Novèles èt Binde à dèsséns/XXXI
Ciste ouve ci egzistêye eto divins ds ôtès ortografeyes : Rifondou walon.
XXXI
Li twa dè l’ cinse Béli
Il a faît pèsant, craus, tote li djoûrnéye. Djè l’a passé à r’ssouwer m’ coyène èvou m’ mouchwè d’ potche. Adon, quand dj’a trèvautchî l’ pont su l’ richot, dji n’ m’a pus soyu rasténre. Dj’ a taurdjî su l’ costé dès fis d’arca. Dj’a sautelé lès filochés dè l’pâture. Lès bièsses pachîn’ byin lon su lès d’zeûs. On éron plâneûve à l’cache po mougnî èt dji pleûve veûy li clotchî do viladje qui passeûve au d’zeû dès tièsses dès saûs. Dj’a rademint asplané tot l’ long d’ l’âye di nwêrès spines jusqu’à l’trawéye èwou qu’ dj’î vin co bin pèchî. Dji m’a disbiyî mièrnu èt dj’a plonké fin rwèd dins l’aîwe ! Mi cwârps s’a rapaîri ossi rade. Dji m’a mètu su m’ dos èt m’ laîyi pwârter. Dji m’a bagnî dins l’ frisse aîwe.
Dj’a r’monté l’ courant à l’brasse po ratraper mès moussemints.
C’èst là qu’ djè l’a vèyu pèstèler mi tchmîje èt m’ culote èvous sès gros chabots. Dji pinseûve qui c’èsteût on boû, mins, quand dj’a vèyu lès deûs grossès clokes di pauques qui pindîn’ yinte sès pates di d’drî, dji m’a sintu pièrdu. I d’veûve bin fé mile kilos su pîds. On monsse ! Èt r’mouwant come pas deûs ! Nin on « Bleû-Blanc-Bèlje » qui osse di crauche èt qui n’ sét pus ope. Astoke à li, lès twas qu’ dj’aveû d’djà vèyu è l’Èspagne richonîn’ à dès djon.nes vias. Sès trôs d’ nasia : dès vraîs soflèts d’ fwadje. Dès cwanes au laudje come dès brès d’ luteû d’ fwêre. Quand i m’a vèyu, il a èdaumé à cheûre si tièsse bèrlic-bèrloc…
Tot bagnant, dj’a r’monté d’on dîjin.ne di mètes. Dj’a apicî one coche qui pindeûve au d’zeû d’l’aîwe. Tot doucètemint dj’a sayî do r’monter su l’ bwârd. À pîds d’ tchaus, mès-artias ridîn’ dins l’aurzîye. Dj’a satchî on fèl côp su l’ brantche, zoupeler, tot mi r’tournant, po m’ ritrover achîde dins lès yèbes sur one flate, bin crausse, come pus laudje qui mès deûs fèsses. I-gn-aveût co cinq mètes à fé po p’lu ramasser m’ culote èvou mès clés po l’auto. I s’a mètu à pèstèler. A grèter têre èvou sès pates di d’vant. Lès brous èt lès claves qu’i-gn-aveût véla montîn’ è l’aîr èt r’tchaîr jusqu’a d’ssu si scrène laudje come one tauve. Tant qu’à fé, m’ culote a sû l’ minme vôye po s’ ritrover pindoûwe dins lès bouchnis’. Il a bachî s’ tièsse, fé chonance do v’lu plonker sur mi. Waîte todi d’ t’arindjî èvou one parèye bièsse, mi dj’ènn’-aveû l’ pèpète. Dj’a r’moussî d’èwou dj’avo v’nu : dins l’aîwe. Dj’a sayî d’ ratraper m’ tièsse èt cachî comint fé po m’ rissatchî fou di ç’t-èburtakante istwêre là. Dji n’ sé poqwè, mins dj’a sondjî à l’politicayerîye qui laît pourî dès samin.nes au lon lès d’mandes dès bouteûs. Dji n’aveû pus qu’a lapoter dins l’aîwe tot ratindant qu’one vatche divègne torlaude…
I n’ s’a nin continté d’ ça, il a ratindu, tigneûsemint ratindu. I s’amuseût èvou mi tchmîje à l’ fé valser èvou sès cwanes. Dji n’aveû pupont d’ôte tchwès qui d’ prinde mi coradje à deûs mwins po sayî d’aler r’qwêre mi culote qui pindeût dins l’ tâye. Dj’a apicî on bordon qui floteût. Dji m’a avancî l’ pus près possube po-z-awè pîds. Dj’a flayî lès-aîwes à côps d’ baston. Dj’a bwârlé, ianlé come on baudèt, gninwî, bawî, winkelé, cwakelé, beûlé po fé come li, tot tapant mès brès au laudje. Dj’a lancî l’ bordon après s’ tièsse. Il a r’tchaî su sès cwanes sins qu’i n’ moufetéye d’on randon. Li brune tchaîyeûve. Dji c’minceûve a-z-awè l’ tchau d’ pôye. Dji n’areû pus soyu d’morer dins l’èwe. Èt tot d’on côp, v’la qu’i plonke à m’ cu. Dji n’a jamaîs batu dès brès ossi rade. Dj’a findu l’ richot come Tarzan èl fieûve po-z-aler r’trover s’ Jane. Èt dj’a pèté èvôye au pus rwèd sins mi r’toûrner. Dj’aveû d’dja bin bagnî cinquante mètes quand dj’a r’monté m’ tièsse foû d’ l’aîwe. I m’ rawaîteûve à gougne ; l’aîr di m’ dîre : « Ni vin pus jamaîs toûrner autou d’ mès-aumâyes… »
Dji tanfeleû come one bièsse qu’on-z-areût yeû achoré. Tot-autoû d’ mi, lès deûs bwârds s’avîn’ rissèrés, èt ci n’èsteût pus qu’ bouchnis’ èt ôrtîyes. Dj’a agnî su mès lèpes. I faleût trèvautchî, moussî dins lès maraches èt lès ronchis’ sins m’ sipaurgnî po qu’ ça fuche li pus coût possube. Lès spines cwachîn’ è m’ dos. Lès-ôrtîyes brûlîn’ lès cwachures. I gn-aveût pus on centimète su m’ pia qu’i-gn-aveût one cloquète. Yute di ç’ bokèt là, li richot rid’vineûve paujêre èvou dès pachis d’ chaque costé. Dj’a bin rawaîtî s’i-gn-aveût pont d’ bièsse didins : on n’ m’i r’prindreût pus. Dji m’a cochoyu, stauré dins lès frissès yèbes, come on tchin qui trin.ne si gorléye dins lès brous.
Dj’aveû télemint mau, télemint chôpe tote mi scwasse qui dj’ènn’ aveû l’ rôguia. Adon, dji m’a rapaujî pate à pate. Lès prumêrès stwèles s’alumin’ dins li stwèlî. Ci biaté là m’a rindu coradje. I m’è faureût po roter di kilomètes à pîds d’ tchaus, mièrnu, au d’ triviès dès tchamps.
Dj’a co profité one apéye, stindu dins lès frissès yèbes, èt op’ èvôye…
Dj’a rademint r’tchaî su l’ vôye do viladje. Dj’aveû à pin.ne roté on kilomète qui dj’a ètindu l’ brut d’one auto qu’ariveût di d’ pa padrî.
Dji n’ sé nin si c’èsteût pace qui dj’èsteû odé, todi è-st-i qu’à l’place do m’ dârer su l’ costé po m’ catchî, dji m’a r’trové l’ pôce è l’aîr. Tot paf, do veûy on’ ome mièrnu, couru lès vôyes, li tchaufeû a d’nalé sur l’ costé, frin.ner à mwârt po s’ ritrover taurdjant, au d’ triviés dè l’vôye.
C’èsteût nosse curé !
« Maria todi ! Qwè avoz faît ? »
« One pitite bisbrouye èvou on twa. »
Dji m’a achîd à l’place do mwârt èt r’chôpî mès-ouys. Li curé a apicî s’ sacoche qu’èsteût su l’ banquète di d’ pa padrî èt mè l’ doner.
Djè l’a mètu su m’ choû po catchî m’ misére. Dj’a co ossi dè l’tièsse po fé comprinde à nosse doyén qu’i m’ ramin.ne à l’maujone.
Quand dj’a rabroké dins l’ grande place, mi comére èt lès-èfants achèvin’ leû diner. I s’ont astampés rwèd bauyauds come dès posteures di pîre.
« Faut nin vos sbarer, i-gn-a nin à braîre. Ça na rin à veûy èvou one istwêre di cougnadje, co mwins èvou on’ ome djalous. »…
Nosse doyén n’ m’a nin prétchî à l’pirlotche, mins li lèddimwin tot l’ viladje à rademint soyu qu’i-gn-aveût yeû on sbaré qui coureût lès vôyes do viladje tot mièrnu.
À l’vièspréye, li cinsî Béli m’a rapwârté lès fligotes di mès loques.
Lès clés èstin’ todi dins l’ potche di m’ culote. I m’a dit qui s’ twa pacheût paujêremint !