Èlle a rabroké rouf-rouf dins l’ cujène avou s’ satch èt sès-afêres di jimnastike. Èt, tot sûte, mi mârgougnî po m’ l’eûréye dè l’ djoû di d’vant. Djè lî a rèspondu, qui dj’aveû mètu tot m’ keûr po cûtener.
« D’abôrd, c’èst qu’ vos n’avoz jamaîs cûtener d’ vosse vikaîrîye. »
Èlle n’èsteût pus si sûre qui ça di m’ bin volu aurder. Au r’gârd dè l’ place qui s’-t-ome aveût, i d’veûve sovint r’çûre lès bonès pratiques di s’ société. Èt ayîr, nos-avîn’ riçu li grand maisse dè l’ « Sonaca ».
« Vos savoz bin là ! C’èst zèls qui boutenut po lès fuséyes qui vont d’ssu l’ lune ! »
I n’avin’ nin soyu s’ foute one bosse avou m’ saumon passé à l’ fumêre d’on fè d’ bwès èt dès r’djètons d’aspèrjes.
« Èt vosse rostî… »
Il èsteût cût à crètons d’ laurd èt lès lègumes avîn’ trop taurdjî dins l’ sauvadje pilé. Lès cabus l’avîn’ faît stièrnus. Si feume aveût ratchî one djon.ne carotte dins s’ sêrviète di papî. Mwârt di fwin, i s’avîn’ dauré pa trwès côps dissu l’ fromadje, à n’ pus sawè s’ fé one didéye di mès gougouyes au chocolat, qu’avîn’ on drole di goût d’ viyolète di tchin.
« Vos-avoz seûr lèyî souwer one miète di trop d’ vosse sint-bon dins l’ platène. »
« Dji n’a nin dandjî d’ sint-bon, mî, Madame ! »
« Ci n’èst rin, quand î ramousserè, Monsieû, vos dirè ci qu’ nos pinsans tos lès deûs ! »
Èlle a d’nalé pa lès montéyes dès domèstikes. Dj’a rauyi m’ blanc d’vantrin à bavète. Dji m’a dismoussî dins leû tchambe. Dji m’a èdwârmu sins crike ni crake è plin mitan do lét.
« Dispièrtoz v’, dispièrtoz v’ ! »
Pascal mi choyeûve pas mès spales. Djè lî a dît qu’ dj’èsteû nétîye, scrance, d’awè bouter deûs djoûs come domèstike. Qui dj’ènn’aveû plin lès guètes di r’nétî à l’ mwin lès pantîs èt lès cwârsadjes di s’ feume. Qui dj’èsteû odéye, di m’ mète à quate pates avou lèye su l’ plantchî, po rawaîti s’i n’ dimèreûve nin dès plomions d’zo lès meubes. Sins compter lès r’mârques, qui dj’ vineûve dè r’çûre come one plaîve di mokions, tot jusse divant qu’èlle èvôye sayî di r’tinkî lès musses di sès viyès fèsses à s’ soce di jimnastike.
« Èle mi lès-a mostré ! »
Li maniére di r’ssatchî si p’tite culote pad’vant mi, po m’ lèyî r’nètî lès caraus do timps qu’èle purdeût s’ douche. Ostant n’ pus-awè d’ fèsses, po m’è mostrer dès si flanîyes, djus d’ song. Vaurot co mia awè one kèwe, come one soris, one gade, one cavale.
« Rimoussîz v’ mi p’tite chérîye. »
Dja couru m’ rèssèrer dins lès cabinèts. Djè l’a lèyî bèrdèler, priyî, pîler. Il a sayî di sclater l’uch au laudje avou on toûrnavis’.
Dj’a moussî foû di m’ catchète quand djè l’a ètindu rintrer. Dji voleûve qu’èle veûye ci qu’ c’èsteût li cwârp d’one feume.
« Dji sèreû ontieûse dè l’ vosse. »
Kène plonke di m’ volu fé prinde li place di leû vîye domèstike qu’aveût tapé djus. Lî qui pinseût qu’ ça sèreût bin d’ nos mète è min.nadje, tos lès deûs pa d’zo l’ baube di s’ vîye ratchitchîye, qu’ i r’chineûve dispôy dès-ans à later au gobieû.