Novèles èt Binde à dèsséns/XII

Mayî

Mayî n’ voleûve nin quiter s’ feume… I m’aveût d’dja faît deûs-èfants. Pusqu’il aveût peû d’ènn’-aler djus d’ lèye, i n’aveût qu’a lî d’ner l’ bouyon d’onze eûres : « T’è-st-apoticaire ; oy ou non ? » I s’a achîd dins l’ fastrou padrî m’ dos. Il a profité qui dj’ mousseûve dins l’ cûjène po pèter èvôye. I m’a laîyî tote seûle, mi, s’ mayon, qu’èsteût à sès d’gnos dispôy dès-ans. Dji n’aveû minme nin l’ drwèt à on forbatadje ! À on capougnadje. I r’vêrè quand dj’ènn’-arè m’ soû d’èsse tote seûle. Il sét bin qu’ dji m’ laîrè co à dîre. On mèt bin au trô, mièrseûs, lès prijnîs qui sont trop arnaujes : tot jusse mi cas ! Il a rabroké qu’ dj’èsteû stinduwe dins m’ tine au bagn. Djè l’a sgrignî pace qu’i n’ s’aveût nin sièrvu di m’ sonète. Il a choyu l’ clé yinte di sès dwègts po m’ bin mostrer qu’ c’èsteut lî qu’èsteûve maîsse : adon qu’ mî, i m’aveût disfindu d’ m’aler pormwinrner autou di s’ feume, èwou qu’i vikeût avou s’ famille. I m’a rabrèssî rade faît d’ssu mès lèpes. I m’a priyî po-z-aler mindjî on bokèt avou lî amon l’ Chinwès. One cûjène qui dj’aveû èvi, qui m’ brûleût mi stoumak come one jate di tabasco au pwèf. « Dji so prèsse, mon keûr, dji so d’a vos ! » Dj’aveû l’ diâle èl coco dispôy saquants minutes. Dji m’a r’ssouwé. I waîteût on match di fotbal. Dji m’a mètu à d’gnos pad’vant lî, po lî fé tchaufer s’ tchaudron. Djè l’a èmin.né dins m’ tchambe. Il avancicheûve à ikè avou s’ marone bachîye dissu sès solers. I n’aveût minme nin è l’idéye dèl rilèver. Dji m’a stindu d’ssu m’ lét. « Véns, rademint ! » I s’a mètu mièrnu, volu si stinde sur mî. Djè lî a d’ner dès torgnoles sins fin, di s’-t-anète djusqu’à sès fèsses sins rovî s’ -t-agayon. I s’a r’lèvé tot bwârlant d’ mau. Dji vèyeûve li peû plin sès-ouys. Dj’a sautelé su s’ visadje avou mès filantès-ongues, li grèter sès massales à song. Djè l’ a agnî dins s’-t-anète. Il a pèté èvôy fin mièrnu… D’après lès guèrnouyes di binètî qui antenut nosse vijnauve, i s’a d’vu têrer one samin.ne à l’ôtèl divant d’ ritrover on mèyeû visadje. Si feume lî èvôyeûve dès dèmonés mèssadjes sins sawè qwè, ni èwou qu’il èsteût. À l’âdje qu’il aveût d’dja ; il lî faurè do timps divant d’èsse quite dès cicatrices. Il a rabroké à s’ maujone quinze djoûs pu taurd. I pwatreût lès marques di sès cwachures po l’ rèstant d’ sès djoûs. Il a s’tî r’çu pas s’ feume come on tchin dins-on djeû d’ kîyes, mins èle l’a aurdé quand minme ! Dj’ènn’a pus jamaîs ètindu causer…