Noveles et binde ås desséns/I

Èn årtike di Wikisource.
Aller à la navigation Aller à la recherche
Emojione 270F.svg Ciste ouve ci egzistêye eto divins ds ôtès ortografeyes : Feller Sauvèrdia.
Noveles et binde ås desséns
2020

I
Rintrêye

Fafa nén s’  veyeut nén foirt voltî ! Mins adon pire ki tot ! Des côps, ele si veyeut trop spesse, trop coûte di djambes, oudon bén, ele sondjive k’ elle aveut des djambes come des brocales avou des fesses di gade, plates come des plantches. On côp, trop grande, on côp trop ptite, on côp trop noere di tchveas, li leddimwin, trop brune. Ele si djheut k’ ele aveut on nez come ene petote di beveu d’ rodje vén, des ouys come des kikines di poupousse. Ses dints, come des brokes di viole, ki lyi fjhént ene boutche come on ruslî.

Cwand ele si rnetyive pa dvant s’ muroe divant d’ aler doirmi ou cwand ele si dismoussîve, ele seréve ses ouys. Cwand ele passéve divant l’ werene d’ on botike, ele tournéve si tiesse so l’ costé po n’ si nén rawaitî. Et s’ i n aveut on potea, ele sôtléve didins a djonds pîs po n’ si nén vey didins.

« Dji n’ mi voe nén voltî, dji so trop laide »,k’ ele repetéve a s’ man tot do long del djournêye, a s’ pa, a tos les scolîs et scolresses.

Adon, tolmonde lyi djheut, « Mins nonna, ça n’ est nén vraiy! Ki t’ es biesse, mi crapåde, di t’ mete des pareyès idêyes dins t’ tiesse ! »

Mins Fafa hossive ses spales, tournéve si tchår po-z endaler avou ses deus mwins dins ses potches, sins voleur croere çou k’ on lyi djheut. C’ esteut pire ki foice dins s’ caboche d’ efant : « Si t’ croes ça, t’ è croerès co bén ds ôtes, ça s’ a passé al cinse ewou ki l’ tchén bat l’ boure avou s’ cawe ! »

Li recloymint di l’ an 2020 n’ av rén arindjî. Ti sins bén, shijh moes resseré inte cwate meurs, avou tenawete ene pormoennåde avou s’ mame. Al riprinjhe des cours e moes d’ djun, ele n’ aveut nén vlou raler a scole. Po poirter ene muzlire dissu s’ binete, ci sereut pé k’ l’ infier.

Mins e moes d’ setimbe, il a bén falou rprinde li voye del sicole. Ritrover les vîs camas k’ alént rschoûter ses litaneyes, ça n’ l’ estchantéve waire. Mins vo n’ la-t i nén k’ gn aveut on novea eleve ki vneut d’ ariver. Come tchaeke côp, tote li scole esteut rachonêye åtoû d’ lu do tins del recreyåcion, po sayî d’ fé camaeråde avou lu. Tertos, il avént dmandé cwè et kesse. Et il aveut respondou kesse et messe a tertos.

A pårt nosse Fafa, ki n’ aveut rén dmandé ! Et ki s’ tineut astampêye, si tiesse baxheye come a s’-t abutude, tote seule dins ene coine del coû.

Li novea gayård l’ a vnou trover : « Et vos, vos n’ m’ avoz rén dmandé, comint ç’ k’ on vos lome ? »

« Fafa » a-t ele respondou.

« Pocwè tnoz vosse tiesse clintcheye ? »

« Paski dj’ so trop laide; paski dji n’ mi voe nén voltî ! »

Li novea l’ a lonmint rloukî des pîs al tiesse. Il a findou ses lepes, xhinåd, po lyi dire, : « T’ as bén råjhon, t’ es vraiymint laide come on pû. Djel vou bén croere ki ti n’ ti voes nén voltî ! »

Tolmonde a dmoré peté, li boke grande å lådje, les ouys come des sårletes. Tote li scole a rawaitî l’ novea s’ endaler sins rén dire.

Fafa, ele n’ aveut nén bodjî d’ on crin; ele n’ aveut ddja rlevé s’ tiesse. Mins, çk’ elle aveut etindou, l’ aveut flayî come on côp d’ mayet al miercopete di s’ tiesse. Ey eddins, ça chiltéve d’ araedje !

Sacwants eures pus tård, rabrokêye a s’ måjhone, elle a gripé les montêyes cwate a cwate, moussî dins s’ tchambe, råyî l’ drap d’ mwin ki catchive si muroe et s’ razouyî on fel côp, ses ouys dins ses ouys.

« Li boû, mins po kî çk’ i s’ prind di m’ cåzer come ça, l’ enocin catoize ! I s’ a ddja rloukî, lu ? Non mins ! I s’ prind po Tarzan ! I n’ s’ a djamåy veyou avou s’ nez did triviè, et ses tchveas come des loyéns d’ vea ! Et ses bresses : si télmint longs ki t’ direus k’ i vont trinner al tere come les cis des planteus d’ tchicons. Et s’ boutche, ti direus k’ on lyi a spotchî ene fraijhe el plaece. Et i fwait co des ouys come ene caracole e l’ coûtche, onk ki djete li ståve do tins k’ l’ ôte est a campagne ! Dji n’ so kécfeye nén bele, mins did la a m’ dire ki dj’ so laide… Et il a l’ front d’ mel dire, li cazimodo !

Waite mi nez, il est fén droet, nén trop lon, nén trop lådje. Mes ouys, il ont ene bén bele brune coleur. Dji m’ pou mete dizo l’ tweze, dji n’ so nén trop grande, nén trop ptite. Mes tchveas, a ! k’ i sont beas dsu mes spales… et mes dints, tådje ki dj’ rawaite on côp… Maria todi ! dji wadje k’ i nd a waire k’ ont des si beles et blankes dints k’ les ménkes. Et cwand dji find mes lepes, ti diros vey Sharon Stone ! Dji so… Oyi ! Dj’ a les pinses ki dj’ so bén pus bele ki bråmint. Fåt nén awè peu del dire… A ! oyi, fåt bén rconoxhe ki dj’ n’ so nén må, ene foirt bele crapåde ! Cwand dji pinse ki l’ novea a oizou dire ki dj’ esteu laide. I n’ m’ a nén veyou ou cwè ? I lyi fåreut des lunetes ! Demon, rosse, pwezon ! Nos n’ avans pont d’ tchance dins nosse sicole : n’ avot i nén moyén d’ tchaire on côp dssu on bon novea el plaece d’ on mwais ? »

Dispoy ci djoû la, Fafa a edåmé a s’ trover bele ådla, et a s’ vey voltî. Ele rawaitive li novea a baxhete, cwand elle esteut seure k’ i nel razouyive nén. Lu, il aveut todi ses lepes findowes ki rshonnént a des spotcheyès fraijhes et des droles di stoeles dins ses ouys di vea. Kécfeye nén des ouys di vea, putoit des ouys di lapén ou d’ daguet, pinséve-t ele Fafa, a muzeure ki l’ bon tins avancixheut, et k’ les fraijes meurixhént

A ! Les fraijhes !

« A î rawaitî a deus côps, c’ est k’ c’ est bea les fraijhes et pu c’ est bon ! Et on n’ est nén oblidjî d’ les spotchî. On pout eto djusse les rifler, les oder, lezî dner on betch, on tot ptit betch. Tot doûs, Tot doûs… » k’ ele si djheut, nosse Fafa.


Note Wikisourd Cisse modêye e rfondou ene miete ricandjeye pa Lucien Mahin shûte al minêye di cron virûsse 2020.