— — mi vous-s' rinde bin contint ? Hoûte chai : Dimeûre la bin co 45 dès-annêyes, dimeûres-i po hoûter m' pwèsêye èt loukî passer mi-ètér'mint, brâve vèye mohone dè bon vî tins! 1885
Pauve vèye mohone dè bon vî tins,
mådit l’ ci qui t’ tape al valêye !
T’åreûs d’vou, tot t’ vèyant man’cêye,
ti lèyî waguer so sès rins !
È li p’tite rowe ti féves si bin !
t’èsteûs co bone po tant d’annêyes !
Pauve vèye mohone dè bon vî tins,
mådit l’ ci qui t’ tape al valêye !
Ti n’ sårès vèyî mi-ètér’mint ;
ti n’ôrès nin soner m’ pwèsêye.
C’est mi qu’a hoûté t’ langonêye
èt qu’ t’a vèyou mètowe ås strains,
pauve vèye mohone dè bon vî tins !
Èl vèye mohone dè bon vî tins,
i d’manéve ine si bèle djonne fèye !
On n’ si poléve ripahe dèl vèy ;
c’est vrêye qu’adon c’esteût l’ prétins.
Oûy, c’est l’iviér : on s’ rissovint…
Ine saqwè v’ sussène a l’orèye :
« Èl vèye mohone dè bon vî tins,
i d’manéve ine si bèle djonne fèye ! »
