ang’ vinou so l’ térre
Divint l’ moumint
Qu’ell’ pârtihév’ tot’ ses spâgn’ à l’ misére
Des ôrphilins ;
Ou qu’elle aidiv’ si veie mére à l’ vesprêie
Po r’monter l’ soû.
Leyîz-m’ plorer, tot’ mi veie est gâtêie,
Ji l’a pierdou.

Ji n’ pous roûvî qu’è l’ saison des violettes
Ell’ mi deri :
Louk’ ces ouhais apîstés so l’ cohette
Si fiestèt-i !
« Va, qwand on s’aim’, tos les joûs d’ine annéie
Sont des bais joûs. »
Leyîz-m’ plorer, tot’ mi veie est gâtêie,
Ji l’a pierdou.