On Cafeu

Èn årtike di Wikisource.
Ciste ouve ci egzistêye eto divins ds ôtès ortografeyes : Rifondou.
On Cafeu
rortografiaedje d’ ene djin nén cnoxhowe
Aîrs do Payis Wallon, 1854 (mwaisse) / 1955 (eplaidaedje)
On Cafeu

I.

Atrapez bin vite li trimouye
Èt s' moloz, Bète à toûr di brès;
I faut qui d'ssus tot dji tègne l’ouy,
Alons, fioz rôler l' toûrniquèt
C'è-st-one fièsse di mwin.nadje,
I nos l' faut fé pèter,
Dimwin on r'prind l'ovradje
Audjoûrdu faut tchanter.

Rèfrin
Cèst l' cafeu, cafeu, cafeu,
Qui fait caqueter lès comères.
Abîye li coquemwâr au feu,
Po fè do bon cafeu.

II.

Nos n'inviterans nin l' grande cousène,
Come on jendârme faut ièsse posté !
C’èst todi lètchî dins l' coujène
Êle vos pougne didins l' suke
C'èst vraîmint one pitié.
Ou bin v'la qu'èle s'ècruke
Qu'èlle aude si-t-amitié.

III.

C'èst come ossi li grosse Titine.
Avou s' sandronète di truviès.
C'èst todi mète è s' capotine
Èlle a l' gosî todi douvièt.
Ou bin, c'èst s' nez qui gote,
Èt daubore si minton.
Èt s't-alin.ne qui sint l' gote.
Qu'èle vôye puwer pus lon.

IV.

Dijoz-m' à qui Djan Cloke richone
Gn-a-t-i pus laîd di-dins l' payis ?
Si feume èt li vont bin èchone.
On pout dire qu'is sont assôrtis.
Deûs vraîs visadjes di drèsse
Dès tch'fias come li nièrson
Nosse boc, quand s' pwèl si drèsse
N'a nin si laîde façon.

V.

Avoz vèyu lès fèyes da Téche,
Avou dès fleûrs su leû bonèt ?
Èles-ont basse vûwe po vos r'conaiche,
Quand èles-ont bouté leû côrsèt,
A qui volenut-èles plaîre
Avou leûs bias rubans ?
Pont d' pwin didins l'ârmwêre
Èt ça vout dès galants.

VI.

Èle frin.n' mia d'aprinde one pâtêr.
Après ça, roter travayi.
Fé dès-otchèts ou vinde dèl têre,
Nos n'avans pont di sot mèstî.
Leû mère sôrte d'one pôve cote
Mwin.nadje todi croté ;
Leû père, d'one pôve culote,
Trawèye pa tos costés.

VII.

On dit qu'èles coûrenut dissus l' fwêre,
Po-z-atraper dès bias foûraus.
Ça n' nos r'gârde nin, c'èst leû-z-afaîre,
I n' faut nin câsser lès câraus.
On côp d'ouy à catchète,
Ça s'èsplique assez bin.
Bète, ataquans l' gozète,
I faut qu'on s' boute en train.

VIII.

Ci n'èst rin d'one pitite ribote
Quand on n' dit pont d' mau di s' prochain.
Tot-à l'eûre nos bwèrans l' fine gote
Dissus l' cafeu, ça frè do bin.
Nos savans qui Tatine
A dès caurs dins s' ridant
C'è-st-one si brâve vwèsine,
Èle vos trompe è priyant.

IX.

Nos n'avans pus rin dissus l' tauve,
Lèvans-nos tortotes, alans-è.
Nos n'avans pus rin didins l' cauve,
Nos plans roter, lès plats sont nèts.
Pa l' brès, purdoz Mimîye,
Alons, Mamesèle Mitchî;
Bonswêr la compagnîye,
Alez rademint coûtchi.