Novèles èt Binde à dèsséns/XIV

Nos n’avans jamaîs vèyu grand

On s’aveût rifroté l’ laurd èchone. On maniére di s’ carèssî avou nos dwègts. Di s’ comachî qui n’aveût jamaîs candjî dispôye li prumêre nut qui n’s-avîn’ passé èchone vola d’ pus d’ cinquante ans. On s’a todi vèyu voltî paujêremint. Ça n’a jamaîs stî l’ diâle d’afaîre, ou d’ posicion yute dè râre. On s’a èdwârmu. Dji m’a dispièrté è plin mitant dèl nut. Dj’a d’chindu lès montéyes à pîds d’ tchau po nè l’ nin dispièrter avou l’ brût d’ mès clapètes. Li plin.ne lune, tote di crôye, luméve dissu l’ câde di nosse maujone qui dj’aveû machuré al coleûr à l’aîwe. Dj’a r’tchaufé one jate di lacia. Djè l’a bèvu bolante, à coûtès gwârdjîyes, avou on couyî d’ laume didins. Djè l’ètindeûve sofler dès pwès au làwont su l’ plantchî. On brut d’ sôliète, qui vént, qui r’va. Dji n’a jamaîs stî veuy su l’ costé. Èt si, dji n’ voureû nin passer po on flacheû, dji v’ dîreû bin qui dj’ n’a jamaîs conu d’ôte feume qui lèye. Faut dîre qui dj’èsteû d’djà on racî djon.ne ome quand nos nos-avans marié. Dj’aveû yeû saquants p’titès paskéyes avou dès djon.nias di m’n-âdje. Dj’aveû minme viké one passâde di saquants mwès avou on djouweû d’armonica qu’èsteût d’ totes lès fièsses. Dji n’a pu jamaîs yeû ausse dès-omes li prumî djoû qui dj’ l’a vèyu. Mès parints ont stî binauje dè veûy qu’èle m’aveût chapé d’one fameûse croque. « Si r’taper d’ qwè ? »

	« Nom d’ tot-ute ! Françwès ! »

Gn’a lonmint qui mougnenut lès chicoréyes pas leûs racènes. Il èstîn’ bièsses come polenut l’yèsse branmint dès parints. Si lès djon.nes d’asteûre pourîn’ tchwèsî leûs parints, mi, dji r’vaîreû co dèl fièsse aus tch’vaus d’ bwès avou lès minkes. Dji n’a jamîs conu ôte tchôse qui l’ bouneûr. On d’mé bouneûr, coleûr à l’aîwe, tinre come lès rôses, pâle vète come dèl crinme su on wastia. On wastia qui branmint à nosse place arîn trové sins goût, doûcrôs, ripipi. Mins nos, nos n’èstîn’ nin come ça, nos-avans viké lon èri dès flaîrants, lon èri dèl sint-crèspin, pont d’ gloria, lon èri d’ sondjî à-z-awè li d’zeû. Nos n’avans jamaîs volu d’èfant. Ènnè fé : quén trècas avou ça ! Dèl tchau d’ vosse tchau, c’èst co pu tinre à-z-î waîtî. Vos l’ faut mostrer à tortos come vosse bouwéye qui pind à souwer. Vos l’s-avoz djon.nelé sins sawè, c’èst nos qu’a faît l’ côp come dès baligands. Audjoûrdu, vos sèrîz jin.nés d’ moru on djoû d’vant zèls, tot lès lèyant padrî vos. Nos n’avans jamaîs vèyu trop grand. Il l’ faut yèsse po-z-awè dès-èfants. Nos n’avîn’ nin dandjî d’ murwè à nosse portraît, nin dandjî qu’on nos lome Ramsès IV quand on r’trovereût nos cènes. Ça nos va bin d’ trin.ner nos djoûrnéyes come satchîye pa on boû fornaujï. Quand dj’a yeû achèvé d’ rèminer m’ vikaîrîye, dj’a r’lavé m’ jate èt dj’a r’gripé ad’lé m’ feume. Dji m’a racwètî d’zo l’ linçou. Si caboléye di pwès èsteût yute. Èle grumeleûve mwaîje qui djè l’ dispiède. Dji voureû bin qu’on rataque. Èlle a rî. On s’a rèdwârmu tos lès deûs…