èt l' bìsteû, tot foû d' lu dè vèy qu'on l' mèt′ è sère,
beûrlêye divins lès stås.
Ine cwahante bîhe sofèle, lès sûrs sont dèdja pris :
i djale a finde lès pîres,
èt l' pauve pitit djonne grain, qu'avizéve si virlih,
si racrampih di freûd.
L'ome, lu, qu'è-st-èl coulêye, tûze a çou qu'advinreût
si l' djalêye duréve trop' :
« Adiu lès bês-awouts, lès tchârs qu'on tchèdje a make
èt lès cinas trop streûts!
C'est mutwèt tot-a hipe s'i pôrè ramèh'ner
çou qu'il a semé d' grain ! »
Mins, la qu'i s' lârmèn'têye so l'histou qu'èl rascràwe,
li timps candje tot d'on côp ;
ca vola dès flotchètes qui passèt totès blankes
å-d'divant dèl finièsse…
L'ome èst dèdja so l' soû : « Awè! c'èst bin l' nîvaye!
Èl vèyez-ve, la, d'å lon acori so nos-autes, come on djonnê qui same?
Èl vèyez-ve s'ètèsser? »
Ossu, so må pô d' timps, li tére ni sèrè pus
qu'ine grande blanke sitårêye,
qui lès håyes èt lès bwès, lès-åbes èt lès bouhons
marquèt d'ine tètche blouwisse.
Asteûre i pout djaler : vola l' grain qu'èst foû sogne.
I va houri, pâhûle,
tant qui l' solo d'avri lî dèye tot l' disfûlant
« Ti pous crèhe a t' sonlant! »
V. Avri
Li spitant meûs d'avri faît d'dja sclater sol håye
tos lès p'tits-oûys tinrûles qui l' frudeûr èdwèrma ;
èt, dismètant qu'èl wêde li wazon radjonnih
èt stitche vès l' tchaud solo sès djètons si fråhûles,
li bwès, qu'on veût d'å lon, s'èwal'pêye d'ine brouheûr
d'on rodje sètchant so l' vért, qui rapinse li fouyèdje.
Lès-oûhês sont rim'nous : on-z-ôt d'vins lès bouhons
