Li Fédérâtion des Sociétés Wallonnes pinse qu’il è timps dè sognî les intérêts d’tot l’monde.
Elle pinse qu’i-n-a mèzâhe dè d’mander â bravès gins qu’iront à l’chambe ou â sénat, et à tos les cis qui gêrèt so l’conseil dè l’province, çou qu’is comptet fer po l’wallon.
Nos nos avans mèttou à r’qwèrri tot çou qu’vos vôrîz bin. Li Fédérâtion a « rédigé son programme », comme on dit ; et s’va-t-elle fer n’rèunion vinrdi qui vint.
Ci programme-là sèrèt marqué tot â long d’vins les gazettes dè l’vèye. Nos l’avans scrit è français, dè minme qui les flaminds, qwand c’è qu’i d’mandet n’grande grosse chîchèye ou l’aute, sicrîhet è neerlandais.
Qwand vos ârez léhou l’affaire, vos veurez bin qu’nos n’dimandans rin d’trope et rin d’pusse, assuré, qui çou qu’nos frés dè plat pays ont obtinou fwer ahèymint.
Çou qu’on a fait po leu lingage et po leu théâtre, nos trovans qu’c’è fwêr jusse.
I s’agihe dè savu s’on frèt l’minme po nos autes. C’è po çoula qu’nos fans l’mètingue.
Tot çou qu’è d’auteur, tot quî qui jowe li comèdèye et tot qui qu’veut volti l’wallon vairet là po savu çou qu’nos maisses comptet fer.
Mains fans bin attintion, ni prindans nin nos châsses po nos solés.
Li Fédérâtion a raskoyî des Sociétés di totes les kognes. Tot comme nosse vîx jârgon, elle n’è ni jenne, ni roge, ni bleuve ; et d’âbôrd, â d’faite di wallon, on n’deut préchî qui po s’poroche, li cisse de vîx bon Diu. Ç’a todis stu ainsi. Nos n’volans nin cangî.
Et l’ci qui n’ kwîre qu’a braire à bas ici ! ou vive là ! qu’i d’meure bin pâhûle è l’coulèye di s’feu, pus vite qui dè v’ni fer des âdiosses avâ l’mètingue, â risse di s’fer passer po n’saqwè qu’i n’è nin.
Li ci qu’è d’bonne volté comprindret çou qu’pârler vout dire.
Et asteur, frés wallons, rapinsez-ve bin qui s’on n’a quâsi rin fait po vos scrieus et vosse théâte, c’è qu’vos n’avez mâye songî à v’réuni turtos essonle et à d’mander franqu’mint et honniess’mint çou qu’i v’fâreut.
Fez on gros nouke è vosse sârot et n’roûvîz nin qu’c’è po vinrdi qui vint.
| Li Sécrétaire, Gui. MARCHAL. |
Li Présidint, O. COLSON. |
