40 LI PAN DÈ BON DIU
Èt c'èst chal qui l' pauve grain va pår sofri s' mårtîre. C'est chal qu'on l' va moudri po 'nnè fé l' blanke farène. Lès-ustèyes sont la prètes : c'est lès toûrs di molin. C'est d'abord li hossîre qui chèv a l' rinètî. L'ome î vûde li sètchêye avou 'ne pougnèye di tchås, tape l'êwe dèl vène sol rowe, èt vola tot d'on côp qu'on p'tit djoyeûs clap'tèdje s'èlîve come ine tchanson dizeû 1' brut d' l'êwe qui hûze èt dès fiérs qui crînèt.
Ine fwèce qui l' grain n' sâreût maîstri vis-èl roufèle inte di deûs pires, la wice qu'il est rôlé, strindou, hoyou, batou. — Rindou fin sot, vola qu'i rôle divins 'ne colîre, la qu'on soflèdje di diåle-volant vis-èl dihèdje di sès poûssîres èt v's-èl hène èn on sètch.
Mins çoula n'est qu'on djeû ; vochal li deûr hikèt. L'ome a d'dja r'pris l' moûnêye èt l'a lèyî goter è toûr qui faît l' farène. C'est fini dè pauve ho on nèl riveûrè måy. Inte sès djindrèyes di pire, l'ustèye èl tint dèdja. Vo-l'-la broyî, molou ; ci n'èst pus qu'ine poûssîre, qui l' sètchê va pårti : d'on costé, c'èst lès passes, qui l' bisteû s'è r'pahrè, èt d' l'aute, c'èst l' doûce farène, qui l'ome s'è tchèvihrè.
XVIII. Li sop'rèce
Li tchèsson vint dè r'prinde lès deûrès longuès vôyes, qu'il a fait tant dès côps, po r'pwèrter vès sès candes li doûce èt blanke farène qu'a molou l' vî molin. Èt c'èst d'main qu'on va cûre ; mins, po k'mincî l'ovrèdje, al nut' on f'rè sop'rèce : on vint d'aprèster l' mê. Al cwène dè feû, so deûs tchèyîres, li farène, tot come in-èfant, nanne bin påhûle èl grande vîle mê. Li feume va qwèri so l'ah'lète, èmé lès r'lûhants plats di stain, li levain pris dèl dièrainne cûte.
