Novèles èt Binde à dèsséns/XXXVII

One fèle paurt aus cautes

Tot avot c’mincî al chîje, dins-r-one maujone dèl rouwe dès « Baus Prés » èwou qu’on sièrvéve dèl chaléye bîre à fraude. Lé paurt dë ‘Po tot » èstot d’djà èdauméye dëspôy lë vièspréye. Ël èstin’ achid autou dèl ronde tauve : dés gros cinsîs, on maîsse ovrî, dès tayeûs d’ pîre. On n’ djouwéve ni qu’ dèl chënayes. Lë pot avot monté. Lès biyèts strëtchin’ foû dèl pot. Lés-ouys bolin’ è leû tièsse po waîtî së l’ macheû në s’ brouyéve ni po d’ner lès cautes èt s’ë-n-avot ni onk qu’ârot p’lë yë r’noncî. One blouwe fumêre bagnîve, gwârdjîye d’ënéyes dë fwârt toubak èt dèl souweû dès djouweûs. Po n’ ni s’ fé apëcî pa lès gabelous qu’èstin’ todë à l’awaîte dès maujones quë vindin’ à baltrîje, on batéve lë caute aus tchandèles, avou lès cèques dèl sëtopa d’ lë stûve rëlèvés. On-z-ârot yu dët l’ place dë d’vant d’ moussî è l’infyêr. Avou on brût d’ tchin.nes quë r’chonéve à dès gninwiadjes, lë caîsse dèl règulateûr dèl cûjène à èdaumé lès doze côps d’ méyenut. Totes lès tièsses s’ont bèrwèté su l’ ëch dë d’vant. C’èstét s’-t-eûre…dîj… onze…à doze… l’ëch s’a tapé au laudje. Ël èstot d’dins. Pèrson.ne në conèchéve së vraî nom. Al fin dèl guêre, ë s’avot catchî è nosse vëladje po n’ ni r’moussî è s’ payës. On l’avot spoté l’ Kaîzèr’ pace qu’ë lî r’chonéve. Ça lî avot d’meuré. Ë s’a astampé, sins boudjî, chënârd, mèprîjant, adon pwis, ë s’a avancë d’ssës lès djouweûs come së c’èstot lë l’ maîsse : « Fioz one place po vosse Kaîzêr’ ! » Èt cès gros mènîrs là, quë boutin’ al fotche, al faûs, al chëpe, al masse, au burin ; ë-n-a ni yë onk po li sèrer s’ bètch, lî mète lë cougnèt. Ë s’ont r’ssatchî sins motë, Ël ènn’avin’ peû ! Lë tauve èstot tchèrdjîye ; lès botâyes dë bîre, lès batch au cènes, lès vêres, lès cautes, lë pot avou lès liârds, d’on sètch côp d’ mwin, ël a faît valser tot al têre, èt s’achîre come è s’ maujone. Ni l’ gros cinsî d’ Wayindje, ni l’ cia dèl cinse Bârbi, ni onk dès tayeûs d’ pîre, ni onk dès r’waîtants n’a mouf’té. Portant, c’èstot dès brak’nis tot laudje, Tortos, ël avin’ lë crampe câsséye dins l’ potche d’en d’dins d’ leû casaque èt dés laces, èt l’ coutia à fëne lame sëtëtchi dins leû botes. Ël a poujî dins l’ fond dë s’ potche tot d’djant : « Èt qwè, qui ç’ qu’ataque ? » Ël a stauré one pougnîye dë p’tëts cayaus quë blawetin’ ? À n’ ni l’ crwêre, lès djouweûs on clincî leû tièsse po mia waîtî : dès djanes chos d’ frumint d’ôr ! One laîde grëmace a co r’ssatchî pu fwârt lès palès lèpes dèl Kaîzêr’èt tot sètch : « Më, djë loume ça dès pèpites. Camarâdes. Mins c’èst come vos l’ v’loz. Èle vos plaîjenèt bén ? Lë mwinre pëtët chos, come vos d’djoz, vaut cint côp l’ pot qu’ vos djouwoz… È bén ! Qui ç’ quë mèt à djë l’ prumî ? » Tot bén compté, ël èstin’ à doze. Tortos èchones, ë ‘nn’avîn ni co assez po mète à djë. Lë Kaîzêr lès r’twèséve dë d’ pës bèle, « Èt qwè, vos potches sont vûdes, lès sorës courenèt dins vos drèsses ? » Ël a r’mètu lès trwès quârts dès pèpites è s’ potche. « Qui ç’ quë djouwe ? » Ë-n-avot co trop wêre. « Godfèrdome, Ë-n-a qu’ dès pôves pîces-crosses, vécë ! Djë m’ va rabachî à mèsère dë vosse portèfouye. Lë prës qu’ ça kosse au këlo : aviè 34.000, Djë vos-ènnè pèse po cint grames à m’-n-ëdéye. » « Dj’a po fé mële ! » « Më, cénq cints ! » « Më, èto… Më èto… Më èto » « Ça nos faît trwès mële, qui ç’ quë mèt avou nos ? » « Volà dj’a po fé l’ rès’ ! » « Lë cia quë marquéye vingt-y-onk à gangnî ! » « Qui ç’ qu’ataque lë prumî ? Lë Kaîzêr’ ramasse lès caurs, mèt l’ôr dins on jate au mëtan dèl tauve, dëstrëbouwe dés cautes à chaque djouweû, èt deûs por lë. Lë cinsî d’ Wayindje dëmande on caute èt ratind. Lë maîsse ovrî dau «Tchafort » passe. Lë gros « Bârbî » è d’mande one : « 21 ! » Ë lève lë jate. « T’as pièrdë, Kaîzêr’ ! » On rataque on tour avou dès novias chos. Lë Kaîzêr pièd co. Tot l’ monde vout taper l’ caute ! Tot l’ monde rëtoûne sès potches, Tot l’ monde à dès liârds. Tot l’ monde vout djouwer. Lès capsëles dès botâyes dë bîre s’ètassenèt dins l’ cèdri dèl cabaretî d’okâsion. « Rëmèt one tournéye, Bêr ! » Cë n’èstot pës dès-omes, c’èstot dès-apachârds èt dès sôléyes avou dès rodjès bënètes dë diâles… Èt vola-t-ë ni quë l’ Kaîzêr’ gangne… On r’mèt ça… Ë gangne co… Broke dë viole po l’ cinsî d’ Wayindje quë pièd tot ; c’èst co l’ Kaîzêr’ quë lève lë pot. Tot l’amér’ dès cauteleûs r’naude dëssës l’ Kaîzêr’ Ë l’ pinssîn’ mète à sètch, èt c’èstot zéls qu’avîn’ lë potche trawéye. Lès biyèts s’ètassîn’ pa d’vant lë èt lès chos èstîn’ rëmoussî d’èwou qu’ël avîn’ vënë. Lès bèrwètéyes dë « Godfèrdome », lès chëpeléyes dë djëradjes chîlî n’ à scrèper lès-orâyes dél Kaîzér’. Lë, ni pës mouwé qu’on pèchon dins one basse d’êwe, rarindjéve paujêremint lès biyèts pa d’zo së tch’mîje. « Qwè ! Gn’a pus pèrson.ne qu’è vout ? » « Së të n’ më rinds ni mès liârds dëvant d’èraler, djë t’ côpe lë garguéte, më ! » avot-ë bwârlé onk dès tayeûs d’ pîre. « Bâ, m’ fë ! dj’a on bén pës bia arindjemint qu’ ça por vos, èt po vos-ôtes èto së vos l’ v’loz bén. Vos-avoz vèyë mès djènes chos ; è vouriz bén ? » Lès-otes, avou leûs bolants-ouys tot foû, lî lachin’ dès dèmonéyès-ouyâdes. Causéve-t-ë dins sès dints ou bén po s’ foute dë d’ zèls ? On-avot ètindë one fëne sêre vwès d’ brèyaud : « Èwou l’s-avoz trové, man.nèt boureû d’ craques ? » « Dins l’ pës grand dès pës’ aus pîres à Gobtindje ! » Lë pës grand dès pës’ aus pîres : lès djouweûs avin’ atrapè l’ vèssète co pîre quë l’alumwâre. On pës’ qu’on-z-avot d’djà r’ssèré d’vant l’ôte guêre. Èwou qu’ë-n-avot yë dès touwés spotchîs pa lès pîres. Ni one bièsse n’ârot wâzë s’ènnè aprotchî, min.me lès mouchons fyin’ dès dëstoûs po n’ni passer pa pad’zeû. « Cabaretî, rimplëchoz lès vêres, c’èst më quë pâye lë tournéye ! Ë m’ faurot saqants-omes, dès vayants, ni dès vauréns, ni dès chëtauds. Dj’a d’dja dëschindë lès satch’ al cwade. On lès rimplërè avou lès chos quë dwâmenèt dins l’ fond. Lès cias quë vêront avou më, âront chaque chîs pougnîyes. Qui ç’ quë vént ? Èt c’èst ni quand-quand, c’èst tot d’ sûte. » Tot l’ monde s’a rawaîtî, lë cia qu’avot lès pës dërès cwanes s’a lèvé l’ prumî, èt tos l’s-ôtes ont sûvë jusqu’au pus’…