Novèles èt Binde à dèsséns/VII
Ciste ouve ci egzistêye eto divins ds ôtès ortografeyes : Rifondou walon.
I
Lë sondje
Djë n’ dwâme pës biacôp. Lë tapéye, c’è-st-aviè cénq eûres par naît. Djë m’ dëspiète së l’ côp quatre eûres tos lès djoûs. Djë m’ rëlève, ë faît paujêre, èt djë vén scrîre à m’n-auje, djësqu’à ç’ quë lès brûts dè l’vëjnauve vègnenëche më dîre qu’ël èst timps d’ passer à ôte tchôse.
Audjoûrdë, c’èst sèm’dë, djë m’a fwârcî à m’ fordwârmë djësqu’à cinq eûres. Èt djë m’a co v’lu r’toûrner por one daîrëne sèyance dins lès brès da « Morféye » s’apinsenèt lès sodwârmants…
Cénq eûres
…Dj’èsto dins m’n-auto, èt nosse man së l’ banquète d’astoke, à d’vëser dè bon timps èt dë ç’ quë lî faûrot come dinréyes po l’ din.ner.
Dj’a moussî dins l’ coûs d’one cinse. C’èst là qu’èlle a baké èt tchaîr flauwe tot conte lë carau dè l’ portiére. Dj’a moussî foû d’ l’auto, au pës rade, fé l’ tour, lë r’lèvé… Ël èstot trop taurd… Djë m’a fwârcë à l’ solèver dins mès brès… Èlle m’a choné lèdjêre, lèdjêre… Djë n’ vèyéve pës quë s’ vësadje… Mins ni s’ vësadje tot ratchitchi dè l’vîye fème qu’èlle èstot dëv’nouwe… Non.na, së vësadje dë djon.ne fèye come quand èle djoûwéve à Sinte Tèrése dins lès porcèssions d’ nosse këré, abiyîe à bèguëne… Sès-ouys èstin’ sèré. Èt vola qu’èle lès drovéve, èt m’ dîre : « Djë so bënauje, c’è-st-audjoûrdë quë dj’ mousse é paradës ! »…
Cénq eûres dîj’
Djë so bén dëspièrté. Dj’a yë on bon scoladje dins one sëcole dë këré. Mins djë n’ crwè pës ni à Dië, ni à Diâle…
… Dj’a fougnî dins mès sovnances…
… Volà quénze ans qu’ nosse man èst mwate.
… Audjoûrdë !