C'èst plaisîr dè vèyî magnî d'ossi bon coûr ! Ossu, dorêyes, wastês, tot s' rèwale, èt lès tasses si vûdièt, s'implihèt qu'on-z-a dèl ponne dè sûre avou l’ pèsant cok'mår. — Mins, pidjote a midjote lès pus fèls sitoumac' brognèt so l'amagnî. On k’mince inte deûs bokêyes a taper dès riyotes. C'èst l’ moumint dè tchanter. Pèrsone ni s'î vout mète, qwand, nåhèye d'ôre hêrî, vola qui l’ brave cins'rèsse po d'ner d' l'èhowe ås djonnes, ataque d'ine vwès tinrûle ine air dè bon vî tins, la qu'on djåse tour a tour èt d'amoûr èt d'hièd'rèsse. On-z-ôreût voler 'ne mohe, èt l' vî rèspleû s'ènûle, avou come ine odeûr d'ine rôse qu'on r'troûve flouwèye èl cwène d'on vî ridant. Ossu, qwand l' bone vîle åme si rassît tote mouwêye, c'è-st-on cakèdje di mains qui lès cwårês hil'tèt. L'alèdje èst d'né : sins s' pus hontî, tot l' monde s'èplôye, èt lès tchansons s'ènêrihèt come dès fizêyes. Li botèye èst so l' tåve, on k'mince a s'èmonter : « Poqwè n' dans'reût-on nin?... Qu'on våye lès p'titès danses C'èst l' mèstré qui fait fåte : on vårlèt hufèle l'air èt, tot rik'nohant l' danse qu'èlzî rapinse lès djôyes èt lès-amoûrs passêyes, deûs copes di vîs s' lèvèt, fîrs dè poleûr mostrer çou qu'on-z-èsteût d'vins l' tins al djonnèsse, qui s' rapoûle tot fant l' cèke åtoû d' zèls.
Li cwér èn-èrî, li djambe sitindowe, l' main, prêt' po l'« avant-deûs » ; èt, qwand l' mèstré sone, vola qu'ènnè vont tot marquant lès pas so l' bètchète dès pîds. D'ine air dègne èt fîre, i fèt l' « sèrviteûr », balancèt lès dames tot fant dès mamoûrs èt, la qu'èl grande pièce lès vîs meûrs foû sqwére, li grande tchiminêye èt l' plafond trak'té s'apinsèt r'vèyî lès tåyes ravikés, li spitante djonnèsse, ni wèsant moti, èst la, l' boke å lådje, qui lès louke toûrner.
