42 LI PAN DE BON DIU
Èt, dismètant qu' sès p'tits cårpês, tot tchin'lant djowèt d'vins sès cotes, èle tchapote å mitant dèl mê. Qui mahe-t-èle la, èn on lawèt faît d'êwe, di farène èt d' levain?
Çoula, c'est l'åme dèl passe : c'èst çou quèl rind lèdjîre çou qui faît lèver l' pan !
Sop'rèce est faîte èt, tot man'çant sès djonnes avou s' deût plakî d' påsse, li mére lès tchèsse è leû bèd'rèye, la qu'i moussèt tot s' kihèrant.
XIX.
Li prustihèdje
Li p'tite crapaude, clintchèye sol mê, vûde tot doûcemint foû de cok'mår li tiène êwe inte lès mains di s' mére qui, lès mantches di s' capote trossèyes, kimahe li farène èt l' sop'rèce. Èt vola qu'à mitant dèl mê crèh on malkê, tot fî parèy ås houyots qu' lès gamins rôlèt so lès pindêyes dè timps d'iviér. Anfin, v'la l' dièrainne gote vûdièye! Li djonne wihète, rodje di plaisîr, si r'sètche, fîre d'avu d'né s' côp d'main, èt l' mére kimince a prusti l' påsse. Lès pogn moussèt, sôrtèt, rintrèt èl påsse bin cråsse qui plake ås deûts on l' bat', on l' toûne, on l' rôle sins r'pwès. — Corèdje, bâcèle, ni t' lê nin djes ! Come on l' prustih, on magne si pan. Ti sowes, ti gotes : qu'èst-ce qui ça faît? Qwiter l'ovrèdje, c'est piède li cûte. Profite dè timps qu' t'ès-st-è gorê ! Li påsse kimince a div'ni deûre. Èco ’ne miyète èt t'ès horêye… Qu'aveû-djdju dit?… Vola qu' c'èst faît! Li feume si r'drèsse, tote frèhe di tchaud, èt, po mîs r'prinde alène, aspôye so l' bwérd dèl mê
