Novèles èt Binde à dèsséns/XIII

Èn årtike di Wikisource.

Tièsse di côrnârd


« Vos-avoz one tièsse di côrnârd. » Èle n’èsteût nin tote seule. Dji n’ l’aveû jamaîs vèyu d’vant. Dj’aveû one véngtin.ne abéyes. Dj’èsteû achide dins one cwane dins l’ fén fond dèl carbèrdouche à r’fé l’ monde come dj’areû v’lu qu’i fuche. Ele choneûve bèle come one sôrcîre pa d’zo lès rodjès lëmîres qui l’ patron ralumeût al vièspréye po qui s’ cabarèt richone à one sale di danse. Djè lî a findu mès lèpes, tot sondjant qu’on s’ poureût comachî po passer nosse timps. Satchî on p’tit côp, come on d’jeûve di ç’ timps là. Dji vos cause d’on timps èwou qu’on-èsteût co s’ maîsse, qu’on n’avoz nin à s’ tracassî po-r-onk ou l’ôte. Di ç’ timps là, quand on n’ aveût nin l’ front d’ wâsu, ci n’èsteût nin râre do d’morer dès mwès au lon sins polu atraper dèl pratique avou person.ne. « Èle diveût awè faît totes lès tchapèles, èle barlokeûve. » Li sièrveû l’a apicî pas s’ caraco èt l’ taper à l’ uch. Il a ramoussî fiér come on coq tot r’ssouwant sès mwins come Pilate. Dj’ payî m’ vère. Dj’a moussî foû. Èlle èsteût d’ssu l’ trotwêr di l’ôte costé dèl vôye. On-z-areût yeû dît qu’èle danseûve pa d’zo dès flotchîyes di wate. Èlle a baké su s’ dos dins l’ nîve. Èle s’a lèyî aler, li tièsse ripwaséye su sès brès, racrapotéye come dins l’ vinte di s’mame po s’ lèyî moru d’ frwèd. Li lèddimwin, dins m’ lét, èlle a drovu one ouy su l’ côp d’ prandjêre. Dji n’ mi sovén pus comint qu’ dj’aveû réyussî à l’ trimbaler jusqu’à m’ tchambe au quatryinme sins montèdchinde. Èle m’a razouyî tote èwaréye mins sins peû. Djè lî a raconté s’ djoûrnéye d’ayîr. Èle m’a d’mandé èwou s’aler achîre po fé s’ commission. « Su l’ pas d’ grés. » Quand elle a r’moussî dins m’ tchambe, èlle m’ a oblidjî à m’ ritoûrner po nè l’ nin waîtî. Dj’a ètindu l’êwe qui spiteût dins l’ lavabô. Quand èlle a stî rabiyîye, dji m’a p’lu r’toûrner. Djè lî a faît do cafeu, plaquer one taye di pwin avou do bûre. Èlle a drovu lès fignèsses. Li frwèd èt l’ solia ont moussî dins l’ tchambe. Èle m’a d’mandé di m’ mète dins l’ solia. Èle m’a razouyî dès pîds jusqu’al tièsse come l’âreût yeû faît on gabelou. « Vos m’avoz cougnî do timps qui dj’ dwârmeu ? » Djè lî a dit qu’ non. « Vos-avoz yeû twârd ! » Avou on bia sorire su sès lèpes, èlle a r’ssatchî m’ mwin quand dj’a sâyî d’ rattraper l’ timps pièrdu. Èlle a d’nalé. Dji n’ l’a jamaîs r’vèyu. L’anéye d’après, dji m’a marié avou l’ fèye d’on gros cinsî èwou qu’ dj’aleû fé l’awous’ quand dj’èsteû cor à scole. Dj’a t’nu l’ cinse quarante ans au lon avou lèye. Asteûre, c’èst nos lès vîs. Todi assez vî po-z-èraler po d’ bon, èt n’nin yèsse trop r’grèté èt fé bisker d’ trop d’ djins. Mi feume n’est pus là. I m’arive co bén d’ cheûre mès bijious d’ famille tot sondjant à lèye. Dji sondje qui dj’ lî demande dè baker foû dèl douche tote mièrnoûwe èt fine frèche. On n’ pout nin yèsse èt awè stî…