38 LI PAN DO BON DIU
Si vîle rowe, magnèye dès mossês,
toûne lôyeminôyemint, tot tapant
dès longowès låmes èl bassène,
dismètant qu'è cwér dè molin
hoûle ine saqwè come on beûrlèdje,
qui faît tronler tot l' batimint.
Ine pèsante pwète, dizos 'n-årvô,
tape å lådje sès deûs vîs batants
po nos mostrer l' côp d'oûy dèl cour,
la qu'ine blanke volêye di colons
avou 'ne hiède di poyes si tchèvih.
In-ome, tot-èpoûss'lé d' farène,
è-st-aspoyî conte l'ouhèl'rèye.
C'est l' groumèt. Mutwèt qu'i ratind
quéque afaîre qui s' deût fé rawåde.
Tot l' minme, i vint dè tourner s' tièsse :
on-z-ôt d'å lon come on hil'tèdje.
Li brut s'acrèh. C'est lès rudions
dè tchèsson qui tchèsse lès moûnêyes ;
èt, la qui l' pèsante atèlêye
mousse èl coûr tot k'tchèssant lès poyes,
li vi tchin, brokant foû di s' trô,
bawe djoyeûs'mint tot hossant s' cowe.
XVII. Li molèdje
On-z-a d'hèrdjî l' tchèrète : lès moûnêyes sont-st-a houte, èt, sins pus balziner, l' groumèt s' mèt' a l'ovrèdje. I v's-apogne ine sètchêye, vis-èl tape so si scrène, èt, tot d'rènant d'zos l' tchèdje, mousse èl tchambe dè molin
Èl neûre sipèheûr d'ine grande plèce, èn on disdut qui v' done li hisse èt v' tint mågré vos so l' pas d' l'ouh, dès-èwarants-indjins s' drèssèt, sut'nous d'in-èdjiblèdje di bwès adjins'né di spèssès fèrayes. Li groumèt, lu, qui k'noh lès nahes, si winne oute di tot sins bambî, gripe so 'ne halète qui monte dizeûr èt tape si sètchêye al copète.